ಮಂಗಳೂರು : ಜಾಗತಿಕ ಆರ್ಥಿಕ ಹಿಂಜರಿಕೆ ಎದುರಿಸಲು ಕೇಂದ್ರ ಸರ್ಕಾರದಿಂದ ಉದ್ಯಮಿಗಳಿಗೆ ತುರ್ತು ಹಣಕಾಸು ನೆರವಿನ ಪರಿಹಾರವಾಗಿ 'ECLGS 5.0' ಯೋಜನೆಯನ್ನು ಪ್ರಕಟಿಸಲಾಗಿದೆ. ಪಶ್ಚಿಮ ಏಷ್ಯಾ ಸಂಘರ್ಷದಿಂದ ಉಂಟಾದ ಜಾಗತಿಕ ಆರ್ಥಿಕ ಬಿಕ್ಕಟ್ಟು ಹಾಗೂ ಅಲ್ಪಾವಧಿಯ ದ್ರವ್ಯತೆ ಅಸಮತೋಲನವನ್ನು ನಿವಾರಿಸಲು ಕೇಂದ್ರ ಸರ್ಕಾರವು ಈ ತುರ್ತು ದ್ರವ್ಯತೆ (Emergency Credit) ಯೋಜನೆಯನ್ನು ಜಾರಿಗೆ ತಂದಿದೆ. ಈ ಯೋಜನೆಯಡಿ MSMEಗಳು, MSME ಅಲ್ಲದ ಉದ್ಯಮಗಳು ಮತ್ತು ವಿಮಾನಯಾನ ವಲಯದ ಆರ್ಥಿಕ ಅಸ್ಥಿರತೆಗಳನ್ನು ಎದುರಿಸಲು ಒಟ್ಟು 2,55,000 ಕೋಟಿ ರೂಪಾಯಿಗಳ ಹೆಚ್ಚುವರಿ ಸಾಲ ಹರಿವಿನ ಗುರಿಯನ್ನು ಹೊಂದಲಾಗಿದ್ದು, ಇದರಲ್ಲಿ ವಿಮಾನಯಾನ ಸಂಸ್ಥೆಗಳಿಗೆ 5,000 ಕೋಟಿ ರೂಪಾಯಿಗಳನ್ನು ಮೀಸಲಿಡಲಾಗಿದೆ. ಹಣಕಾಸು ಸಚಿವಾಲಯದ ಅಡಿಯಲ್ಲಿ ನ್ಯಾಷನಲ್ ಕ್ರೆಡಿಟ್ ಗ್ಯಾರಂಟಿ ಟ್ರಸ್ಟಿ ಕಂಪನಿ ಲಿಮಿಟೆಡ್ (NCGTC) ಈ ಯೋಜನೆಯನ್ನು ನಿರ್ವಹಿಸುತ್ತಿದ್ದು, ಬ್ಯಾಂಕುಗಳು ಮತ್ತು NBFCಗಳ ಮೂಲಕ ಅರ್ಹ ಸಾಲಗಾರರಿಗೆ ಮೇಲಾಧಾರವಿಲ್ಲದ ಹೆಚ್ಚುವರಿ ಕಾರ್ಯನಿರತ ಬಂಡವಾಳ ಸಾಲಗಳನ್ನು ಒದಗಿಸಲಾಗುತ್ತಿದೆ.

ಈ ಯೋಜನೆಯು MSME ಉದ್ಯಮಗಳಿಗೆ ಶೇಕಡಾ 100 ರಷ್ಟು ಹಾಗೂ MSME ಅಲ್ಲದ ಉದ್ಯಮಗಳು ಮತ್ತು ವಿಮಾನಯಾನ ವಲಯಕ್ಕೆ ಶೇಕಡಾ 90 ರಷ್ಟು ಸಾಲ ಗ್ಯಾರಂಟಿ ವ್ಯಾಪ್ತಿಯನ್ನು ನೀಡುತ್ತದೆ. ಮಾರ್ಚ್ 31, 2026 ರ ವೇಳೆಗೆ ಅಸ್ತಿತ್ವದಲ್ಲಿರುವ ಕಾರ್ಯನಿರತ ಬಂಡವಾಳ ಮಿತಿಗಳನ್ನು ಹೊಂದಿರುವ MSMEಗಳು ಮತ್ತು ಸಾಲ ಸೌಲಭ್ಯಗಳನ್ನು ಹೊಂದಿರುವ ನಿಗದಿತ ಪ್ರಯಾಣಿಕ ವಿಮಾನಯಾನ ಸಂಸ್ಥೆಗಳು ಈ ಯೋಜನೆಗೆ ಅರ್ಹರಾಗಿರುತ್ತಾರೆ. ಆದರೆ, ಮಾರ್ಚ್ 31, 2026 ರ ಕಟ್‌-ಆಫ್ ದಿನಾಂಕದಂದು ಬ್ಯಾಂಕ್ ಸಾಲದ ಖಾತೆಯನ್ನು 'ಪ್ರಮಾಣಿತ' (Standard) ಎಂದು ವರ್ಗೀಕರಿಸಿರಬೇಕು ಮತ್ತು ಅಂದು SMA ಅಥವಾ NPA ಎಂದು ವರ್ಗೀಕರಿಸಲಾದ ಖಾತೆಗಳು ಕಟ್ಟುನಿಟ್ಟಾಗಿ ಅರ್ಹವಾಗಿರುವುದಿಲ್ಲ. ಈ ಖಾತರಿಪಡಿಸಿದ ಸೌಲಭ್ಯಕ್ಕೆ ಯಾವುದೇ ಹೊಸ ಭದ್ರತೆಯ ಅಗತ್ಯವಿರುವುದಿಲ್ಲ ಹಾಗೂ ಗ್ಯಾರಂಟಿ ಶುಲ್ಕ, ದಸ್ತಾವೇಜು ಶುಲ್ಕ ಅಥವಾ ತಪಾಸಣೆ ಶುಲ್ಕಗಳು ಇರುವುದಿಲ್ಲ. ಆದಾಗ್ಯೂ, ಕೇಂದ್ರ ಸರ್ಕಾರದ ಈ ತುರ್ತು ಸಾಲಕ್ಕೂ ರಾಜ್ಯ ಸರ್ಕಾರವು ಸುಮಾರು ಶೇಕಡಾ 1 ರಷ್ಟು ಮುದ್ರಾಂಕ ಶುಲ್ಕವನ್ನು ವಿಧಿಸುತ್ತಿದ್ದು, ದೇಶದ ಆರ್ಥಿಕ ಬಿಕ್ಕಟ್ಟಿನ ಸಮಯದಲ್ಲಿ ಈ ಶುಲ್ಕದಿಂದ ಸಂಪೂರ್ಣ ವಿನಾಯಿತಿ ನೀಡಬೇಕೆಂದು ಉದ್ಯಮಿಗಳು ರಾಜ್ಯ ಸರ್ಕಾರವನ್ನು ಆಗ್ರಹಿಸುತ್ತಿದ್ದಾರೆ.

ಸಾಲದ ಮಿತಿಯನ್ನು ನೋಡುವುದಾದರೆ, 2026 ರ ಹಣಕಾಸು ವರ್ಷದ ನಾಲ್ಕನೇ ತ್ರೈಮಾಸಿಕದಲ್ಲಿ (01-01-2026 ರಿಂದ 31-03-2026) ಬಳಸಲಾದ ಗರಿಷ್ಠ ಕಾರ್ಯನಿರತ ಬಂಡವಾಳದ ಶೇಕಡಾ 20 ರವರೆಗೆ ಹೆಚ್ಚುವರಿ ಕ್ರೆಡಿಟ್ ನೀಡಲಾಗುತ್ತದೆ, ಇದು ಪ್ರತಿ ಸಾಲಗಾರನಿಗೆ ಗರಿಷ್ಠ 100 ಕೋಟಿ ರೂಪಾಯಿಗಳ ಮಿತಿಗೆ ಒಳಪಟ್ಟಿರುತ್ತದೆ. ವಿಮಾನಯಾನ ಸಂಸ್ಥೆಗಳಿಗೆ ಕೆಲವು ನಿರ್ದಿಷ್ಟ ಷರತ್ತುಗಳೊಂದಿಗೆ 100 ಪ್ರತಿಶತದವರೆಗೆ ಅಂದರೆ ಪ್ರತಿ ಸಾಲಗಾರನಿಗೆ ಗರಿಷ್ಠ 1,500 ಕೋಟಿ ರೂಪಾಯಿಗಳ ಮಿತಿಯನ್ನು ನಿಗದಿಪಡಿಸಲಾಗಿದೆ. ಬ್ಯಾಂಕುಗಳಿಂದ ಪಡೆಯುವ ಸಾಲಕ್ಕೆ MSMEಗಳಿಗೆ EBLR + 0.75% (ಗರಿಷ್ಠ 9%) ಮತ್ತು MSME ಅಲ್ಲದವುಗಳಿಗೆ MCLR + 0.75% (ಗರಿಷ್ಠ 9%) ಬಡ್ಡಿದರ ಇರಲಿದ್ದು, NBFCಗಳಿಂದ ಪಡೆಯುವ ಸಾಲಕ್ಕೆ ಗರಿಷ್ಠ ಶೇಕಡಾ 13 ರಷ್ಟು ಬಡ್ಡಿದರ ಇರುತ್ತದೆ. ಸಾಲ ಮರುಪಾವತಿ ಅವಧಿಯು MSME ಮತ್ತು MSME ಅಲ್ಲದ ಉದ್ಯಮಗಳಿಗೆ 1 ವರ್ಷದ ನಿಷೇಧಾವಧಿ (moratorium) ಒಳಗೊಂಡಂತೆ ಒಟ್ಟು 5 ವರ್ಷಗಳಾಗಿದ್ದರೆ, ವಿಮಾನಯಾನ ವಲಯಕ್ಕೆ 2 ವರ್ಷಗಳ ನಿಷೇಧಾವಧಿ ಸೇರಿದಂತೆ ಒಟ್ಟು 7 ವರ್ಷಗಳಾಗಿವೆ.

ಮಾರ್ಚ್ 31, 2027 ರವರೆಗಿನ ಅವಧಿಯಲ್ಲಿ ಮಂಜೂರು ಮಾಡಲಾಗುವ ಎಲ್ಲಾ ಸಾಲಗಳಿಗೆ ಈ ಯೋಜನೆ ಅನ್ವಯಿಸಲಿದ್ದು, ಜೂನ್ 30, 2027 ರೊಳಗೆ ಸಾಲದ ಮೊತ್ತವನ್ನು ವಿತರಿಸಬೇಕಾಗುತ್ತದೆ. ಈ ಯೋಜನೆಯಿಂದಾಗಿ MSMEಗಳು ಮತ್ತು ನಾಗರಿಕ ವಿಮಾನಯಾನ ವಲಯದಾದ್ಯಂತ ಉದ್ಯೋಗ ರಕ್ಷಣೆಯಾಗಲಿದ್ದು, ಉತ್ಪಾದನಾ ಸ್ಥಿರತೆ ಹಾಗೂ ದೇಶೀಯ ಪೂರೈಕೆ ಸರಪಳಿಗಳು ಸುಧಾರಿಸಲಿವೆ. ಅರ್ಹ ಉದ್ಯಮಿಗಳು ಜನ ಸಮರ್ಥ್ ಪೋರ್ಟಲ್ ಮುಖಾಂತರ ಆನ್‌ಲೈನ್‌ನಲ್ಲಿ ಅರ್ಜಿಯನ್ನು ಸಲ್ಲಿಸಬೇಕಾಗಿದ್ದು, ಉದ್ಯಮ ನೋಂದಣಿ ಪ್ರಮಾಣಪತ್ರ, ಪ್ಯಾನ್, ಆಧಾರ್, ವಿಳಾಸ ಪುರಾವೆ, ಸಾಲದ ಸ್ಟೇಟ್‌ಮೆಂಟ್, ಕಳೆದ 2-3 ವರ್ಷಗಳ ಆಡಿಟ್ ಆದ ಬ್ಯಾಲೆನ್ಸ್ ಶೀಟ್, 12 ತಿಂಗಳ ಬ್ಯಾಂಕ್ ಸ್ಟೇಟ್‌ಮೆಂಟ್, ಜಿಎಸ್‌ಟಿ ರಿಟರ್ನ್ಸ್ ಮತ್ತು ಐಟಿಆರ್ ದಾಖಲೆಗಳನ್ನು ಒದಗಿಸಬೇಕಾಗುತ್ತದೆ. ಬ್ಯಾಂಕ್‌ಗಳು ಈ ದಾಖಲೆಗಳ ಆಧಾರದ ಮೇಲೆ ಅರ್ಹತೆಯನ್ನು ಪರಿಶೀಲಿಸಿ ಸಾಲ ಮಂಜೂರಾತಿ ಪ್ರಕ್ರಿಯೆಯನ್ನು ಕೈಗೊಳ್ಳಲಿವೆ ಎಂದು ದಕ್ಷಿಣ ಕನ್ನಡ ಜಿಲ್ಲೆಯ ಆರ್ಥಿಕ ಪ್ರಕಟಣೆಯ ಪತ್ರಿಕಾ ಗೋಷ್ಠಿಯಲ್ಲಿ ಸಂಚಾಲಕರಾದ ಶ್ರೀ ಸಿ ಎ ಎಸ್ ನಾಯಕ್ ಹಾಗೂ ಸಹ ಸಂಚಾಲಕರಾದ ಶ್ರೀ ಜಿ ಯೋಗೀಶ್ ತಿಳಿಸಿದ್ದಾರೆ. ಪತ್ರಿಕಾಗೋಷ್ಟಿಯಲ್ಲಿ ರಾಜೇಶ್ ರಾವ್ ಎಂ, ವಸಂತ್ ಶೆಟ್ಟಿ, ಡಾ ಎಸ್ ಎಂ ಶಿವಪ್ರಕಾಶ್, ಶ್ರೀ ರಘುನಾಥ್ ಪೈ ಉಪಸ್ಥಿತರಿದ್ದರು.