ಮಂಗಳೂರು : ಸರಿ ಸುಮಾರು 650 ಮಂದಿ ಪ್ರವಾಸಿಗರನ್ನು ಹೊತ್ತ ಸೆವೆನ್ ಸೀಸ್ ವಾಯೇಜ‌ರ್ ಕ್ರೂಸ್ ಹಡಗು ಶುಕ್ರವಾರ ನವ ಮಂಗಳೂರು ಬಂದರಿಗೆ ಆಗಮಿಸಿತು. ಪ್ರಸಕ್ತ ಋತುವಿನ ಎರಡನೇ ಕ್ರೂಸ್ ಹಡಗು ಇದಾಗಿದ್ದು,ಕರಾವಳಿಯ ಶ್ರೀಮಂತ ಸಂಸ್ಕೃತಿ ಮತ್ತು ಪರಂಪರೆಯನ್ನು ಪ್ರತಿಬಿಂಬಿಸುವ ಸಾಂಪ್ರದಾಯಿಕ ಭಾರತೀಯ ಆತಿಥ್ಯದೊಂದಿಗೆ ಪ್ರಯಾಣಿಕರನ್ನು ಆತ್ಮೀಯವಾಗಿ ಸ್ವಾಗತಿಸಲಾಯಿತು. ನಂತರ ಪ್ರವಾಸಿಗರಿಗೆ ಕಾರ್ಕಳ ಗೋಮಟೇಶ್ವರ ಬಸದಿ, ಸಾವಿರ ಕಂಬದ ಬಸದಿ, ಸೋನ್ಸ್ ಫಾರ್ಮ್, ಕಲಭಾವಿ ಗೋಡಂಬಿ ಕಾರ್ಖಾನೆ, ಗೋಕರ್ಣನಾಥ ದೇವಸ್ಥಾನ ಮತ್ತು ಸ್ಥಳೀಯ ಮಾರುಕಟ್ಟೆಗೆ ಭೇಟಿ ನೀಡಲು ವ್ಯವಸ್ಥೆ ಮಾಡಲಾಯಿತು.

ಜಾಗತಿಕ ಕ್ರೂಸ್ ಪ್ರವಾಸೋದ್ಯಮಕ್ಕೆ ಒತ್ತು ನೀಡುವ ಉದ್ದೇಶದ ಹೆಸರಾಂತ ನಾರ್ವೇಜಿಯನ್ ಕ್ರೂಸ್ ಲೈನ್‌ನ ಭಾಗವಾಗಿರುವ ನೌಕೆಯು ನವ ಮಂಗಳೂರು ಬಂದರಿಗೆ ಬೆಳಗ್ಗೆ 6:30ಕ್ಕೆ ಆಗಮಿಸಿ ಸಂಜೆ 5:30 ಕ್ಕೆ ನಿರ್ಗಮಿಸಿತು. 650 ಪ್ರಯಾಣಿಕರು ಮತ್ತು 450 ಸಿಬ್ಬಂದಿ ಹಡಗಿನಲ್ಲಿದ್ದರು.

ಸೆವೆನ್ ಸೀಸ್ ವಾಯೇಜ‌ರ್ ಐಶ್ವರ್ಯ ಮತ್ತು ವಿಶ್ವ ದರ್ಜೆಯ ಪ್ರಯಾಣವನ್ನು ಒಳಗೊಂಡಿದೆ. 206.5 ಮೀಟರ್ ಉದ್ದದ ಕ್ರೂಸ್ ಹಡಗು, ಫುಜೈರಾದಿಂದ ಕೊಲಂಬೊಗೆ ಮುಂಬೈ, ಗೋವಾ, ನವ ಮಂಗಳೂರು ಮತ್ತು ಕೊಚ್ಚಿನ್ ಮೂಲಕ ತನ್ನ ಪ್ರಯಾಣದ ಭಾಗವಾಗಿ ಅರಬ್ಬಿ ಸಮುದ್ರವನ್ನು ನ್ಯಾವಿಗೇಟ್ ಮಾಡುತ್ತಿದೆ.