ಜಾಹೀರಾತು
ಮಂಗಳೂರು: 1997ರಲ್ಲಿ ಸ್ಥಾಪನೆಯಾದ ಪ್ರಮುಖ 'ತುಂಬೆ ಸಮೂಹ ಸಂಸ್ಥೆ'ಯು (Thumbay Group) ಯಶಸ್ವಿಯಾಗಿ ತನ್ನ 30ನೇ ವರ್ಷಕ್ಕೆ ಕಾಲಿಟ್ಟಿದೆ ಎಂದು ಸಂಸ್ಥೆಯ ಸಂಸ್ಥಾಪಕ ಅಧ್ಯಕ್ಷ ಡಾ. ತುಂಬೆ ಮೊಯ್ದೀನ್ ತಿಳಿಸಿದ್ದಾರೆ. ತುಂಬೆ ಹಿಲ್ಸ್ ನಲ್ಲಿ ಏರ್ಪಡಿಸಿದ್ದ ಪತ್ರಿಕಾಗೋಷ್ಠಿಯಲ್ಲಿ ವೈದ್ಯಕೀಯ ಶಿಕ್ಷಣ ಹಾಗೂ ಆರೋಗ್ಯ ರಕ್ಷಣಾ ಕ್ಷೇತ್ರದಲ್ಲಿ ಸಮೂಹವು ಸಾಧಿಸಿರುವ ಮೂರು ದಶಕಗಳ ಹೆಮ್ಮೆಯ ಬೆಳವಣಿಗೆಯನ್ನು ಹಂಚಿಕೊಂಡರು. ಅಜ್ಮಾನ್ನ ಆಡಳಿತ ಕುಟುಂಬದ ಆಹ್ವಾನದ ಮೇರೆಗೆ ಖಾಸಗಿ ವೈದ್ಯಕೀಯ ಕಾಲೇಜು ಸ್ಥಾಪಿಸುವುದರೊಂದಿಗೆ ಈ ಪಯಣ ಆರಂಭವಾಯಿತು. 1998ರಲ್ಲಿ ಆರಂಭವಾದ ಗಲ್ಫ್ ವೈದ್ಯಕೀಯ ಕಾಲೇಜು ಇಂದು 'ಗಲ್ಫ್ ವೈದ್ಯಕೀಯ ವಿಶ್ವವಿದ್ಯಾಲಯ'ವಾಗಿ (GMU) ವಿಕಸನಗೊಂಡಿದ್ದು, ಗಲ್ಫ್ ಪ್ರದೇಶದ ನಂ. 1 ಖಾಸಗಿ ವೈದ್ಯಕೀಯ ವಿಶ್ವವಿದ್ಯಾಲಯವೆಂದು ಖ್ಯಾತಿ ಪಡೆದಿದೆ. ಪ್ರಸ್ತುತ ಜಿಎಂಯು (GMU) ಏಳು ಕಾಲೇಜುಗಳು, 50ಕ್ಕೂ ಹೆಚ್ಚು ಮಾನ್ಯತೆ ಪಡೆದ ಕಾರ್ಯಕ್ರಮಗಳು, 111ಕ್ಕೂ ಹೆಚ್ಚು ರಾಷ್ಟ್ರೀಯತೆಗಳ ಸುಮಾರು 5,000 ವಿದ್ಯಾರ್ಥಿಗಳನ್ನು ಹೊಂದಿದೆ. ಅಲ್ಲದೆ, 70ಕ್ಕೂ ಹೆಚ್ಚು ಅಂತರರಾಷ್ಟ್ರೀಯ ವಿಶ್ವವಿದ್ಯಾಲಯಗಳೊಂದಿಗೆ ಶೈಕ್ಷಣಿಕ ಹಾಗೂ ಸಂಶೋಧನಾ ಸಹಯೋಗ ಹೊಂದಿದ್ದು, ಸಂಶೋಧನಾ ಅನುದಾನಕ್ಕಾಗಿ ವಾರ್ಷಿಕವಾಗಿ ಸುಮಾರು 10 ದಶಲಕ್ಷ AED ಗಳನ್ನು ಹೂಡಿಕೆ ಮಾಡುತ್ತಿದೆ.
ಅಜ್ಮಾನ್ನ ಅಲ್ ಜುರ್ಫ್ನಲ್ಲಿರುವ 25 ಎಕರೆ ವಿಸ್ತೀರ್ಣದ 'ತುಂಬೆ ಮೆಡಿಸಿಟಿ' ಈ ಆರೋಗ್ಯ ವ್ಯವಸ್ಥೆಯ ಕೇಂದ್ರಬಿಂದುವಾಗಿದ್ದು, ಇಲ್ಲಿ 350 ಹಾಸಿಗೆಗಳ ಸಾಮರ್ಥ್ಯದ 'ತುಂಬೆ ಯೂನಿವರ್ಸಿಟಿ ಹಾಸ್ಪಿಟಲ್' ಸೇರಿದಂತೆ ವಿವಿಧ ವಿಶೇಷ ಆಸ್ಪತ್ರೆಗಳು ಕಾರ್ಯನಿರ್ವಹಿಸುತ್ತಿವೆ. ಈ ಸಮಗ್ರ ಸೌಲಭ್ಯಕ್ಕೆ ಪ್ರತಿದಿನ ಸುಮಾರು 15,000 ಮಂದಿ ಭೇಟಿ ನೀಡುತ್ತಾರೆ. ಶಾರ್ಜಾ ಹೆಲ್ತ್ಕೇರ್ ಸಿಟಿಯಲ್ಲಿ ಮನೋವೈದ್ಯಕೀಯ ಆಸ್ಪತ್ರೆ, ತುಂಬೆ ಪಶುವೈದ್ಯಕೀಯ ಬೋಧನಾ ಆಸ್ಪತ್ರೆ ಮತ್ತು ಅಂತರರಾಷ್ಟ್ರೀಯ ಸಂಶೋಧನಾ ಕೇಂದ್ರಗಳ ಸ್ಥಾಪನೆಯಂತಹ ವಿಸ್ತರಣಾ ಕಾರ್ಯಗಳು ಮುಂದುವರಿದಿವೆ. ಮುಂಬರುವ ದಿನಗಳಲ್ಲಿ ತುಂಬೆ ಮೆಡಿಸಿಟಿ ಯೋಜನೆಯು ಸುಮಾರು 1,000 ಉದ್ಯೋಗಗಳನ್ನು ಸೃಷ್ಟಿಸುವ ನಿರೀಕ್ಷೆಯಿದೆ. ಜಿನೀವಾ ಕಾಲೇಜ್ ಆಫ್ ಲಾಂಗ್ವಿಟಿ ಸೈನ್ಸ್ ಸಹಭಾಗಿತ್ವದಲ್ಲಿ ಯುಎಇಯಲ್ಲಿ ಮೊಟ್ಟಮೊದಲ ಬಾರಿಗೆ ದೀರ್ಘಾಯುಷ್ಯ ಔಷಧದಲ್ಲಿ ಶೈಕ್ಷಣಿಕ ಕಾರ್ಯಕ್ರಮಗಳನ್ನು ಘೋಷಿಸಲಾಗಿದೆ. ಮುಂದಿನ ಎರಡು-ಮೂರು ವರ್ಷಗಳಲ್ಲಿ ಸ್ಥಳೀಯ ಹಳ್ಳಿಗಳಲ್ಲೂ ಉದ್ಯೋಗಾವಕಾಶಗಳನ್ನು ಸೃಷ್ಟಿಸುವ ಮೂಲಕ ಸಮುದಾಯಕ್ಕೆ ಕೊಡುಗೆ ನೀಡುವ ಚಿಂತನೆ ಇದೆ ಎಂದು ಡಾ. ತುಂಬೆ ಎಂದು ತಿಳಿಸಿದರು.
ವಿಡಿಯೋಗಾಗಿ ಇಲ್ಲಿ ಕ್ಲಿಕ್ ಮಾಡಿ
ಡಾ. ತುಂಬೆ ಮೊಯಿದೀನ್ ಅವರಿಗೆ ಅಕ್ಟೋಬರ್ 2024ರಲ್ಲಿ ಕರ್ನಾಟಕದ ಎರಡನೇ ಅತ್ಯುನ್ನತ ನಾಗರಿಕ ಪ್ರಶಸ್ತಿಯಾದ 'ರಾಜ್ಯೋತ್ಸವ ಪ್ರಶಸ್ತಿ' ಹಾಗೂ ಜನವರಿ 2026ರಲ್ಲಿ 'ಹೊಸ ವರ್ಷದ ಪ್ರಶಸ್ತಿ' (New Year Award) ನೀಡಿ ಗೌರವಿಸಲಾಗಿದೆ. ಅಲ್ಲದೆ, ಮೂರು ಖಂಡಗಳ ವಿವಿಧ ವಿಶ್ವವಿದ್ಯಾಲಯಗಳಿಂದ ಐದು ಗೌರವ ಡಾಕ್ಟರೇಟ್ಗಳು ಅವರಿಗೆ ಒಲಿದುಬಂದಿವೆ.
