ಮಂಗಳೂರು: ದೇಶದ ಪ್ರತಿಷ್ಠಿತ ಸಹಕಾರಿ ಸಂಸ್ಥೆಗಳಲ್ಲಿ ಒಂದಾದ ದಿ ಕ್ಯಾಂಪ್ಕೋ ಲಿಮಿಟೆಡ್ ತನ್ನ ಸುಮಾರು 1.5 ಲಕ್ಷ ಬೆಳೆಗಾರ ಸದಸ್ಯರಿಗಾಗಿ ಅತ್ಯಾಧುನಿಕ 'ಕ್ಯಾಂಪ್ಕೋ ಮಿತ್ರ ಅಗ್ರಿ ಆ್ಯಪ್' ಅನ್ನು ಬಿಡುಗಡೆಗೊಳಿಸಿದೆ. ಸಂಸ್ಥೆಯ ಮಾಜಿ ಅಧ್ಯಕ್ಷರಾದ ಕಿಶೋರ್ ಕುಮಾರ್ ಕೊಡ್ಗಿ ಅವರು ಈ ಹೊಸ ಡಿಜಿಟಲ್ ಸೇವೆಗೆ ಅದ್ಧೂರಿ ಚಾಲನೆ ನೀಡಿದರು.

ಬೆಳೆಗಾರರ ಸಬಲೀಕರಣ ಹಾಗೂ ಡಿಜಿಟಲ್ ಪರಿವರ್ತನೆಯ ಧ್ಯೇಯದೊಂದಿಗೆ ರೂಪಿಸಲಾಗಿರುವ ಈ ಆ್ಯಪ್ ಮೂಲಕ ಸದಸ್ಯರು ಇನ್ಮುಂದೆ ತಮ್ಮ ಬೆರಳ ತುದಿಯಲ್ಲೇ ಪ್ರಮುಖ ಸೇವೆಗಳನ್ನು ಪಡೆಯಬಹುದಾಗಿದೆ. ರೈತರು ತಮ್ಮ ಸದಸ್ಯತ್ವ ಮಾಹಿತಿ, ಷೇರು ವಿವರಗಳು, ವಾರ್ಷಿಕ ಲಾಭಾಂಶ (ಡಿವಿಡೆಂಡ್), ಠೇವಣಿ ಹಾಗೂ ಮುಂಗಡಗಳ ವಿವರಗಳನ್ನು ಮೊಬೈಲ್‌ನಲ್ಲೇ ಸುಲಭವಾಗಿ ಪರಿಶೀಲಿಸಬಹುದು. ಇದರೊಂದಿಗೆ ದೈನಂದಿನ ಅಡಿಕೆ, ಕೊಕೊ ಸೇರಿದಂತೆ ವಿವಿಧ ಬೆಳೆಗಳ ಮಾರುಕಟ್ಟೆ ದರಗಳು, ಸಂಸ್ಥೆಯ ಪ್ರಮುಖ ಅಧಿಸೂಚನೆಗಳು ಹಾಗೂ ವಿವಿಧ ಶಾಖೆಗಳ ಮಾಹಿತಿಯೂ ಈ ಆ್ಯಪ್‌ನಲ್ಲಿ ಲಭ್ಯವಿರಲಿದೆ.

ಉದ್ಘಾಟನಾ ಸಮಾರಂಭದಲ್ಲಿ ಭಾರತದ ಮಾಜಿ ಕೇಂದ್ರ ಸಚಿವರು ಹಾಗೂ ಕರ್ನಾಟಕದ ಮಾಜಿ ಮುಖ್ಯಮಂತ್ರಿಗಳಾದ ಡಿ. ವಿ. ಸದಾನಂದ ಗೌಡ, ಕ್ಯಾಂಪ್ಕೋ ಅಧ್ಯಕ್ಷರಾದ ಎಸ್. ಆರ್. ಸತೀಶ್ಚಂದ್ರ, ಪ್ರಗತಿಪರ ಕೃಷಿಕ ಹಾಗೂ ರಾಷ್ಟ್ರೀಯ ಅತ್ಯುತ್ತಮ ಶಿಕ್ಷಕ ಪ್ರಶಸ್ತಿ ಪುರಸ್ಕೃತ ಶಂಕರ ಸಾರಡ್ಕ, ವ್ಯವಸ್ಥಾಪಕ ನಿರ್ದೇಶಕರಾದ ಡಾ. ಬಿ. ವಿ. ಸತ್ಯನಾರಾಯಣ ಮತ್ತು ಉಪಾಧ್ಯಕ್ಷರಾದ ಪದ್ಮರಾಜ್ ಪಟ್ಟಾಜೆ ಉಪಸ್ಥಿತರಿದ್ದರು. ಸಂಸ್ಥೆಯ ನಿರ್ದೇಶಕ ಮಂಡಳಿಯ ಸದಸ್ಯರು, ಗಣ್ಯರು ಹಾಗೂ ನೂರಾರು ಬೆಳೆಗಾರ ಸದಸ್ಯರು ಈ ಐತಿಹಾಸಿಕ ಕ್ಷಣಕ್ಕೆ ಸಾಕ್ಷಿಯಾದರು. ಪರಂಪರೆಯ ಹೆಮ್ಮೆಯೊಂದಿಗೆ ಡಿಜಿಟಲ್ ಯುಗಕ್ಕೆ ಹೆಜ್ಜೆ ಇಟ್ಟಿರುವ ಕ್ಯಾಂಪ್ಕೋದ ಈ ಪ್ರಯತ್ನಕ್ಕೆ ಕೃಷಿಕ ವಲಯದಿಂದ ವ್ಯಾಪಕ ಶ್ಲಾಘನೆ ವ್ಯಕ್ತವಾಗಿದೆ.