ಮಂಗಳೂರು: ಕನ್ನಡಾಭಿಮಾನವು ಇತರ ಭಾಷಿಕರನ್ನು ದೂರವಿಡುವ ಶಕ್ತಿಯಾಗದೆ, ಎಲ್ಲರನ್ನೂ ಪ್ರೀತಿ ಹಾಗೂ ವಿಶ್ವಾಸದಿಂದ ಬೆಸೆಯುವ ಸೇತುವೆಯಾಗಬೇಕು ಎಂದು ದಕ್ಷಿಣ ಕನ್ನಡ ಜಿಲ್ಲಾ ಉಸ್ತುವಾರಿ ಸಚಿವ ಯು.ಟಿ. ಖಾದರ್ ಅಭಿಪ್ರಾಯಪಟ್ಟಿದ್ದಾರೆ. ನಗರದ ನೆಹರು ಮೈದಾನದಲ್ಲಿ ಜರುಗಿದ 71ನೇ ಕನ್ನಡ ರಾಜ್ಯೋತ್ಸವ ಸಮಾರಂಭದ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.

ಕನ್ನಡವೆಂದರೆ ಕೇವಲ ಒಂದು ಭಾಷೆಯ ಹೆಸರಲ್ಲ, ಅದೊಂದು ಮಂತ್ರ ಮತ್ತು ಮಹಾಶಕ್ತಿ ಎಂದ ಅವರು, ಈ ಮಣ್ಣಿನ ಕಂಪು ಮಾತ್ರವಲ್ಲದೆ ಬದುಕಿನ ಪ್ರತಿ ಹೆಜ್ಜೆಯಲ್ಲೂ ಬೆಸೆದುಕೊಂಡಿರುವ ಆತ್ಮೀಯತೆಯ ನಂಟು ಕನ್ನಡವಾಗಿದೆ ಎಂದರು. ಕಾವೇರಿಯ ನಿರಂತರ ಹರಿವು, ಸಹ್ಯಾದ್ರಿಯ ಎತ್ತರದ ಗರಿಮೆ ಹಾಗೂ ಕರಾವಳಿಯ ಕಡಲಿನ ಅಲೆಗಳ ಸಂವಾದವೇ ಕನ್ನಡವಾಗಿದ್ದು, ಇದು ಗತಕಾಲದ ಇತಿಹಾಸದ ವೈಭವವಷ್ಟೇ ಅಲ್ಲದೆ ವರ್ತಮಾನದ ಆತ್ಮವಿಶ್ವಾಸ ಹಾಗೂ ನಮ್ಮೆಲ್ಲರ ಭವಿಷ್ಯದ ಹೊಣೆಗಾರಿಕೆಯೂ ಹೌದು ಎಂದು ತಿಳಿಸಿದರು.

ಪಂಪನ ಕಾವ್ಯದ ವೈಭವ, ಬಸವಣ್ಣನ ವಚನದ ಸಮಾನತೆಯ ಕ್ರಾಂತಿ, ಅಕ್ಕಮಹಾದೇವಿಯ ಆತ್ಮಜ್ಞಾನದ ಅರಿವು, ಕನಕದಾಸರ ಭಕ್ತಿಯ ಮಾಧುರ್ಯ ಮತ್ತು ಕುವೆಂಪು ಅವರ ವಿಶ್ವಮಾನವತೆಯ ಮಹಾಸಂದೇಶಗಳು ಮನುಷ್ಯನನ್ನು ಜಾತಿ, ಮತ, ವರ್ಗ ಹಾಗೂ ಲಿಂಗ ಮುಂತಾದ ಸಂಕುಚಿತ ಗಡಿಗಳನ್ನು ಮೀರಿ ವಿಶಾಲ ಮಾನವೀಯತೆಯ ನೆಲೆಗೆ ಕೊಂಡೊಯ್ಯುತ್ತವೆ ಎಂದು ಸಚಿವರು ಬಣ್ಣಿಸಿದರು. ಕನ್ನಡದ ಮಹಾನ್ ಪರಂಪರೆಯು ಭಾಷೆಯನ್ನು ಕೇವಲ ಅಭಿವ್ಯಕ್ತಿಯ ಸಾಧನವಾಗಿ ಉಳಿಸದೆ, ಅನ್ಯಾಯವನ್ನು ಪ್ರಶ್ನಿಸುವ, ಸಾಮಾಜಿಕ ಪರಿವರ್ತನೆಗೆ ಪ್ರೇರಣೆ ನೀಡುವ ಮತ್ತು ಮಾನವ ಪ್ರಜ್ಞೆಯನ್ನು ವಿಸ್ತರಿಸುವ ಶಕ್ತಿಯನ್ನಾಗಿ ರೂಪಿಸಿದೆ ಎಂದರು.

ಪ್ರಪಂಚದ ಸಾವಿರಾರು ಭಾಷೆಗಳ ನಡುವೆ ಎರಡು ಸಾವಿರ ವರ್ಷಗಳಿಗೂ ಮೀರಿದ ಇತಿಹಾಸ ಹಾಗೂ ಶ್ರೀಮಂತ ಸಾಹಿತ್ಯಿಕ ಪರಂಪರೆಯನ್ನು ಹೊಂದಿರುವ ಕನ್ನಡವು, ಭಾರತ ಸರ್ಕಾರದ ಶಾಸ್ತ್ರೀಯ ಭಾಷೆಯ ಗೌರವಕ್ಕೆ ಪಾತ್ರವಾಗಿರುವ ಕೆಲವೇ ಕೆಲವು ಭಾಷೆಗಳಲ್ಲಿ ಒಂದಾಗಿದೆ. ಕನ್ನಡಿಗರು ವಿಶ್ವದ ಯಾವುದೇ ದೇಶದಲ್ಲಿ ನೆಲೆಸಿದ್ದರೂ ತಮ್ಮ ಪ್ರತಿಭೆ, ಪರಿಶ್ರಮ, ಸಾಧನೆ ಹಾಗೂ ಸೃಜನಶೀಲತೆಯ ಮೂಲಕ ಕನ್ನಡ ನಾಡಿನ ಕೀರ್ತಿಯನ್ನು ಜಾಗತಿಕ ವೇದಿಕೆಯಲ್ಲಿ ಎತ್ತಿಹಿಡಿಯುತ್ತಿದ್ದಾರೆ ಎಂದು ಪ್ರಶಂಸಿಸಿದರು.

ಕುವೆಂಪು ಅವರ "ಎಲ್ಲಾದರು ಇರು, ಎಂತಾದರು ಇರು, ಎಂದೆಂದಿಗೂ ನೀ ಕನ್ನಡವಾಗಿರು" ನುಡಿಯಂತೆ ಕರ್ನಾಟಕದಿಂದ ದೂರ ಹೋದರೂ ಕನ್ನಡದಿಂದ ದೂರ ಹೋಗಬಾರದು ಎಂದು ತಿಳಿಸಿದ ಅವರು, 1956ರ ನವೆಂಬರ್ 1ರಂದು ವಿವಿಧ ಆಡಳಿತಾತ್ಮಕ ಪ್ರದೇಶಗಳಲ್ಲಿ ಹಂಚಿಹೋಗಿದ್ದ ಕನ್ನಡ ಮಾತನಾಡುವ ಪ್ರದೇಶಗಳನ್ನು ಒಗ್ಗೂಡಿಸಿ ಮೈಸೂರು ರಾಜ್ಯವನ್ನು ರಚಿಸಲಾಯಿತು ಮತ್ತು 1973ರ ನವೆಂಬರ್ 1ರಂದು ರಾಜ್ಯಕ್ಕೆ ಕರ್ನಾಟಕ ಎಂಬ ನಾಮಧೇಯ ಲಭಿಸಿತು ಎಂದು ಸ್ಮರಿಸಿದರು. ಆಲೂರು ವೆಂಕಟರಾಯರಿಂದ ಹಿಡಿದು ಕನ್ನಡ ಏಕಕರಣದ ಹೋರಾಟಗಾರರವರೆಗೆ, ಬಸವಣ್ಣನಿಂದ ಕನಕದಾಸರವರೆಗೆ ಹಾಗೂ ಪಂಪನಿಂದ ಕುವೆಂಪು ಅವರವರೆಗೆ ಪ್ರತಿಯೊಂದು ತಲೆಮಾರೂ ಕನ್ನಡದ ಬೆಳವಣಿಗೆಗೆ ಅಪಾರ ಕೊಡುಗೆ ನೀಡಿದೆ ಎಂದರು.

ಕನ್ನಡಕ್ಕೆ ಕೊಡುಗೆ ನೀಡಿದವರು ಕೇವಲ ಕವಿಗಳು, ಸಾಹಿತಿಗಳು ಮತ್ತು ಹೋರಾಟಗಾರರು ಮಾತ್ರವಲ್ಲದೆ, ಕನ್ನಡದಲ್ಲಿ ಮೊದಲ ಅಕ್ಷರ ಬರೆದ ಮಗು, ತನ್ನ ಮಗುವಿಗೆ ಕನ್ನಡ ಕಲಿಸುವ ತಾಯಿ, ಪಾಠ ಮಾಡುವ ಶಿಕ್ಷಕ, ವಿಜ್ಞಾನಿ, ಅಧಿಕಾರಿ ಹಾಗೂ ನಾಡ-ನುಡಿಯನ್ನು ಉಳಿಸಲು ಶ್ರಮಿಸುವ ಪ್ರತಿಯೊಬ್ಬ ನಾಗರಿಕನೂ ಕನ್ನಡದ ಬೆಳವಣಿಗೆಯ ಪಾಲುದಾರನಾಗಿದ್ದಾನೆ ಎಂದು ಹೇಳಿದರು. ಕೃತಕ ಬುದ್ಧಿಮತ್ತೆ ತಂತ್ರಜ್ಞಾನ ಹಾಗೂ ಡಿಜಿಟಲ್ ಶಿಕ್ಷಣದ ಈ ಹೊಸ ಜಗತ್ತಿನಲ್ಲಿ ಕನ್ನಡದ ಪದಸಂಪತ್ತು, ಉಪಭಾಷೆಗಳು, ಜನಪದ ಜ್ಞಾನ ಮತ್ತು ಸಾಹಿತ್ಯವನ್ನು ಡಿಜಿಟಲ್ ರೂಪದಲ್ಲಿ ಸಂರಕ್ಷಿಸಬೇಕು ಎಂದು ಕರೆ ನೀಡಿದರು.

ಕಾಂಗ್ರೆಸ್ ಸರ್ಕಾರವು ನಾಡಧ್ವಜಕ್ಕೆ ಅಧಿಕೃತ ಮಾನ್ಯತೆ ದೊರಕಿಸುವ ನಿಟ್ಟಿನಲ್ಲಿ ಸಚಿವ ಸಂಪುಟದ ತೀರ್ಮಾನ, ಸರ್ವಪಕ್ಷಗಳ ಒಮ್ಮತ ಹಾಗೂ ರಾಜ್ಯವ್ಯಾಪಿ ಜನಜಾಗೃತಿ ಅಭಿಯಾನಕ್ಕೆ ಚಾಲನೆ ನೀಡುವ ಸಂಕಲ್ಪ ಹೊಂದಿದೆ ಎಂದರು. ನವೆಂಬರ್ 1ರಂದು ಐತಿಹಾಸಿಕ ತಾಣಗಳಲ್ಲಿ ನಾಡಧ್ವಜಾರೋಹಣ, ಒಂದು ಲಕ್ಷ ನಾಡಧ್ವಜಗಳ ಸಿದ್ಧತೆ ಮತ್ತು 'ನಮ್ಮ ಧ್ವಜ, ನಮ್ಮ ಹೆಮ್ಮೆ' ಅಭಿಯಾನದ ಮೂಲಕ ನಾಡಿನಾದ್ಯಂತ ಕನ್ನಡಾಭಿಮಾನವನ್ನು ಬಲಪಡಿಸಲು ಕಾರ್ಯರೂಪ ರೂಪಿಸಲಾಗಿದೆ ಎಂದು ತಿಳಿಸಿದರು. ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರನ್ನು ವಿಶೇಷವಾಗಿ ಅಭಿನಂದಿಸಿದ ಅವರು, ರಾಜ್ಯದ ಅಭಿವೃದ್ಧಿಯೊಂದಿಗೆ ಕನ್ನಡ ಭಾಷೆ, ಸಂಸ್ಕೃತಿ ಮತ್ತು ಕನ್ನಡಿಗರ ಆಶಯಗಳಿಗೆ ಆದ್ಯತೆ ನೀಡುತ್ತಿರುವುದು ಸಂತೋಷದ ವಿಷಯ ಎಂದರು.

ಈ ಸಮಾರಂಭದಲ್ಲಿ ಸಂಸತ್ ಸದಸ್ಯ ಬ್ರಿಜೇಶ್ ಚೌಟ, ಶಾಸಕ ವೇದವ್ಯಾಸ ಕಾಮತ್, ಕರ್ನಾಟಕ ಗೇರು ಅಭಿವೃದ್ಧಿ ನಿಗಮದ ಅಧ್ಯಕ್ಷೆ ಮಮತಾ ಗಟ್ಟಿ, ರಾಜ್ಯ ಕನಿಷ್ಠ ವೇತನ ಸಲಹಾ ಮಂಡಳಿ ಅಧ್ಯಕ್ಷ ಟಿ.ಎಂ. ಶಾಹಿದ್, ಮಂಗಳೂರು ನಗರಾಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಸಂತೋಷ್ ಕುಮಾರ್ ಶೆಟ್ಟಿ, ಗಣಿಗಾರಿಕೆ ಅಭಿವೃದ್ಧಿ ನಿಗಮದ ಅಧ್ಯಕ್ಷ ವಿಶ್ವಾಸ್ ಕುಮಾರ್ ದಾಸ್, ರಾಜ್ಯ ಕೊಂಕಣಿ ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ಜೋಕಿಂ ಸ್ಟಾನ್ಲಿ ಅಲ್ವಾರಿಸ್, ದಕ್ಷಿಣ ಕನ್ನಡ ಜಿಲ್ಲಾಧಿಕಾರಿ ದರ್ಶನ್ ಎಚ್.ವಿ., ಮಂಗಳೂರು ಪೊಲೀಸ್ ಆಯುಕ್ತ ಸುಧೀರ್ ಕುಮಾರ್ ರೆಡ್ಡಿ ಮುಂತಾದವರು ಉಪಸ್ಥಿತರಿದ್ದರು.