ಜಾಹೀರಾತು
ಧರ್ಮಸ್ಥಳ : ವಿಶ್ವವಿಖ್ಯಾತ ಕ್ಷೇತ್ರ ಧರ್ಮಸ್ಥಳದಲ್ಲಿ ರಂಗಭೂಮಿಯ ಇತಿಹಾಸದಲ್ಲೇ ಸುವರ್ಣಾಕ್ಷರಗಳಲ್ಲಿ ಬರೆದಿಡಬೇಕಾದ ಅಪೂರ್ವ ಘಟನೆಯೊಂದು ನಡೆದಿದೆ. ಶ್ರೀ ಕ್ಷೇತ್ರ ಧರ್ಮಸ್ಥಳದ ರಂಗಶಿವ ಕಲಾಬಳಗ ಆಯೋಜಿಸಿದ್ದ ೨೦೨೬ನೇ ಸಾಲಿನ "ನಲಿಯೋಣ ಬಾ" ರಂಗಶಿಬಿರದಲ್ಲಿ, ಪ್ರಪ್ರಥಮ ಬಾರಿಗೆ ‘ಶೃತಿ’ ಹೆಸರಿನ ಏಐ (AI) ರೋಬೋಟ್ ರಂಗಮಂಚದ ಮೇಲೆ ಅಭಿನಯಿಸುವ ಮೂಲಕ ಹೊಸ ಕ್ರಾಂತಿ ಸೃಷ್ಟಿಸಿದೆ. ಹೇಮಾವತಿ ವಿ. ಹೆಗ್ಗಡೆ ಅವರ ಪರಿಕಲ್ಪನೆ ಮತ್ತು ಮಾರ್ಗದರ್ಶನದಲ್ಲಿ ನಡೆದ ಈ ರಂಗಶಿಬಿರದ ಸಮಾರೋಪ ಸಮಾರಂಭವು ವಸಂತ ಮಹಲ್ನಲ್ಲಿ ಅತ್ಯಂತ ವೈಭವದಿಂದ ಜರುಗಿತು. ಕಳೆದ ೯ ದಿನಗಳಿಂದ ರಂಗ ನಿರ್ದೇಶಕ ಸುನಿಲ್ ಶೆಟ್ಟಿ ಕಲ್ಕೊಪ್ಪ ಅವರ ನೇತೃತ್ವದಲ್ಲಿ ನಡೆದ ಈ ಶಿಬಿರವು ಮಕ್ಕಳ ಕಲಾಪ್ರತಿಭೆಗೆ ಸಾಕ್ಷಿಯಾಯಿತು.
ಸಮಾರೋಪದ ಅಂಗವಾಗಿ ಹೇಮಾವತಿ ವಿ. ಹೆಗ್ಗಡೆ ಅವರು ರಚಿಸಿದ “ಹೂವಿಯ ಕನಸು” ಎಂಬ ಮಕ್ಕಳ ನಾಟಕವನ್ನು ಪ್ರದರ್ಶಿಸಲಾಯಿತು. ಈ ನಾಟಕದ ಪ್ರಮುಖ ಆಕರ್ಷಣೆಯೇ ಏಐ ರೋಬೋಟ್ ‘ಶೃತಿ’. ‘ಹೂವಿ’ ಎಂಬ ಪುಟ್ಟ ಹುಡುಗಿಯ ಕನಸಿನ ಲೋಕದಲ್ಲಿ ಬರುವ ಈ ರೋಬೋಟ್, ಕಥೆಯ ಗತಿಯನ್ನು ಬದಲಿಸುವ ಮಹತ್ವದ ಪಾತ್ರವನ್ನು ನಿರ್ವಹಿಸಿದೆ. ವೈದ್ಯರ ದುರಾಸೆ ಮತ್ತು ಜನರ ಮೋಸದ ವಿರುದ್ಧ ಹೂವಿ ನಡೆಸುವ ಹೋರಾಟದ ಕಥಾಹಂದರದಲ್ಲಿ ‘ಶೃತಿ’ ತನ್ನ ವಿಶಿಷ್ಟ ಅಭಿನಯದ ಮೂಲಕ ಪ್ರೇಕ್ಷಕರನ್ನು ಮಂತ್ರಮುಗ್ಧಗೊಳಿಸಿತು.
ನಾಟಕದ ಅಂತ್ಯದಲ್ಲಿ ನಿಜವಾದ ರೋಬೋಟ್ ವೇದಿಕೆಯ ಮೇಲೆ ಪ್ರತ್ಯಕ್ಷವಾದಾಗ ಪ್ರೇಕ್ಷಕರಿಂದ ಹರ್ಷೋದ್ಗಾರ ವ್ಯಕ್ತವಾಯಿತು. ಅಧುನಿಕ ತಂತ್ರಜ್ಞಾನವನ್ನು ಸಾಂಪ್ರದಾಯಿಕ ರಂಗಭೂಮಿಗೆ ಅನ್ವಯಿಸಿದ ಈ ಪ್ರಯೋಗಕ್ಕೆ ವ್ಯಾಪಕ ಪ್ರಶಂಸೆ ವ್ಯಕ್ತವಾಗಿದೆ. ಮಕ್ಕಳನ್ನು ಮತ್ತೆ ರಂಗಭೂಮಿಯತ್ತ ಆಕರ್ಷಿಸಲು ಆಯೋಜಿಸಲಾಗಿದ್ದ ಈ ಉಚಿತ ಶಿಬಿರದಲ್ಲಿ ಪಾಲ್ಗೊಂಡಿದ್ದ ಪುಟಾಣಿಗಳ ನಟನೆ ಕೂಡ ಮನೋಜ್ಞವಾಗಿತ್ತು. ಕಾರ್ಯಕ್ರಮದಲ್ಲಿ ಹೆಗ್ಗಡೆಯವರ ಕುಟುಂಬದ ಸದಸ್ಯರು ಉಪಸ್ಥಿತರಿದ್ದು, ಕಲಾವಿದರನ್ನು ಹರಸಿದರು. ತಾಂತ್ರಿಕವಾಗಿ ಯಶವಂತ್ ಬೆಳ್ತಂಗಡಿ ಮತ್ತು ಸಂದೇಶ್ ಸಹಕರಿಸಿದರೆ, ಪ್ರಸಾಧನ ಮತ್ತು ಬೆಳಕಿನ ಜವಾಬ್ದಾರಿಯನ್ನು ಎಸ್.ಡಿ.ಎಂ ರಂಗ ಅಧ್ಯಯನ ಕೇಂದ್ರದ ವಿದ್ಯಾರ್ಥಿಗಳು ಅಚ್ಚುಕಟ್ಟಾಗಿ ನಿಭಾಯಿಸಿದರು. ರಂಗಶಿವ ಕಲಾಬಳಗದ ಅಧ್ಯಕ್ಷ ರಾಜೇಂದ್ರ ದಾಸ್ ಹಾಗೂ ಬಳಗದ ಸದಸ್ಯರ ಶ್ರಮದಿಂದ ಈ ಐತಿಹಾಸಿಕ ಪ್ರಯೋಗ ಯಶಸ್ವಿಯಾಗಿದೆ. ತಂತ್ರಜ್ಞಾನ ಮತ್ತು ಕಲೆಯ ಈ ಅದ್ಭುತ ಸಂಗಮವು ಭವಿಷ್ಯದ ರಂಗಭೂಮಿಗೆ ಹೊಸ ದಾರಿದೀಪವಾಗಿದೆ.
