ಸುಳ್ಯ : ಪ್ರತಿಷ್ಠಿತ ಇಂಟರ್ನ್ಯಾಷನಲ್ ಸ್ಟಾರ್ ಕಿಡ್ಸ್ ಅವಾರ್ಡ್ಸ್ ಸಂಸ್ಥೆಯು ನೀಡುವ 'ಸ್ಟಾರ್ ಅಚೀವರ್' ಪ್ರಶಸ್ತಿಗೆ ಅರಂಬೂರಿನ ಬಾಲಪ್ರತಿಭೆ ಇವಾ ಫಾತಿಮಾ ಬಶೀರ್ ಭಾಜನರಾಗಿದ್ದಾರೆ. ಶೈಕ್ಷಣಿಕ, ಸಾಹಿತ್ಯ, ನಾವೀನ್ಯತೆ, ಕಲೆ ಹಾಗೂ ಸಮುದಾಯ ಸೇವೆಯಲ್ಲಿ ಇವಾ ಅವರ ಅಸಾಧಾರಣ ಬಹುಮುಖ ಪ್ರತಿಭೆ ಮತ್ತು ಸಾಧನೆಗಳನ್ನು ಗುರುತಿಸಿ ಈ ಗೌರವ ನೀಡಲಾಗಿದೆ.

ಯುಎಇಯ ಶಾರ್ಜಾದ ಜೆಮ್ಸ್ ಮಿಲೇನಿಯಮ್ ಶಾಲೆಯ 5ನೇ ತರಗತಿ ವಿದ್ಯಾರ್ಥಿನಿಯಾಗಿರುವ ಇವಾ, ಶೈಕ್ಷಣಿಕ ಮತ್ತು ಪಠ್ಯೇತರ ಚಟುವಟಿಕೆಗಳೆರಡರಲ್ಲೂ ಸತತವಾಗಿ ಶ್ರೇಷ್ಠತೆಯನ್ನು ಪ್ರದರ್ಶಿಸುತ್ತಿದ್ದಾರೆ. ತಮ್ಮ ಶಾಲೆಯಲ್ಲಿ 'ಕ್ಲಾಸ್ ಟಾಪರ್', 'ಗೋಲ್ಡನ್ ರಿಬ್ಬನ್' ಹಾಗೂ 'ಅಕಾಡೆಮಿಕ್ ಲಾರೆಟ್' ಬಿರುದುಗಳನ್ನು ಪಡೆದುಕೊಂಡಿರುವ ಇವರು, ವಿವಿಧ ರಾಷ್ಟ್ರೀಯ ಮತ್ತು ಅಂತರಾಷ್ಟ್ರೀಯ ಒಲಿಂಪಿಯಾಡ್ ಸ್ಪರ್ಧೆಗಳಲ್ಲಿ ಸಾಧನೆಗೈದು ಹಲವು ವಿದ್ಯಾರ್ಥಿವೇತನ, ಟ್ರೋಫಿ ಹಾಗೂ ಪದಕಗಳನ್ನು ಗೆದ್ದುಕೊಂಡಿದ್ದಾರೆ.

ಸಾಹಿತ್ಯ ಕ್ಷೇತ್ರದಲ್ಲಿಯೂ ಗಮನಾರ್ಹ ಹೆಜ್ಜೆ ಇಟ್ಟಿರುವ ಇವಾ, ಈಗಾಗಲೇ ಸ್ವತಂತ್ರವಾಗಿ ಒಂದು ಕಥಾ ಪುಸ್ತಕ ಪ್ರಕಟಿಸಿದ್ದು, ಮೂರು ಪುಸ್ತಕಗಳಿಗೆ ಸಹ-ಲೇಖಕಿಯಾಗಿದ್ದಾರೆ. ಸುದೀರ್ಘ ಸಮಯಾವಧಿಗೆ ಸತತವಾಗಿ ಇಂಗ್ಲಿಷ್ ಕಥಾ ಪುಸ್ತಕಗಳನ್ನು ಓದುವ ದಾಖಲೆ ಬರೆದು 'ಇಂಡಿಯಾ ಬುಕ್ ಆಫ್ ರೆಕಾರ್ಡ್ಸ್' ಹಾಗೂ 'ಅರೇಬಿಯನ್ ವರ್ಲ್ಡ್ ರೆಕಾರ್ಡ್ಸ್'ನಲ್ಲಿಯೂ ತಮ್ಮ ಹೆಸರು ದಾಖಲಿಸಿದ್ದಾರೆ. ಇವರ ಈ ಸಾಧನೆಗೆ ಶಾರ್ಜಾ ಸರ್ಕಾರದ ಶಿಕ್ಷಣ ಇಲಾಖೆಯು "ಪಯೋನೀರ್ ರೀಡರ್" ಪುರಸ್ಕಾರ ನೀಡಿ ಗೌರವಿಸಿದೆ.

ಯುವ ಸಂಶೋಧಕಿಯಾಗಿ ಬೆಳೆಯುತ್ತಿರುವ ಇವರು ವಿದ್ಯಾರ್ಥಿಗಳ ಕಲಿಕೆಗೆ ನೆರವಾಗುವ ಹಲವು ಎಐ (AI) ಆಧಾರಿತ ಶೈಕ್ಷಣಿಕ ಅಪ್ಲಿಕೇಶನ್‌ಗಳು ಮತ್ತು ವೀಡಿಯೊಗಳನ್ನು ಅಭಿವೃದ್ಧಿಪಡಿಸಿದ್ದಾರೆ. ಇದರೊಂದಿಗೆ ಸಾಮಾಜಿಕ ಕೆಲಸಗಳಲ್ಲಿ ಸ್ವಯಂಸೇವಕಿಯಾಗಿ ಹಾಗೂ ಸೃಜನಶೀಲ ಕಲಾ ಸ್ಪರ್ಧೆಗಳಲ್ಲಿಯೂ ತಮ್ಮನ್ನು ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದಾರೆ. ಇವಾ ಫಾತಿಮಾ ಅವರು ಮೂಲತಃ ಸುಳ್ಯ ತಾಲೂಕಿನ ಅಲೆಟ್ಟಿ ಗ್ರಾಮದ ಮಹಮ್ಮದ್ ಬಶೀರ್ ಅರಂಬೂರು ಮತ್ತು ಹಸೀನಾ ದಂಪತಿಯ ಪುತ್ರಿಯಾಗಿದ್ದು, ಪ್ರಸ್ತುತ ಕುಟುಂಬದೊಂದಿಗೆ ಶಾರ್ಜಾದಲ್ಲಿ ನೆಲೆಸಿದ್ದಾರೆ.