ಮಂಗಳೂರು : ಮಂಗಳೂರಿನ ತಲಪಾಡಿ ಸಮೀಪದ ಒಲವಿನ ಹಳ್ಳಿ ಪುನರ್ವಸತಿ ಮತ್ತು ಸಮುದಾಯ ಅಭಿವೃದ್ಧಿ ಕೇಂದ್ರದ ಸುವರ್ಣ ಮಹೋತ್ಸವದ ಅಂಗವಾಗಿ 75 ನಿರ್ಗತಿಕ ಮಹಿಳೆಯರಿಗೆ ಆಶ್ರಯ ಕಲ್ಪಿಸುವ ನೂತನ ಕಟ್ಟಡವನ್ನು ಉದ್ಘಾಟಿಸಲಾಯಿತು. ಈ ಹಿಂದೆ ಶಿಥಿಲಗೊಂಡಿದ್ದ ಮೂರು ಹೆಂಚಿನ ಮನೆಗಳಲ್ಲಿ ವಾಸಿಸುತ್ತಿದ್ದ ಮಹಿಳೆಯರಿಗೆ ಈ ನೂತನ ಕಟ್ಟಡವು ಸುರಕ್ಷಿತ, ವಿಶಾಲವಾದ ಕೊಠಡಿಗಳು, ಪ್ರತ್ಯೇಕ ಸ್ನಾನಗೃಹಗಳು ಹಾಗೂ ವೈದ್ಯರು, ದಾದಿಯರು ಮತ್ತು ಭೌತಚಿಕಿತ್ಸೆಯಂತಹ ಆಧುನಿಕ ಸೌಲಭ್ಯಗಳನ್ನು ಒದಗಿಸಲಿದೆ.

ನೂತನ ಕಟ್ಟಡವನ್ನು ಸಿಸ್ಟರ್ ಲೂಯಿಸಾ ಬೊನ್ಫೋರ್ಟೆ ಉದ್ಘಾಟಿಸಿದ್ದು, ಮಂಗಳೂರು ಧರ್ಮಪ್ರಾಂತ್ಯದ ಬಿಷಪ್ ಪೀಟರ್ ಪೌಲ್ ಸಲ್ದಾನ್ಹಾ ಅವರು ಆಶೀರ್ವಚನ ನೆರವೇರಿಸಿದರು. ಸಂಸ್ಥೆಯ ಸಂಸ್ಥಾಪಕಿ ಸಿಸ್ಟರ್ ಅಮೇಲಿಯಾ ಸಿಮೊಲಿನೊ ಅವರ ಸ್ಮರಣಾರ್ಥ ನಿರ್ಮಿಸಲಾದ ವಸ್ತುಸಂಗ್ರಹಾಲಯ ಹಾಗೂ ಕಟ್ಟಡದ ನೆಲಮಹಡಿಯನ್ನು ಇಟಲಿಯಿಂದ ಆಗಮಿಸಿದ್ದ ಅವರ ಸೋದರಸಂಬಂಧಿಗಳಾದ ಅಂಟೋನಿಯೆಟ್ಟಾ ಮತ್ತು ಎಲಿಜಬೆತಾ ಸಿಮೊಲಿನೊ ಅವರು ಉದ್ಘಾಟಿಸಿದರು. ಕಾರ್ಯಕ್ರಮದಲ್ಲಿ ಪ್ರಮುಖ ಆರ್ಥಿಕ ನೆರವು ನೀಡಿದ ಉದ್ಯಮಿ ಹಾಗೂ ಸಮಾಜಸೇವಕ ಮೈಕೆಲ್ ಡಿಸೋಜ ಮತ್ತು ಅವರ ಕುಟುಂಬದವರು ಉಪಸ್ಥಿತರಿದ್ದರು.

1974ರಲ್ಲಿ ಸಿಸ್ಟರ್ ಅಮೇಲಿಯಾ ಸಿಮೊಲಿನೊ ಅವರಿಂದ ಪ್ರಾರಂಭಗೊಂಡ ಈ ಸಂಸ್ಥೆಯು ಆರಂಭದಲ್ಲಿ ಕುಷ್ಠರೋಗ ಹಾಗೂ ಕ್ಷಯರೋಗಿಗಳಿಗೆ ಪುನರ್ವಸತಿ ನೀಡುತ್ತಿತ್ತು. ಪ್ರಸ್ತುತ ಸಿಸ್ಟರ್ಸ್ ಆಫ್ ಚಾರಿಟಿ ಸಂಸ್ಥೆಯ ಆಡಳಿತದಲ್ಲಿ ಅನಾಥ ವೃದ್ಧರು ಹಾಗೂ ಮಾನಸಿಕ ಅಸ್ವಸ್ಥತೆ ಹೊಂದಿರುವ ನಿರ್ಗತಿಕರಿಗೆ ಐದು ದಶಕಗಳಿಂದ ಸೇವೆ ಸಲ್ಲಿಸುತ್ತಿದ್ದು, 2024ರ ದಕ್ಷಿಣ ಕನ್ನಡ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿಗೆ ಭಾಜನವಾಗಿದೆ. ಸಮಾರಂಭದಲ್ಲಿ ಸಂಸ್ಥೆಗೆ ಶ್ರಮಿಸಿದ ಮಾಜಿ ಆಡಳಿತಾಧಿಕಾರಿಗಳನ್ನು ಸನ್ಮಾನಿಸಲಾಯಿತು ಹಾಗೂ ಯೆನೆಪೋಯ ವಿವಿಯ ಪ್ರೊ ಚಾನ್ಸಲರ್ ಡಾ. ಎಂ. ವಿಜಯಕುಮಾರ್ ಅವರು ಸಂಸ್ಥೆಯ ಸೇವೆಯನ್ನು ಮುಂದುವರಿಸಲು ಸಾರ್ವಜನಿಕರಲ್ಲಿ ನೆರವಿನ ಕರೆ ನೀಡಿದರು.