ಮಂಗಳೂರು: ಮಂಗಳೂರು ರಿಫೈನರಿ ಅಂಡ್ ಪೆಟ್ರೋಕೆಮಿಕಲ್ಸ್ ಲಿಮಿಟೆಡ್ (MRPL) ನ ಕೋಕರ್ ಹೈಡ್ರೋಟ್ರೀಟರ್ ಯೂನಿಟ್‌ನಲ್ಲಿ (Coker Hydrotreater Unit) ಸೆಪ್ಟೆಂಬರ್ 30ರಂದು ಸಂಭವಿಸಿದ ದುರ್ಘಟನೆಯ ಹಿನ್ನೆಲೆಯಲ್ಲಿ, ಕಾರ್ಮಿಕರ ನ್ಯಾಯಯುತ ಹಕ್ಕುಗಳು, ಸುರಕ್ಷತೆ ಹಾಗೂ ಸಾಮಾಜಿಕ ಭದ್ರತೆಗಾಗಿ ಭಾರತೀಯ ಮಜ್ದೂರು ಸಂಘ (BMS) ದಕ್ಷಿಣ ಕನ್ನಡ ಜಿಲ್ಲೆಯು ತಕ್ಷಣವೇ ಸ್ಪಂದಿಸಿ ಪ್ರಬಲ ಹೋರಾಟವನ್ನು ನಡೆಸಿತ್ತು. ಮೃತ ಕಾರ್ಮಿಕರ ಕುಟುಂಬಕ್ಕೆ ನ್ಯಾಯಯುತ ಪರಿಹಾರ, ಕುಟುಂಬದ ಒಬ್ಬರಿಗೆ ಉದ್ಯೋಗ, ಗಾಯಗೊಂಡ ಕಾರ್ಮಿಕರಿಗೆ ಸಂಪೂರ್ಣ ಚಿಕಿತ್ಸೆ ಹಾಗೂ ದ್ವಿತೀಯ ಹಂತದ (Secondary Workforce) ಕಾರ್ಮಿಕರು ಮತ್ತು ಅವರ ಅವಲಂಬಿತರಿಗೆ ಆರೋಗ್ಯ ವಿಮೆ ಸೇರಿದಂತೆ ಪ್ರಮುಖ ಬೇಡಿಕೆಗಳನ್ನು BMS ಆಡಳಿತ ಮಂಡಳಿಯ ಮುಂದಿಟ್ಟಿತ್ತು.

BMS ನೇತೃತ್ವದಲ್ಲಿ ನಡೆದ ಪ್ರತಿಭಟನೆ ಹಾಗೂ ಕಾರ್ಮಿಕರ ಒಗ್ಗಟ್ಟಿನ ಹೋರಾಟಕ್ಕೆ MRPL ಆಡಳಿತ ಮಂಡಳಿಯು ಸ್ಪಂದಿಸಿದ್ದು, ಮೃತ ಕಾರ್ಮಿಕ ಮನೀಷ್ ಕರ್ಕಡ ಅವರ ಕುಟುಂಬಕ್ಕೆ MRPL ವತಿಯಿಂದ 90 ಲಕ್ಷ ರೂಪಾಯಿ, ಜಿಟಿಎಲ್ಐ (GTLI) ಅಡಿಯಲ್ಲಿ ಸುಮಾರು 10 ಲಕ್ಷ ರೂಪಾಯಿ ಹಾಗೂ ವರ್ಕಮೆನ್ ಕಂಪನ್ಸೇಷನ್ ಪಾಲಿಸಿ (Workmen Compensation Policy) ಅಡಿಯಲ್ಲಿ ಸುಮಾರು 20 ಲಕ್ಷ ರೂಪಾಯಿ ಸೇರಿ ಒಟ್ಟು 1.20 ಕೋಟಿ ರೂಪಾಯಿ ಪರಿಹಾರ ಮತ್ತು ವಿಮಾ ಪ್ರಯೋಜನವನ್ನು ಅಧಿಕೃತವಾಗಿ ಘೋಷಿಸಲಾಗಿದೆ. ಇದರೊಂದಿಗೆ ಮೃತ ಕಾರ್ಮಿಕರ ಕುಟುಂಬದ ಒಬ್ಬ ಸದಸ್ಯರಿಗೆ ಉದ್ಯೋಗ ಕಲ್ಪಿಸುವ ಭರವಸೆಯೂ ದೊರೆತಿದೆ.
ಈ ಸಂಪೂರ್ಣ ಬೆಳವಣಿಗೆಯಲ್ಲಿ ದಕ್ಷಿಣ ಕನ್ನಡ ಜಿಲ್ಲೆಯ ಸಂಸದರಾದ ಕ್ಯಾಪ್ಟನ್ ಬ್ರಿಜೇಶ್ ಚೌಟ ಅವರ ತ್ವರಿತ ಮತ್ತು ನಿರಂತರ ಕಾರ್ಯವೈಖರಿ ಅತ್ಯಂತ ಮಹತ್ವದ್ದಾಗಿದೆ. ಘಟನೆಯ ನಂತರ ಕಾರ್ಮಿಕರ ಬೇಡಿಕೆಗಳನ್ನು ಗಂಭೀರವಾಗಿ ಪರಿಗಣಿಸಿದ ಸಂಸದರು, MRPL ಆಡಳಿತದೊಂದಿಗೆ ಮಾತ್ರವಲ್ಲದೆ ಜಿಲ್ಲಾಡಳಿತ, ಓಎನ್‌ಜಿಸಿ (ONGC) ಹಾಗೂ ಕೇಂದ್ರ ಪೆಟ್ರೋಲಿಯಂ ಸಚಿವಾಲಯದ ಮಟ್ಟದಲ್ಲಿಯೂ ವಿಚಾರವನ್ನು ಮುಂದುವರಿಸಿ, ಪರಿಹಾರ ಹಾಗೂ ಮುಂದಿನ ಬೇಡಿಕೆಗಳ ಕುರಿತು ವೇಗವಾಗಿ ಕ್ರಮ ಕೈಗೊಳ್ಳಲು ಸಂಪೂರ್ಣ ಸಹಕಾರ ನೀಡಿದ್ದಾರೆ. ಇದರಿಂದ ಕಾರ್ಮಿಕರ ಹಲವು ಬೇಡಿಕೆಗಳು ತ್ವರಿತಗತಿಯಲ್ಲಿ ಈಡೇರಲು ಅನುಕೂಲವಾಗಿದೆ ಎಂದು BMS ದಕ್ಷಿಣ ಕನ್ನಡ ಜಿಲ್ಲೆ ತಿಳಿಸಿದೆ. ವಿಶೇಷವಾಗಿ ದ್ವಿತೀಯ ಹಂತದ ಕಾರ್ಮಿಕರು ಹಾಗೂ ಅವರ ಅವಲಂಬಿತರಿಗೆ ಮೆಡಿಕ್ಲೇಮ್ (Mediclaim) ಸೌಲಭ್ಯ ಕಲ್ಪಿಸುವ ಬಹುಕಾಲದ ಬೇಡಿಕೆಯನ್ನು ಮುಂದುವರಿಸಲು ಸಂಸದರು ಓಎನ್‌ಜಿಸಿ ಅಧ್ಯಕ್ಷರು ಹಾಗೂ ಸಂಬಂಧಪಟ್ಟ ಕೇಂದ್ರ ಅಧಿಕಾರಿಗಳೊಂದಿಗೆ ಚರ್ಚಿಸಿರುವುದು ಮಹತ್ವದ ಹೆಜ್ಜೆಯಾಗಿದೆ.
MRPLನಲ್ಲಿ ಕಾರ್ಯನಿರ್ವಹಿಸುವ ಸೆಕೆಂಡರಿ ವರ್ಕ್‌ಫೋರ್ಸ್ ಹಾಗೂ ಅವರ ಅವಲಂಬಿತರಿಗೆ ಮೆಡಿಕ್ಲೇಮ್ ಸೌಲಭ್ಯ ಕಲ್ಪಿಸುವುದು BMSನ ಪ್ರಮುಖ ಬೇಡಿಕೆಯಾಗಿದ್ದು, ಈ ಕುರಿತು ಪ್ರಸ್ತಾವನೆ ಸಿದ್ಧಪಡಿಸಿ ಚರ್ಚೆ ನಡೆಸಲಾಗುತ್ತಿದೆ. ಆದರೆ ಮೆಡಿಕ್ಲೇಮ್ ಸೌಲಭ್ಯವು ಇನ್ನೂ ಸಂಪೂರ್ಣವಾಗಿ ಅಂತಿಮಗೊಂಡು ಜಾರಿಗೆ ಬಂದಿಲ್ಲ. ಆದ್ದರಿಂದ ಈ ಸೌಲಭ್ಯ ಅಧಿಕೃತವಾಗಿ ಜಾರಿಗೆ ಬರುವವರೆಗೆ BMS ತನ್ನ ಅನುಸರಣೆ ಮತ್ತು ಹೋರಾಟವನ್ನು ಯಾವುದೇ ಹಿಂಜರಿಕೆಯಿಲ್ಲದೆ ಮುಂದುವರಿಸಲಿದೆ ಎಂದು ಸ್ಪಷ್ಟಪಡಿಸಿದೆ.
BMSನ ಮುಂದಿನ ಪ್ರಮುಖ ಬೇಡಿಕೆಗಳ ಪಟ್ಟಿಯಲ್ಲಿ, ಸೆಕೆಂಡರಿ ವರ್ಕ್‌‌ಫೋರ್ಸ್ ಹಾಗೂ ಅವರ ಅವಲಂಬಿತರಿಗೆ ಮೆಡಿಕ್ಲೇಮ್ ಸೌಲಭ್ಯವನ್ನು ಶಾಶ್ವತವಾಗಿ ಜಾರಿಗೊಳಿಸುವುದು, ಮೃತ ಕಾರ್ಮಿಕರ ಕುಟುಂಬಕ್ಕೆ ನೀಡಿರುವ ಉದ್ಯೋಗದ ಭರವಸೆಯನ್ನು ಶೀಘ್ರವೇ ದಾಖಲೆಬದ್ಧವಾಗಿ ಜಾರಿಗೊಳಿಸುವುದು, ಗಾಯಗೊಂಡ ಕಾರ್ಮಿಕರಿಗೆ ಸಂಪೂರ್ಣ ಚಿಕಿತ್ಸೆ ಹಾಗೂ ಅಗತ್ಯವಿರುವ ಮುಂದುವರಿದ ವೈದ್ಯಕೀಯ ನೆರವು ನೀಡುವುದು ಸೇರಿವೆ. ಜೊತೆಗೆ ಗುತ್ತಿಗೆ ಹಾಗೂ ಸೆಕೆಂಡರಿ ವರ್ಕ್‌ಫೋರ್ಸ್ ಕಾರ್ಮಿಕರ ಆರೋಗ್ಯ, ಉದ್ಯೋಗ ಮತ್ತು ಸಾಮಾಜಿಕ ಭದ್ರತೆಯನ್ನು ಬಲಪಡಿಸುವುದು, ಸುರಕ್ಷತಾ ತರಬೇತಿ (Safety Training), ವೈಯಕ್ತಿಕ ರಕ್ಷಣಾ ಪರಿಕರಗಳು (PPE), ಕೆಲಸದ ಪರವಾನಗಿ (Work Permit), ಎಸ್‌ಒಪಿ (SOP) ಹಾಗೂ ತುರ್ತು ಸ್ಪಂದನಾ ವ್ಯವಸ್ಥೆಗಳನ್ನು ಮತ್ತಷ್ಟು ಬಲಪಡಿಸುವುದು ಅತ್ಯಗತ್ಯವಾಗಿದೆ. ದುರ್ಘಟನೆಯ ನಿಜವಾದ ಕಾರಣದ ತನಿಖೆಯ ನಂತರ ಅಗತ್ಯವಿರುವ ಎಲ್ಲ ಶಾಶ್ವತ ಸುರಕ್ಷತಾ ಕ್ರಮಗಳನ್ನು ಕಟ್ಟುನಿಟ್ಟಾಗಿ ಜಾರಿಗೊಳಿಸಬೇಕು ಮತ್ತು ಮುಂದಿನ ದಿನಗಳಲ್ಲಿ ಇಂತಹ ಯಾವುದೇ ಅನಾಹುತಗಳು ಮರುಕಳಿಸದಂತೆ ಕಾರ್ಮಿಕರ ಸುರಕ್ಷತೆಗೆ ಅತ್ಯಂತ ಹೆಚ್ಚಿನ ಆದ್ಯತೆ ನೀಡಬೇಕು ಎಂದು ಸಂಘಟನೆ ಆಗ್ರಹಿಸಿದೆ.
ಕಾರ್ಮಿಕರ ಬೇಡಿಕೆಗಳಿಗೆ ಸಕಾರಾತ್ಮಕವಾಗಿ ಸ್ಪಂದಿಸಿದ MRPL ಆಡಳಿತ, ತ್ವರಿತವಾಗಿ ಮಧ್ಯಪ್ರವೇಶಿಸಿ ವಿಚಾರವನ್ನು ಮುಂದುವರಿಸಿದ ಸಂಸದ ಕ್ಯಾಪ್ಟನ್ ಬ್ರಿಜೇಶ್ ಚೌಟ, ಕೇಂದ್ರ ಪೆಟ್ರೋಲಿಯಂ ಸಚಿವಾಲಯದ ಸಂಬಂಧಪಟ್ಟ ಅಧಿಕಾರಿಗಳು, ದಕ್ಷಿಣ ಕನ್ನಡ ಜಿಲ್ಲಾಡಳಿತ, ಜನಪ್ರತಿನಿಧಿಗಳು, MRPLನ ಕಾರ್ಮಿಕ ಬಂಧುಗಳು, ಕಾರ್ಮಿಕರ ಪರವಾಗಿ ನಿಂತು ಸಹಕರಿಸಿದ ಸಂಘಟನೆಗಳು ಹಾಗೂ ಈ ಗಂಭೀರ ವಿಚಾರವನ್ನು ಸಾರ್ವಜನಿಕರ ಗಮನಕ್ಕೆ ತಂದ ಮಾಧ್ಯಮ ಮಿತ್ರರಿಗೆ BMS ದಕ್ಷಿಣ ಕನ್ನಡ ಜಿಲ್ಲೆಯು ಹೃತ್ಪೂರ್ವಕ ಧನ್ಯವಾದಗಳನ್ನು ಸಲ್ಲಿಸಿದೆ. ಈ ಎಲ್ಲಾ ಬೆಳವಣಿಗೆಗಳು ಕಾರ್ಮಿಕರ ಒಗ್ಗಟ್ಟು, BMSನ ಸಂಘಟಿತ ಹೋರಾಟ, ಜನಪ್ರತಿನಿಧಿಗಳ ಸಹಕಾರ ಹಾಗೂ ಆಡಳಿತದ ಸಕರಾತ್ಮಕ ಸ್ಪಂದನೆಯ ಫಲವಾಗಿದೆ ಎಂದು BMS ಅಭಿಪ್ರಾಯಪಟ್ಟಿದೆ.
1.20 ಕೋಟಿ ರೂಪಾಯಿ ಪರಿಹಾರ, ಉದ್ಯೋಗದ ಭರವಸೆ ಹಾಗೂ ಗಾಯಾಳುಗಳ ಚಿಕಿತ್ಸೆಗೆ ದೊರೆತ ಸ್ಪಂದನೆಯನ್ನು BMS ಮುಕ್ತಕಂಠದಿಂದ ಸ್ವಾಗತಿಸುತ್ತದೆ. ಆದರೆ ಕಾರ್ಮಿಕರ ಹಿತಾಸಕ್ತಿಗೆ ಸಂಬಂಧಿಸಿದ ಈ ಭರವಸೆಗಳು ಕೇವಲ ಕಾಗದದ ಮೇಲಿನ ಘೋಷಣೆಯಾಗಿ ಉಳಿಯದೆ, ನಿಗದಿತ ಅವಧಿಯಲ್ಲಿ ದಾಖಲೆಬದ್ಧವಾಗಿ ಮತ್ತು ಪರಿಣಾಮಕಾರಿಯಾಗಿ ಜಾರಿಗೆ ಬರಬೇಕು ಎಂಬುದು BMSನ ದೃಢವಾದ ನಿಲುವಾಗಿದೆ. ವಿಶೇಷವಾಗಿ ಸೆಕೆಂಡರಿ ವರ್ಕ್‌ಫೋರ್ಸ್‌ಗೆ ಮೆಡಿಕ್ಲೇಮ್ ಸೌಲಭ್ಯ ಸಂಪೂರ್ಣವಾಗಿ ಜಾರಿಗೆ ಬರುವವರೆಗೂ BMS ಈ ವಿಚಾರವನ್ನು ನಿರಂತರವಾಗಿ ಅನುಸರಿಸಲಿದೆ. MRPL ಕಾರ್ಮಿಕರ ಹಿತಾಸಕ್ತಿಯ ವಿಚಾರದಲ್ಲಿ ಭಾರತೀಯ ಮಜ್ದೂರು ಸಂಘವು ಎಂದೆಂದಿಗೂ ಕಾರ್ಮಿಕರ ಜೊತೆಯಲ್ಲಿ ಗಟ್ಟಿಯಾಗಿ ನಿಲ್ಲಲಿದೆ. ಕಾರ್ಮಿಕರ ಸಂಕಷ್ಟದ ಸಮಯದಲ್ಲಿ, ನ್ಯಾಯಯುತ ಬೇಡಿಕೆಗಳ ಹೋರಾಟದಲ್ಲಿ ಹಾಗೂ ಬೇಡಿಕೆಗಳ ಸಂಪೂರ್ಣ ಈಡೇರಿಕೆಯವರೆಗೆ BMS ಸಂಪೂರ್ಣ ಜವಾಬ್ದಾರಿಯೊಂದಿಗೆ ಅವರ ಬೆನ್ನೆಲುಬಾಗಿ ನಿಲ್ಲಲಿದೆ ಎಂದು ಭಾರತೀಯ ಮಜ್ದೂರು ಸಂಘದ ದಕ್ಷಿಣ ಕನ್ನಡ ಜಿಲ್ಲಾಧ್ಯಕ್ಷ ಅನಿಲ್ ಕುಮಾರ್ ಯು ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.