ಜಾಹೀರಾತು
ಮಂಗಳೂರು: ಇಲ್ಲಿನ ಫಾದರ್ ಮುಲ್ಲರ್ ವೈದ್ಯಕೀಯ ಕಾಲೇಜು ಆಸ್ಪತ್ರೆಯ ಹೃದ್ರೋಗ ವಿಭಾಗದ ತಂಡವು, ಮುಖ್ಯ ಇಂಟರ್ವೆನ್ಷನಲ್ ಕಾರ್ಡಿಯಾಲಜಿಸ್ಟ್ ಡಾ. ಎಚ್. ಪ್ರಭಾಕರ್ ನೇತೃತ್ವದಲ್ಲಿ ವೃದ್ಧ ಮಹಿಳೆಯೊಬ್ಬರಿಗೆ ಸಂಕೀರ್ಣ ಕ್ಯಾಥೆಟರ್ ಆಧಾರಿತ ಹೃದಯ ಕವಾಟ (ವಾಲ್ವ್) ಬದಲಾವಣೆ ಚಿಕಿತ್ಸೆಯನ್ನು (TAVR) ಯಶಸ್ವಿಯಾಗಿ ನೆರವೇರಿಸಿದೆ. ಒಂದು ವರ್ಷದ ಹಿಂದೆ ಶಸ್ತ್ರಚಿಕಿತ್ಸೆಯ ಮೂಲಕ ಹೃದಯ ಕವಾಟ ಬದಲಾವಣೆಗೆ ಒಳಗಾಗಿದ್ದ ಈ ಮಹಿಳೆಗೆ ಅಕ್ಟೋಬರ್ ನಾಲ್ಕನೇ ವಾರದಲ್ಲಿ ತೀವ್ರ ಉಸಿರಾಟದ ತೊಂದರೆ ಹಾಗೂ ಕಾಲುಗಳಲ್ಲಿ ಊತ ಕಾಣಿಸಿಕೊಂಡಿತ್ತು. ತಪಾಸಣೆ ನಡೆಸಿದಾಗ ಈ ಹಿಂದೆ ಅಳವಡಿಸಲಾಗಿದ್ದ ಕೃತಕ ಕವಾಟವು ತೀವ್ರವಾಗಿ ನಿಷ್ಕ್ರಿಯಗೊಂಡಿದ್ದು, ಹೃದಯ ವೈಫಲ್ಯದ ಲಕ್ಷಣಗಳು ಕಂಡುಬಂದಿದ್ದವು.
ಇಂತಹ ಪ್ರಕರಣಗಳಲ್ಲಿ ಮತ್ತೊಮ್ಮೆ ತೆರೆದ ಹೃದಯ ಶಸ್ತ್ರಚಿಕಿತ್ಸೆ ನಡೆಸುವುದು ವೃದ್ಧ ರೋಗಿಗಳಿಗೆ ಹೆಚ್ಚಿನ ಅಪಾಯಕಾರಿಯಾಗಿರುತ್ತದೆ ಎಂದು ಡಾ. ಎಚ್. ಪ್ರಭಾಕರ್ ವಿವರಿಸಿದ್ದಾರೆ. ಹೀಗಾಗಿ, ಕಡಿಮೆ ಅಪಾಯಕಾರಿಯಾದ ಹಾಗೂ ಶಸ್ತ್ರಚಿಕಿತ್ಸೆಯಿಲ್ಲದ 'ಟ್ರಾನ್ಸ್‌ಕ್ಯಾಥೆಟರ್ ಅಯೋರ್ಟಿಕ್ ವಾಲ್ವ್ ರಿಪ್ಲೇಸ್‌ಮೆಂಟ್' (TAVR) ವಿಧಾನವನ್ನು ಆಯ್ಕೆ ಮಾಡಿಕೊಳ್ಳಲಾಯಿತು. ಈ ಹಿಂದೆ ಅಳವಡಿಸಿದ್ದ ಕವಾಟದ ಒಳಗೇ ಹೊಸ ಕವಾಟವನ್ನು ಅಳವಡಿಸುವುದು ಅತ್ಯಂತ ಸವಾಲಿನ ಕೆಲಸವಾಗಿದ್ದು, ಸುದೀರ್ಘ ಪೂರ್ವಭಾವಿ ತಪಾಸಣೆ ಹಾಗೂ ಯೋಜನೆಯೊಂದಿಗೆ ತಂಡವು ಈ ಚಿಕಿತ್ಸೆಯನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದೆ.
ಚಿಕಿತ್ಸೆಯ ಬಳಿಕ ರೋಗಿಯ ಆರೋಗ್ಯದಲ್ಲಿ ಗಮನಾರ್ಹ ಚೇತರಿಕೆ ಕಂಡುಬಂದಿದ್ದು, 24 ಗಂಟೆಗಳ ಒಳಗಾಗಿ ಅವರು ನಡೆದಾಡಲು ಆರಂಭಿಸಿದರು. ಐದು ದಿನಗಳ ನಂತರ ಅವರನ್ನು ಆಸ್ಪತ್ರೆಯಿಂದ ಬಿಡುಗಡೆ ಮಾಡಲಾಗಿದೆ. ಈ ಯಶಸ್ವಿ ಚಿಕಿತ್ಸೆಯಲ್ಲಿ ಡಾ. ಎಚ್. ಪ್ರಭಾಕರ್ ಅವರೊಂದಿಗೆ ಹೃದ್ರೋಗ ವಿಭಾಗದ ಮುಖ್ಯಸ್ಥ ಡಾ. ಪ್ರದೀಪ್ ಪಿರೇರಾ, ಹೃದಯ ಶಸ್ತ್ರಚಿಕಿತ್ಸಕ ಡಾ. ಆನಂದ್ ಕೆ.ಟಿ., ಹೃದಯ ಅರಿವಳಿಕೆ ತಜ್ಞೆ ಡಾ. ಚೇತನಾ ಆನಂದ್, ಹೃದ್ರೋಗ ತಜ್ಞರಾದ ಡಾ. ಜೋಸ್ಟೋಲ್ ಪಿಂಟೋ ಹಾಗೂ ಡಾ. ಅಶೋಕ ಸೇರಿದಂತೆ ಹೃದ್ರೋಗ ಆರೈಕೆ ತಂಡವು ಭಾಗವಹಿಸಿತ್ತು.
ಆಸ್ಪತ್ರೆಯಲ್ಲಿರುವ ಅಮೆರಿಕದ ಬೋಸ್ಟನ್ ಸೈಂಟಿಫಿಕ್‌ನ 'ಅವಿಗೊ' (AVVIGO) ಇಂಟ್ರಾವಾಸ್ಕುಲರ್ ಇಮೇಜಿಂಗ್ ಸಿಸ್ಟಮ್, 'ರೋಟಾಪ್ರೊ' (ROTAPRO) ಅಥೆರೆಕ್ಟಮಿ ಸಿಸ್ಟಮ್ ಹಾಗೂ ಜಪಾನ್‌ನ ಶಿಮಡ್ಜು (Shimadzu) ಸಂಸ್ಥೆಯ 'ಟ್ರಿನಿಯಾಸ್' (Trinias) ಕ್ಯಾಥ್ ಲ್ಯಾಬ್‌ನಂತಹ ಅತ್ಯಾಧುನಿಕ ತಂತ್ರಜ್ಞಾನಗಳು ಇಂತಹ ಸಂಕೀರ್ಣ ಚಿಕಿತ್ಸೆಗಳಿಗೆ ಸಹಕಾರಿಯಾಗಿವೆ ಎಂದು ಡಾ. ಪ್ರಭಾಕರ್ ತಿಳಿಸಿದ್ದಾರೆ. ಸಂಕೀರ್ಣ ಹೃದ್ರೋಗ ಚಿಕಿತ್ಸೆಯನ್ನು ಯಶಸ್ವಿಯಾಗಿ ನಿರ್ವಹಿಸಿದ ಹೃದ್ರೋಗ ವಿಭಾಗ ಹಾಗೂ ಸಹಾಯಕ ಸಿಬ್ಬಂದಿಯ ತಂಡದ ಕಾರ್ಯವನ್ನು ಫಾದರ್ ಮುಲ್ಲರ್ ವೈದ್ಯಕೀಯ ಕಾಲೇಜು ಆಸ್ಪತ್ರೆಯ ನಿರ್ದೇಶಕ ರೆ. ಫಾ. ಫಾಸ್ಟಿನ್ ಲೂಕಾಸ್ ಲೋಬೊ ಅಭಿನಂದಿಸಿದ್ದಾರೆ.
