ಮಂಗಳೂರು : ರಾಷ್ಟ್ರೀಯ ತಂತ್ರಜ್ಞಾನ ಸಂಸ್ಥೆ ಕರ್ನಾಟಕ (ಎನ್ಐಟಿಕೆ), ಸುರತ್ಕಲ್ನ 24ನೇ ವಾರ್ಷಿಕ ಘಟಿಕೋತ್ಸವವು ಸಿಲ್ವರ್ ಜೂಬಿಲಿ ಸಭಾಂಗಣದಲ್ಲಿ ವಿಜೃಂಭಣೆಯಿಂದ ಜರುಗಿತು. ಎರಡು ಅಧಿವೇಶನಗಳಲ್ಲಿ ನಡೆದ ಈ ಸಮಾರಂಭದಲ್ಲಿ ಒಟ್ಟು 1,986 ಪದವಿಗಳನ್ನು ಪ್ರದಾನ ಮಾಡಲಾಯಿತು. ಇವುಗಳಲ್ಲಿ 967 ಬಿ.ಟೆಕ್., 680 ಎಂ.ಟೆಕ್., 12 ಎಂ.ಟೆಕ್. (ರಿಸರ್ಚ್), 66 ಎಂಸಿಎ, 74 ಎಂಬಿಎ, 68 ಎಂ.ಎಸ್ಸಿ. ಹಾಗೂ 119 ಪಿಎಚ್.ಡಿ. ಪದವಿಗಳು ಸೇರಿದ್ದವು.
ಇಂಡಿಯನ್ ನ್ಯಾಷನಲ್ ಅಕಾಡೆಮಿ ಆಫ್ ಎಂಜಿನಿಯರಿಂಗ್ (INAE) ಅಧ್ಯಕ್ಷ ಶ್ರೀ ಜೆ. ಡಿ. ಪಾಟೀಲ್ ಮುಖ್ಯ ಅತಿಥಿಯಾಗಿ ಭಾಗವಹಿಸಿದ್ದರೆ, ಎನ್ಐಟಿಕೆಯ ಆಡಳಿತ ಮಂಡಳಿ ಅಧ್ಯಕ್ಷ ಶ್ರೀ ಎಂ. ಎಂ. ಮುರುಗಪ್ಪನ್ ಸಮಾರಂಭದ ಅಧ್ಯಕ್ಷತೆ ವಹಿಸಿದ್ದರು ಮತ್ತು ಸಂಸ್ಥೆಯ ನಿರ್ದೇಶಕರಾದ ಪ್ರೊ. ಬಿ. ರವಿ ಉಪಸ್ಥಿತರಿದ್ದರು. ಸಮಾರಂಭದಲ್ಲಿ ಮಾತನಾಡಿದ ಆಡಳಿತ ಮಂಡಳಿ ಅಧ್ಯಕ್ಷ ಮುರುಗಪ್ಪನ್, ತೀರ್ಮಾನಶಕ್ತಿ, ನೈತಿಕತೆ ಮತ್ತು ಧೈರ್ಯದೊಂದಿಗೆ ಮುನ್ನಡೆಯುವಂತೆ ಹಾಗೂ ಭಾರತದ ಬೆಳವಣಿಗೆಗೆ ಯುವ ಪದವೀಧರರ ಶಕ್ತಿ ಅತ್ಯಗತ್ಯವೆಂದು ಕರೆ ನೀಡಿದರು. ಅಲ್ಲದೆ, ಕೃತಕ ಬುದ್ಧಿಮತ್ತೆ (AI) ಮಾನವನ ಮೌಲ್ಯಗಳು ಮತ್ತು ನಿರ್ಧಾರಕ ಶಕ್ತಿಯನ್ನು ಸಂಪೂರ್ಣವಾಗಿ ಬದಲಿಸಲು ಸಾಧ್ಯವಿಲ್ಲ ಎಂದು ಅವರು ಅಭಿಪ್ರಾಯಪಟ್ಟರು.
ಮುಖ್ಯ ಅತಿಥಿ ಜೆ. ಡಿ. ಪಾಟೀಲ್ ಮಾತನಾಡಿ, ನೈಜ ಜೀವನದ ಸಮಸ್ಯೆಗಳಿಗೆ ಯಾವುದೇ ಸಿದ್ಧ ಉತ್ತರಗಳ ಕೈಪಿಡಿ ಇರುವುದಿಲ್ಲ ಎಂದರು ಹಾಗೂ ಮುಂದಿನ ಎರಡು ದಶಕಗಳಲ್ಲಿ ಭಾರತದ ಆರ್ಥಿಕತೆಯ ಯಶಸ್ಸಿನಲ್ಲಿ ಇಂಜಿನಿಯರ್ಗಳ ಪಾತ್ರ ನಿರ್ಣಾಯಕ ಎಂದು ತಿಳಿಸಿದರು. ಶೈಕ್ಷಣಿಕ ಸಾಧನೆಗಾಗಿ 11 ಬಿ.ಟೆಕ್. ಹಾಗೂ 35 ಸ್ನಾತಕೋತ್ತರ ವಿದ್ಯಾರ್ಥಿಗಳು ಸೇರಿದಂತೆ ಒಟ್ಟು 46 ಪ್ರತಿಭಾವಂತ ವಿದ್ಯಾರ್ಥಿಗಳಿಗೆ ಚಿನ್ನದ ಪದಕ ಹಾಗೂ ಪ್ರಾಯೋಜಿತ ಪದಕಗಳನ್ನು ವಿತರಿಸಲಾಯಿತು. 2026-30ನೇ ಸಾಲಿನ ಮರು ವಿನ್ಯಾಸಗೊಳಿಸಿದ ಬಿ.ಟೆಕ್. ಪಠ್ಯಕ್ರಮ, 30 ಮಿಲಿಯನ್ ಲೀಟರ್ ಸಾಮರ್ಥ್ಯದ 'ನಿಟ್ಕೆರೆ' ಮಳೆನೀರು ಕೊಯ್ಲು ವ್ಯವಸ್ಥೆ ಮತ್ತು ವಾಯುಪಡೆಯ MiG-21 ಯುದ್ಧ ವಿಮಾನದ ಅನಾವರಣವು ಈ ವರ್ಷದ ಪ್ರಮುಖ ಮೈಲಿಗಲ್ಲುಗಳಾಗಿವೆ ಎಂದು ನಿರ್ದೇಶಕ ಪ್ರೊ. ಬಿ. ರವಿ ತಮ್ಮ ವರದಿಯಲ್ಲಿ ಮಂಡಿಸಿದರು.