ಮಂಗಳೂರು: ಪ್ರಮುಖ ರಸ್ತೆಯಾದ ಎಂ.ಜಿ. ರಸ್ತೆಯಲ್ಲಿರುವ ಟಿ.ಎಂ.ಎ. ಪೈ ಹಾಲ್ ಸಮೀಪದ ಮಳೆನೀರು ಚರಂಡಿಯ ಮೇಲೆ ಹೊಸ ಸೇತುವೆ ನಿರ್ಮಾಣ ಕಾಮಗಾರಿಯನ್ನು ಕೈಗೆತ್ತಿಕೊಳ್ಳಲಾಗಿದೆ. ಈ ಕಾಮಗಾರಿಯ ಹಿನ್ನೆಲೆಯಲ್ಲಿ ನಗರದ ಸಂಚಾರ ವ್ಯವಸ್ಥೆಯಲ್ಲಿ ಮಹತ್ವದ ಬದಲಾವಣೆಗಳನ್ನು ಮಾಡಲಾಗಿದ್ದು, ಈ ನಿಯಮಗಳು ಮಾರ್ಚ್ 30ರಿಂದ ಮೇ 30ರವರೆಗೆ ಜಾರಿಯಲ್ಲಿರುತ್ತವೆ. ಈ ಅವಧಿಯಲ್ಲಿ ವಾಹನ ಸವಾರರು ಅಡಚಣೆಯನ್ನು ತಪ್ಪಿಸಲು ಸಂಚಾರ ಪೊಲೀಸ್ ಇಲಾಖೆಯು ನಿಗದಿಪಡಿಸಿದ ಪರ್ಯಾಯ ಮಾರ್ಗಗಳನ್ನು ಅನುಸರಿಸುವಂತೆ ಸೂಚಿಸಲಾಗಿದೆ.

​ನಿರ್ಮಾಣ ಕಾರ್ಯ ನಡೆಯುತ್ತಿರುವ ಹಿನ್ನೆಲೆಯಲ್ಲಿ, ಲಾಲ್‌ಬಾಗ್‌ನಿಂದ ಪಿವಿಎಸ್ ಜಂಕ್ಷನ್ ಕಡೆಗೆ ಮಾತ್ರ ಏಕಮುಖ ಸಂಚಾರಕ್ಕೆ ಅವಕಾಶ ಕಲ್ಪಿಸಲಾಗಿದೆ. ಲಘು ವಾಹನಗಳು ಮತ್ತು ದ್ವಿಚಕ್ರ ವಾಹನ ಸವಾರರು ಲಾಲ್‌ಬಾಗ್‌ನಿಂದ ಬಲ್ಲಾಳ್‌ಬಾಗ್ ಮೂಲಕ ದುರ್ಗಾ ಮಹಲ್ ಕಡೆಗೆ ತಿರುಗಬಹುದು ಅಥವಾ ಬಲ್ಲಾಳ್‌ಬಾಗ್-ಟಿ.ಎಂ.ಎ. ಪೈ ಹಾಲ್ ಮಾರ್ಗವಾಗಿ ಪಟ್ಟುಮುಡಿ ಕ್ರಾಸ್ ರೋಡ್, ಜಿ.ಜಿ. ರಸ್ತೆ ಮತ್ತು ವಿಶಾಲ್ ನರ್ಸಿಂಗ್ ಹೋಮ್ ಮೂಲಕ ಸಂಚರಿಸಲು ಅವಕಾಶ ನೀಡಲಾಗಿದೆ. ಸರಕು ಸಾಗಣೆ ವಾಹನಗಳು ಕೊಟ್ಟಾರ - ಲೇಡಿಹಿಲ್ - ಮಣ್ಣಗುಡ್ಡ - ದುರ್ಗಾ ಮಹಲ್ - ನ್ಯೂ ಚಿತ್ರಾ - ಬಾಲಾಜಿ ಜಂಕ್ಷನ್ ಮಾರ್ಗವನ್ನು ಬಳಸಬೇಕು. ಖಾಸಗಿ ಐಷಾರಾಮಿ ಬಸ್ಸುಗಳಿಗೆ ಕೊಟ್ಟಾರ - ಕೆಪಿಟಿ - ನಂತೂರು - ಶಿವಬಾಗ್ ಮಾರ್ಗವನ್ನು ನಿಗದಿಪಡಿಸಲಾಗಿದೆ. ಕೆ.ಎಸ್.ಆರ್.ಟಿ.ಸಿ ಬಸ್ಸುಗಳ ಸಂಚಾರಕ್ಕೂ ಪ್ರತ್ಯೇಕ ಮಾರ್ಗಗಳನ್ನು ಸೂಚಿಸಲಾಗಿದ್ದು, ಪ್ರಯಾಣಿಕರು ಮತ್ತು ವಾಹನ ಸವಾರರು ಈ ಬಗ್ಗೆ ಮುನ್ನೆಚ್ಚರಿಕೆ ವಹಿಸಬೇಕೆಂದು ನಗರ ಪೊಲೀಸ್ ಆಯುಕ್ತರು ತಿಳಿಸಿದ್ದಾರೆ. ಅಲ್ಲದೆ, ಬೇಜೈ ಜಂಕ್ಷನ್‌ನಿಂದ ಪಿವಿಎಸ್ ಜಂಕ್ಷನ್ ವರೆಗೆ ಜೈಲು ರಸ್ತೆ ಸೇರಿದಂತೆ ಹಲವು ಪ್ರದೇಶಗಳಲ್ಲಿ ರಸ್ತೆಯ ಎರಡೂ ಬದಿಗಳಲ್ಲಿ ವಾಹನ ನಿಲುಗಡೆಯನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ. ಈ ಕಾಮಗಾರಿ ಪೂರ್ಣಗೊಳ್ಳುವವರೆಗೆ ಸಾರ್ವಜನಿಕರು ಸಹಕರಿಸಬೇಕೆಂದು ಪೊಲೀಸ್ ಇಲಾಖೆ ಮನವಿ ಮಾಡಿದೆ