ಜಾಹೀರಾತು
ಮಂಗಳೂರು : ಕಂಕನಾಡಿಯ ಫಾದರ್ ಮುಲ್ಲರ್ ಚಾರಿಟೇಬಲ್ ಇನ್‌ಸ್ಟಿಟ್ಯೂಷನ್ಸ್ (FMCI) ಘಟಕವಾದ ಫಾದರ್ ಮುಲ್ಲರ್ ವೈದ್ಯಕೀಯ ಕಾಲೇಜು ಆಸ್ಪತ್ರೆಯ (FMMCH) ನರಶಸ್ತ್ರಚಿಕಿತ್ಸಾ ವಿಭಾಗಕ್ಕೆ ಹೊಸದಾಗಿ ಸೇರ್ಪಡೆಗೊಂಡಿರುವ ಅತ್ಯಾಧುನಿಕ 'ಜೈಸ್ ಪೆಂಟೆರೋ 800 ಎಸ್' (ZEISS PENTERO 800 S) ಮೈಕ್ರೋಸ್ಕೋಪ್ ಮತ್ತು 'ಜಯೋನ್ ಸ್ಪೈನ್ ಎಂಡೋಸ್ಕೋಪ್ಸ್' (Jayon Spine Endoscopes) ಉಪಕರಣಗಳ ಆಶೀರ್ವಚನ ಸಮಾರಂಭ ಶನಿವಾರ ನೆರವೇರಿತು. ಆಸ್ಪತ್ರೆಯ ಜನರಲ್ ವಾರ್ಡ್ ಬ್ಲಾಕ್‌ನ ಮೈನಸ್ 2ರಲ್ಲಿರುವ ಮುಖ್ಯ ಶಸ್ತ್ರಚಿಕಿತ್ಸಾ ಕೊಠಡಿ ಸಂಕೀರ್ಣದಲ್ಲಿ ಈ ಕಾರ್ಯಕ್ರಮ ನಡೆಯಿತು.
ಎಫ್‌ಎಂಸಿಐ (FMCI) ನಿರ್ದೇಶಕರಾದ ವಂ| ಫಾ| ಫಾಸ್ಟಿನ್ ಲೂಕಾಸ್ ಲೋಬೋ ಅವರು ನೂತನ ಉಪಕರಣಗಳನ್ನು ಆಶೀರ್ವದಿಸಿದರು. ಈ ಸಂದರ್ಭದಲ್ಲಿ ಮಾತನಾಡಿದ ಅವರು, ಅತ್ಯಾಧುನಿಕ ವೈದ್ಯಕೀಯ ತಂತ್ರಜ್ಞಾನಗಳ ಮೇಲಿನ ಹೂಡಿಕೆಯು ಕೇವಲ ವಾಣಿಜ್ಯ ದೃಷ್ಟಿಕೋನವನ್ನು ಹೊಂದಿಲ್ಲ; ಬದಲಾಗಿ ಸಂಕೀರ್ಣ ಶಸ್ತ್ರಚಿಕಿತ್ಸೆಗಳನ್ನು ವೈದ್ಯರು ಸುಲಭವಾಗಿ ನೆರವೇರಿಸಲು, ರೋಗಿಗಳು ಶೀಘ್ರವಾಗಿ ಚೇತರಿಸಿಕೊಳ್ಳಲು ಮತ್ತು ಉನ್ನತ ಗುಣಮಟ್ಟದ ಆರೋಗ್ಯ ಸೇವೆಯನ್ನು ಒದಗಿಸುವ ಬದ್ಧತೆಯ ಪ್ರತೀಕವಾಗಿದೆ ಎಂದರು. ಇದೇ ವೇಳೆ ಅವರು ನರಶಸ್ತ್ರಚಿಕಿತ್ಸಾ ತಂಡಕ್ಕೆ ಶುಭ ಹಾರೈಸಿ, ರೋಗಿಗಳ ಶೀಘ್ರ ಗುಣಮುಖಕ್ಕಾಗಿ ಪ್ರಾರ್ಥಿಸಿದರು.
ಆಸ್ಪತ್ರೆಯ ಆಡಳಿತಾಧಿಕಾರಿ ವಂ| ಫಾ| ಜಾರ್ಜ್ ಜೆ. ಸಿಕ್ವೇರಾ ಮಾತನಾಡಿ, ವಿಭಾಗದ ಪ್ರಸ್ತಾವನೆಗೆ ಸಕಾಲದಲ್ಲಿ ಅನುಮೋದನೆ ನೀಡಿದ ನಿರ್ದೇಶಕರ ನಿರ್ಧಾರವನ್ನು ಶ್ಲಾಘಿಸಿದರು ಮತ್ತು ಆಸ್ಪತ್ರೆಯ ಸೇವೆಗಳನ್ನು ಬಲಪಡಿಸಲು ಆಡಳಿತ ಮಂಡಳಿ ಸದಾ ಬದ್ಧವಾಗಿದೆ ಎಂದು ಪುನರುಚ್ಚರಿಸಿದರು.
ನರಶಸ್ತ್ರಚಿಕಿತ್ಸಾ ವಿಭಾಗದ ಮುಖ್ಯಸ್ಥ ಡಾ. ಜಿಯೋವರ್ ಲೋಬೋ ಸ್ವಾಗತಿಸಿ, ನೂತನ ಉಪಕರಣಗಳ ಮಹತ್ವವನ್ನು ವಿವರಿಸಿದರು. ರೋಗಿಗಳ ಆರ್ಥಿಕ ಸ್ಥಿತಿಯನ್ನು ಲೆಕ್ಕಿಸದೆ, ಅತ್ಯಂತ ಕ್ಲಿಷ್ಟಕರ ಹಾಗೂ ಸೂಕ್ಷ್ಮ ನರಶಸ್ತ್ರಚಿಕಿತ್ಸೆಗಳನ್ನು ಸಂಸ್ಥೆಯಲ್ಲಿ ಯಶಸ್ವಿಯಾಗಿ ನಡೆಸಲಾಗುತ್ತಿದೆ. ಈ ಹೊಸ ತಂತ್ರಜ್ಞಾನಗಳ ಸೇರ್ಪಡೆಯಿಂದ ಶಸ್ತ್ರಚಿಕಿತ್ಸೆಯ ನಿಖರತೆ ಮತ್ತು ವಿಭಾಗದ ಸಾಮರ್ಥ್ಯ ಮತ್ತಷ್ಟು ಹೆಚ್ಚಾಗಲಿದೆ ಎಂದು ಅವರು ಅಭಿಪ್ರಾಯಪಟ್ಟರು.
'ಜೈಸ್ ಪೆಂಟೆರೋ 800 ಎಸ್' ಮೈಕ್ರೋಸ್ಕೋಪ್ ಸೂಕ್ಷ್ಮ ನರಮಂಡಲ ಮತ್ತು ರಕ್ತನಾಳಗಳ ಹೈ-ಡೆಫಿನಿಷನ್ ದೃಶ್ಯಾವಳಿ ಹಾಗೂ ಉತ್ತಮ ಬೆಳಕಿನ ವ್ಯವಸ್ಥೆಯನ್ನು ಒದಗಿಸುವ ಮೂಲಕ ಸಂಕೀರ್ಣ ಮೆದುಳಿನ ಶಸ್ತ್ರಚಿಕಿತ್ಸೆಗಳಲ್ಲಿ ಅತ್ಯಂತ ನಿಖರತೆಗೆ ನೆರವಾಗುತ್ತದೆ. ಇನ್ನು 'ಜಯೋನ್ ಸ್ಪೈನ್ ಎಂಡೋಸ್ಕೋಪ್ಸ್' ವ್ಯವಸ್ಥೆಯು ಸಣ್ಣ ಗಾಯದ ಮೂಲಕ ಕನಿಷ್ಠ ಆಕ್ರಮಣಕಾರಿ (Minimally Invasive) ಬೆನ್ನುಮೂಳೆಯ ಶಸ್ತ್ರಚಿಕಿತ್ಸೆ ನಡೆಸಲು ಸಹಕಾರಿಯಾಗಿದ್ದು, ಇದರಿಂದ ರಕ್ತಸ್ರಾವ, ನೋವು ಕಡಿಮೆಯಾಗಿ ರೋಗಿಗಳು ಬೇಗನೆ ಆಸ್ಪತ್ರೆಯಿಂದ ಬಿಡುಗಡೆಯಾಗಲು ಸಾಧ್ಯವಾಗುತ್ತದೆ.
ಸಮಾರಂಭದಲ್ಲಿ ಫಾದರ್ ಮುಲ್ಲರ್ ವೈದ್ಯಕೀಯ ಕಾಲೇಜಿನ ಆಡಳಿತಾಧಿಕಾರಿ ವಂ| ಡಾ| ಮೈಕೆಲ್ ಸಂತುಮಾಯರ್, ಆಡಳಿತ ಸಮಿತಿಯ ಸದಸ್ಯರು ಹಾಗೂ ಶಸ್ತ್ರಚಿಕಿತ್ಸಾ ಕೊಠಡಿಯ ಸಿಬ್ಬಂದಿ ಉಪಸ್ಥಿತರಿದ್ದರು.
