ಮೂಡುಬಿದಿರೆ: ಗ್ರಾಹಕ ಸೇವೆಯಲ್ಲಿ 31 ವರ್ಷಗಳನ್ನು ಪೂರೈಸಿರುವ MCC ಬ್ಯಾಂಕಿನ ಮೂಡುಬಿದಿರೆ ಶಾಖೆಯು ಆಧುನಿಕ ಸೌಲಭ್ಯಗಳೊಂದಿಗೆ ಇನ್ಸ್‌ಪೆಕ್ಷನ್ ಬಂಗ್ಲೋ ಸಮೀಪದ ಪತ್ರಿಕಾ ಭವನದ ನೆಲಮಹಡಿಯಲ್ಲಿರುವ ನೂತನ ಆವರಣಕ್ಕೆ ಮಂಗಳವಾರ (ನವೆಂಬರ್ 10) ಸ್ಥಳಾಂತರಗೊಂಡಿತು.

ಮೂಡುಬಿದಿರೆ ಕಾರ್ಪಸ್ ಕ್ರಿಸ್ಟಿ ಚರ್ಚ್‌ನ ವಲಯ ಪ್ರಧಾನ ಧರ್ಮಗುರು ವಂ. ಫಾ. ಓನಿಲ್ ಡಿಸೋಜಾ ನೂತನ ಆವರಣವನ್ನು ಆಶೀರ್ವದಿಸಿದರು. ಅಲಂಗಾರು ಅವರ್ ಲೇಡಿ ಆಫ್ ಹೋಲಿ ರೋಸರಿ ಚರ್ಚ್‌ನ ಧರ್ಮಗುರು ವಂ. ಫಾ. ಮೆಲ್ವಿನ್ ನೊರೊನ್ಹಾ ಸುರಕ್ಷಿತ ಠೇವಣಿ ಲಾಕರ್ ಸೌಲಭ್ಯವನ್ನು ಉದ್ಘಾಟಿಸಿದರು.

ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ MCC ಬ್ಯಾಂಕಿನ ಅಧ್ಯಕ್ಷ ಸಹಕಾರ ರತ್ನ ಅನಿಲ್ ಲೋಬೊ ಮಾತನಾಡಿ, ಮೂಡುಬಿದಿರೆ ಶಾಖೆಯ ವ್ಯವಹಾರವು ₹15 ಕೋಟಿಯಿಂದ ₹65 ಕೋಟಿಗೆ (₹40 ಕೋಟಿ ಠೇವಣಿ ಹಾಗೂ ₹25 ಕೋಟಿ ಮುಂಗಡ) ಏರಿಕೆಯಾಗಿದೆ ಎಂದು ತಿಳಿಸಿದರು. ಕರ್ನಾಟಕದ 262 ನಗರ ಸಹಕಾರಿ ಬ್ಯಾಂಕುಗಳ ಪೈಕಿ ವಿಶೇಷ NRI ಬ್ಯಾಂಕಿಂಗ್ ಸೇವೆ ಒದಗಿಸುತ್ತಿರುವ ಏಕೈಕ ಬ್ಯಾಂಕ್ ಇದಾಗಿದೆ ಎಂದ ಅವರು, 2027ರ ಜನವರಿ 17ರಂದು ಪಡಿಲ್‌ನಲ್ಲಿ 24ನೇ ಶಾಖೆ ಹಾಗೂ ಮಾರ್ಚ್ 14ರಂದು ಕದ್ರಿ-ಮಲ್ಲಿಕಟ್ಟದಲ್ಲಿ 25ನೇ ಶಾಖೆಯನ್ನು ಆರಂಭಿಸಲಾಗುವುದು ಎಂದು ಘೋಷಿಸಿದರು.

ಮುಖ್ಯ ಅತಿಥಿ ವಂ. ಫಾ. ಮೆಲ್ವಿನ್ ನೊರೊನ್ಹಾ, ಗೌರವ ಅತಿಥಿಗಳಾದ ಮಾಜಿ ಸಚಿವ ಅಭಯಚಂದ್ರ ಜೈನ್, ವಂ. ಫಾ. ವಿನ್ಸೆಂಟ್ ಡಿಸೋಜಾ, ನ್ಯಾಯವಾದಿ ಪ್ರವೀಣ್ ಎಸ್. ಲೋಬೊ, ಉದ್ಯಮಿ ರೋಹನ್ ರಾಜೇಶ್ ಮೆಂಡಿಸ್, ಮೂಡುಬಿದಿರೆ ಟೌನ್ ಜುಮ್ಮಾ ಮಸೀದಿ ಅಧ್ಯಕ್ಷ ಎಂ. ಅಬ್ದುಲ್ ರಹಿಮಾನ್ ಹಾಗೂ ಪ್ರೆಸ್ ಕ್ಲಬ್ ಅಧ್ಯಕ್ಷ ಸೀತಾರಾಮ ಆಚಾರ್ಯ ಶಾಖೆಯ ಪ್ರಗತಿಯನ್ನು ಶ್ಲಾಘಿಸಿದರು.

ಸಾಮಾಜಿಕ ಹೊಣೆಗಾರಿಕೆಯಡಿ ಅಲಂಗಾರಿನ 'ಹೆಲ್ಪರ್ಸ್ ಆಫ್ ಮೌಂಟ್ ರೋಸರಿ' ಸಂಸ್ಥೆಗೆ ₹1 ಲಕ್ಷದ ಚೆಕ್ ಹಸ್ತಾಂತರಿಸಲಾಯಿತು. SSLC ಮತ್ತು PUC ಪರೀಕ್ಷೆಗಳಲ್ಲಿ ಸಾಧನೆ ಮಾಡಿದ ಗ್ರಾಹಕರ ಮಕ್ಕಳನ್ನು ಹಾಗೂ ವಿವಿಧ ಕ್ಷೇತ್ರಗಳ ಸಾಧಕರಾದ ಅಸ್ಲಿನ್ ಮರೀನಾ ರೊಡ್ರಿಗಸ್, ಟಾರ್ಶಿಸ್ ಡಿಸಿಲ್ವಾ, ಪೀಟರ್ ಫೆಲಿಕ್ಸ್ ಡಿಸೋಜಾ, ಅನಿಲ್ ರೆಬೆನ್ ಮೆಂಡೊನ್ಸಾ ಮತ್ತು ಜಾಯ್ಲಿನ್ ಮುರಲ್ ಲೋಬೊ ಅವರನ್ನು ಸನ್ಮಾನಿಸಲಾಯಿತು. ಉಪಾಧ್ಯಕ್ಷ ಜೆರಾಲ್ಡ್ ಜೂಡ್ ಡಿಸಿಲ್ವಾ, ಪ್ರಧಾನ ವ್ಯವಸ್ಥಾಪಕ ಸುನಿಲ್ ಮೆನೆಜಸ್ ಹಾಗೂ ನಿರ್ದೇಶಕರು ಉಪಸ್ಥಿತರಿದ್ದರು. ಶಾಖಾ ಬೆಂಬಲ ನಿರ್ದೇಶಕ ಆಂಡ್ರ್ಯೂ ಡಿಸೋಜಾ ಸ್ವಾಗತಿಸಿ, ಶಿರ್ತಾಡಿಯ ಜೇಸನ್ ಪಿರೇರಾ ಕಾರ್ಯಕ್ರಮ ನಿರೂಪಿಸಿದರು.