ಜಾಹೀರಾತು
ಮಂಗಳೂರು: ಮಾದಕ ದ್ರವ್ಯಗಳ ದುಷ್ಪರಿಣಾಮಗಳ ಬಗ್ಗೆ ಸಮಾಜದಲ್ಲಿ ಮತ್ತು ವಿದ್ಯಾರ್ಥಿಗಳಲ್ಲಿ ಜಾಗೃತಿ ಮೂಡಿಸುವ ಉದ್ದೇಶದಿಂದ ಫಾದರ್ ಮುಲ್ಲರ್ ಚಾರಿಟಬಲ್ ಇನ್ಸ್ಟಿಟ್ಯೂಷನ್ಸ್ (FMCI), ಕಂಕನಾಡಿ, ಜೂನ್ 3, 2026ರಂದು ಬೃಹತ್ 'ಮಾದಕ ದ್ರವ್ಯ ವಿರೋಧಿ ಜಾಗೃತಿ ಜಾಥಾ'ವನ್ನು ಆಯೋಜಿಸಿದೆ ಎಂದು ಆಡಳಿತಾಧಿಕಾರಿ ವಂ. ಡಾ. ಮೈಕೆಲ್ ಸಂತುಮಯರ್ ತಿಳಿಸಿದರು. ಅವರು ನಗರದ ಪತ್ರಿಕಾ ಭವನದಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಈ ಬಗ್ಗೆ ಮಾಹಿತಿ ನೀಡಿ,
ಬೆಳಿಗ್ಗೆ 7:00 ಗಂಟೆಗೆ ಫಾದರ್ ಮುಲ್ಲರ್ ಕ್ಯಾಂಪಸ್ನಿಂದ ಆರಂಭವಾಗುವ ಈ ಜಾಥಾವು ಫಾದರ್ ಮುಲ್ಲರ್ ಸರ್ಕಲ್, ಕಾರಾವಳಿ ಸರ್ಕಲ್ ಮತ್ತು ಪಂಪ್ವೆಲ್ ಸರ್ಕಲ್ನ ಪಶ್ಚಿಮ ಭಾಗದ ಮೂಲಕ ಸಾಗಿ, ಫಾದರ್ ಮುಲ್ಲರ್ ಕನ್ವೆನ್ಷನ್ ಸೆಂಟರ್ ಪ್ರವೇಶಿಸಿ, ಫಾದರ್ ಮುಲ್ಲರ್ ಮೈದಾನದಲ್ಲಿ ಸಮಾಪನಗೊಳ್ಳಲಿದೆ.
ಈ ಕಾರ್ಯಕ್ರಮಕ್ಕೆ ದಕ್ಷಿಣ ಕನ್ನಡ ಜಿಲ್ಲಾಧಿಕಾರಿ ಮತ್ತು ಜಿಲ್ಲಾ ಮ್ಯಾಜಿಸ್ಟ್ರೇಟ್ ದರ್ಶನ್ ಹೆಚ್.ವಿ., ಹಾಗೂ ಉದ್ಯಮಿ ಮತ್ತು ದಾನಿ ಮೈಕಲ್ ಡಿಸೋಜಾ ಅವರು ಚಾಲನೆ ನೀಡಲಿದ್ದಾರೆ. ಸಂಸ್ಥೆಯ ನಿರ್ದೇಶಕ ವಂ. ಫಾದರ್ ಫಾಸ್ಟೀನ್ ಲೂಕಾಸ್ ಲೋಬೊ ಅವರ ನೇತೃತ್ವದಲ್ಲಿ ನಡೆಯಲಿರುವ ಈ ಜಾಥಾದಲ್ಲಿ ಫಾದರ್ ಮುಲ್ಲರ್ನ ವಿವಿಧ ವೈದ್ಯಕೀಯ ಮತ್ತು ಶಿಕ್ಷಣ ಸಂಸ್ಥೆಗಳ 3000ಕ್ಕೂ ಹೆಚ್ಚು ವಿದ್ಯಾರ್ಥಿಗಳು, ಬೋಧಕರು ಮತ್ತು ಸಿಬ್ಬಂದಿ ಪಾಲ್ಗೊಳ್ಳಲಿದ್ದಾರೆ.
ರಾಜೀವ್ ಗಾಂಧಿ ಆರೋಗ್ಯ ವಿಜ್ಞಾನಗಳ ವಿಶ್ವವಿದ್ಯಾಲಯದ (RGUHS) 'ನಶಾ ಮುಕ್ತ ಭಾರತ್' ಅಭಿಯಾನದಿಂದ ಪ್ರೇರಿತವಾಗಿರುವ ಈ ಕಾರ್ಯಕ್ರಮದಲ್ಲಿ, ಮಾದಕ ದ್ರವ್ಯಗಳ ವಿರುದ್ಧದ ಜಾಗೃತಿ ಮೂಡಿಸುವ ವಿಶೇಷ ಸ್ಕಿಟ್ ಪ್ರದರ್ಶನವೂ ಇರಲಿದೆ. ಸಮಾರೋಪ ಸಮಾರಂಭದಲ್ಲಿ ನಗರ ಪೊಲೀಸ್ ಆಯುಕ್ತ ಸುಧೀರ್ ಕುಮಾರ್ ರೆಡ್ಡಿ ಸೇರಿದಂತೆ ಪೊಲೀಸ್ ಇಲಾಖೆಯ ಹಿರಿಯ ಅಧಿಕಾರಿಗಳು ಭಾಗವಹಿಸಲಿದ್ದಾರೆ. ಜಾಥಾದ ಪೂರ್ವಭಾವಿಯಾಗಿ ನಡೆದ ಸ್ಲೋಗನ್ ಮತ್ತು ರೀಲ್ಸ್ ಸ್ಪರ್ಧೆಯ ವಿಜೇತರಿಗೆ ಇದೇ ಸಂದರ್ಭದಲ್ಲಿ ಬಹುಮಾನ ವಿತರಿಸಲಾಗುವುದು. ಮಾದಕ ದ್ರವ್ಯಗಳ ಬಳಕೆಯು ವ್ಯಕ್ತಿ ಮತ್ತು ಸಮಾಜದ ಮೇಲೆ ಉಂಟುಮಾಡುವ ಮಾರಕ ಪರಿಣಾಮಗಳ ಬಗ್ಗೆ ಜಾಗೃತಿ ಮೂಡಿಸುವುದು ಈ ಅಭಿಯಾನದ ಮುಖ್ಯ ಉದ್ದೇಶವಾಗಿದೆ ಎಂದರು. ಪತ್ರಿಕಾಗೋಷ್ಠಿಯಲ್ಲಿ ಪ್ರೊ. ಚೆರಿಷ್ಮಾ ಡಿ’ಸಿಲ್ವ, ಡಾ. ಶಿವಶಂಕರ ಎ.ಆರ್, ಡಾ. ಕೆಲ್ವಿನ್ ಪಾಯಿಸ್, ಡಾ. ಸ್ಯೂಅಲೆನ್ ಡಿಸೋಜಾ ಉಪಸ್ಥಿತರಿದ್ದರು.
