ಮಳೆಗಾಲವು ಪ್ರಕೃತಿಯನ್ನು ಹಸಿರಾಗಿಸಿ, ಭೂಮಿಗೆ ಹೊಸ ಚೈತನ್ಯವನ್ನು ತುಂಬುವ ಅದ್ಭುತ ಋತು. ಆದರೆ, ಇದೇ ಸಮಯದಲ್ಲಿ ವಾತಾವರಣದಲ್ಲಿನ ಆರ್ದ್ರತೆ ಹೆಚ್ಚಾಗುವುದರಿಂದ ಮತ್ತು ಉಷ್ಣತೆಯಲ್ಲಿ ವ್ಯತ್ಯಾಸ ಉಂಟಾಗುವುದರಿಂದ ನಮ್ಮ ದೇಹದ ರೋಗನಿರೋಧಕ ಶಕ್ತಿಯ ಮೇಲೆ ನೇರ ಪರಿಣಾಮ ಬೀರುತ್ತದೆ.

ಸೋಂಕುಗಳು ಮತ್ತು ಸಾಂಕ್ರಾಮಿಕ ರೋಗಗಳು ಸುಲಭವಾಗಿ ಹರಡುವ ಈ ಅವಧಿಯಲ್ಲಿ ಆರೋಗ್ಯದ ಬಗ್ಗೆ ಹೆಚ್ಚಿನ ಕಾಳಜಿ ವಹಿಸುವುದು ಅವಶ್ಯಕ. ಕೇವಲ ಮದ್ದಿನ ಮೊರೆ ಹೋಗುವುದಕ್ಕಿಂತ, ನಮ್ಮ ದೈನಂದಿನ ಆಹಾರ ಕ್ರಮ ಮತ್ತು ಜೀವನಶೈಲಿಯಲ್ಲಿ ಸಣ್ಣಪುಟ್ಟ ಬದಲಾವಣೆಗಳನ್ನು ಮಾಡಿಕೊಳ್ಳುವ ಮೂಲಕ ರೋಗಗಳನ್ನು ದೂರವಿಡಬಹುದು.

ಆರೋಗ್ಯಕರ ಜೀವನಶೈಲಿಯ ಮೊದಲ ಹೆಜ್ಜೆ ಎಂದರೆ ಶುದ್ಧತೆ. ಮಳೆಗಾಲದಲ್ಲಿ ಕಲುಷಿತ ನೀರಿನಿಂದಲೇ ಹೆಚ್ಚಿನ ಕಾಯಿಲೆಗಳು ಹರಡುತ್ತವೆ. ಆದ್ದರಿಂದ ಕುಡಿಯುವ ನೀರನ್ನು ಚೆನ್ನಾಗಿ ಕುದಿಸಿ ಆರಿಸಿ ಬಳಸುವುದು ಅತ್ಯಂತ ಅಗತ್ಯ. ಅದೇ ರೀತಿ, ಆಹಾರವು ಸದಾ ತಾಜಾ ಮತ್ತು ಬಿಸಿಯಾಗಿರಲಿ. ಮಳೆಗಾಲದಲ್ಲಿ ಜೀರ್ಣಕ್ರಿಯೆ ಸಹಜವಾಗಿಯೇ ಸ್ವಲ್ಪ ಮಂದವಾಗಿರುತ್ತದೆ, ಆದ್ದರಿಂದ ಎಣ್ಣೆಯಲ್ಲಿ ಕರಿದ ಅಥವಾ ಬೀದಿ ಬದಿಯ ಅಶುಚಿಯಾದ ಆಹಾರಗಳನ್ನು ಆದಷ್ಟು ವರ್ಜಿಸುವುದು ಒಳಿತು. ಇಂತಹ ಆಹಾರಗಳು ಜೀರ್ಣಾಂಗ ವ್ಯವಸ್ಥೆಯ ಮೇಲೆ ಒತ್ತಡ ಹೇರಿ ದೇಹದ ಶಕ್ತಿಯನ್ನು ಕುಂದಿಸುತ್ತವೆ.

ನಮ್ಮ ಅಡುಗೆ ಮನೆಯೇ ಒಂದು ಸಣ್ಣ ಔಷಧಾಲಯ. ನಮ್ಮ ಆಹಾರದಲ್ಲಿ ಶುಂಠಿ, ಅರಿಶಿನ, ಬೆಳ್ಳುಳ್ಳಿ ಮತ್ತು ಕಾಳು ಮೆಣಸಿನಂತಹ ಸಾಂಬಾರ ಪದಾರ್ಥಗಳನ್ನು ಯಥೇಚ್ಛವಾಗಿ ಬಳಸುವುದು ನೈಸರ್ಗಿಕ ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸುತ್ತದೆ. ಶುಂಠಿಯು ಜೀರ್ಣಕ್ರಿಯೆಯನ್ನು ಸುಧಾರಿಸಿದರೆ, ಅರಿಶಿನವು ಸೋಂಕು ನಿವಾರಕವಾಗಿ ಕೆಲಸ ಮಾಡುತ್ತದೆ.

ಬೆಳ್ಳುಳ್ಳಿ ಮತ್ತು ಮೆಣಸು ಶೀತ ಹಾಗೂ ಕೆಮ್ಮಿನಂತಹ ಸಮಸ್ಯೆಗಳನ್ನು ತಡೆಗಟ್ಟುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ. ಇದರ ಜೊತೆಗೆ ವೈಯಕ್ತಿಕ ನೈರ್ಮಲ್ಯಕ್ಕೆ ಆದ್ಯತೆ ನೀಡಿ, ಮಳೆಯಲ್ಲಿ ನೆನೆದರೆ ತಕ್ಷಣವೇ ಬೆಚ್ಚಗಿನ ನೀರಿನಲ್ಲಿ ಸ್ನಾನ ಮಾಡಿ ಒಣ ಬಟ್ಟೆ ಧರಿಸುವುದರಿಂದ ಚರ್ಮದ ಸೋಂಕು ಮತ್ತು ನೆಗಡಿಗಳಿಂದ ಪಾರಾಗಬಹುದು. ಮಳೆಗಾಲವೆಂದು ವ್ಯಾಯಾಮವನ್ನು ನಿಲ್ಲಿಸದೇ, ಮನೆಯಲ್ಲೇ ಯೋಗ ಅಥವಾ ಹಗುರವಾದ ವ್ಯಾಯಾಮಗಳನ್ನು ಮುಂದುವರಿಸುತ್ತಾ, ಸಾಕಷ್ಟು ವಿಶ್ರಾಂತಿ ಪಡೆಯುವುದು ದೇಹದ ಚೈತನ್ಯವನ್ನು ಕಾಪಾಡುತ್ತದೆ.

ಕರಾವಳಿ ಕರ್ನಾಟಕದ ಆಹಾರ ಪದ್ಧತಿಯು ಮಳೆಗಾಲದ ಸವಾಲುಗಳನ್ನು ಎದುರಿಸಲು ನಮಗೆ ವಿಶೇಷವಾದ ಕೊಡುಗೆ ನೀಡಿದೆ. ಮಳೆಗಾಲದಲ್ಲಿ ಲಭ್ಯವಿರುವ ಕಣಿಲೆ, ಕೆಸು ಮತ್ತು ಚಗತೆ ಸೊಪ್ಪಿನಂತಹ ತರಕಾರಿಗಳು ಕೇವಲ ರುಚಿಕರ ಮಾತ್ರವಲ್ಲ, ಅತ್ಯುತ್ತಮ ಔಷಧೀಯ ಗುಣಗಳನ್ನು ಹೊಂದಿವೆ. ಕಣಿಲೆಯು ನಾರಿನಾಂಶದಿಂದ ಸಮೃದ್ಧವಾಗಿದ್ದು ಜೀರ್ಣಕ್ರಿಯೆಯನ್ನು ಉತ್ತಮಪಡಿಸುತ್ತದೆ. ಸರಿಯಾದ ಪದ್ಧತಿಯಲ್ಲಿ ಸಂಸ್ಕರಿಸಿ ಸೇವಿಸುವ ಕಣಿಲೆ ದೇಹದ ವಿಷಕಾರಿ ಅಂಶಗಳನ್ನು ಹೊರಹಾಕಲು ಸಹಕಾರಿಯಾಗಿದೆ. ಹಾಗೆಯೇ, ಕೆಸುವಿನ ಎಲೆ ಮತ್ತು ದಂಟುಗಳಲ್ಲಿ ಕಬ್ಬಿಣಾಂಶ ಮತ್ತು ಜೀವಸತ್ವಗಳು ಹೇರಳವಾಗಿದ್ದು, ರಕ್ತಹೀನತೆಯನ್ನು ತಡೆಯಲು ಮತ್ತು ರೋಗನಿರೋಧಕ ಶಕ್ತಿಯನ್ನು ವೃದ್ಧಿಸಲು ಸಹಾಯ ಮಾಡುತ್ತವೆ. ಇನ್ನು ಕಾಡುಗಳಲ್ಲಿ, ಗದ್ದೆ ಬದಿಗಳಲ್ಲಿ ಸ್ವತಃ ಬೆಳೆಯುವ ಚಗತೆ ಸೊಪ್ಪಿನಂತಹ ಕಾಡು ಸೊಪ್ಪುಗಳು ದೇಹವನ್ನು ಶುದ್ಧೀಕರಿಸುವ (Detox) ಕೆಲಸವನ್ನು ಮಾಡುತ್ತವೆ. ಈ ಸೊಪ್ಪುಗಳಲ್ಲಿರುವ ಖನಿಜಗಳು ಮಳೆಗಾಲದ ಸುಸ್ತು ಮತ್ತು ಆಲಸ್ಯವನ್ನು ದೂರ ಮಾಡಿ ದೇಹಕ್ಕೆ ಬೇಕಾದ ಚೈತನ್ಯವನ್ನು ನೀಡುತ್ತವೆ.

ಒಟ್ಟಾರೆಯಾಗಿ ಹೇಳುವುದಾದರೆ, ಮಳೆಗಾಲದಲ್ಲಿ ನಮ್ಮ ಪೂರ್ವಜರು ರೂಢಿಸಿಕೊಂಡಿದ್ದ ಸಾಂಪ್ರದಾಯಿಕ ಆಹಾರ ಕ್ರಮಗಳು ಮತ್ತು ಸರಳ ಆರೋಗ್ಯ ಸೂತ್ರಗಳನ್ನು ಪಾಲಿಸುವುದೇ ಸೋಂಕುಗಳಿಂದ ದೂರವಿರಲು ಅತ್ಯುತ್ತಮ ರಕ್ಷಾಕವಚ. ಪ್ರಕೃತಿ ನಮಗೆ ಮಳೆಗಾಲದಲ್ಲಿ ನೀಡುವ ಈ ವಿಶೇಷ ಸೊಪ್ಪು-ತರಕಾರಿಗಳು ಮತ್ತು ಅಡುಗೆ ಮನೆಯ ಸಾಂಬಾರ ಪದಾರ್ಥಗಳು ನಮ್ಮ ದೇಹವನ್ನು ರೋಗಮುಕ್ತವಾಗಿಡಲು ಸಹಾಯ ಮಾಡುತ್ತವೆ. ಸಮತೋಲಿತ ಆಹಾರ, ವೈಯಕ್ತಿಕ ಸ್ವಚ್ಛತೆ ಮತ್ತು ಶಿಸ್ತುಬದ್ಧ ಜೀವನಶೈಲಿಯಿದ್ದರೆ ಈ ಮಳೆಗಾಲವನ್ನು ಯಾವುದೇ ಆತಂಕವಿಲ್ಲದೆ ಆರೋಗ್ಯಕರವಾಗಿ ಮತ್ತು ಆನಂದಮಯವಾಗಿ ಕಳೆಯಬಹುದು.

✍ ಲಲಿತಶ್ರೀ ಪ್ರೀತಂ ರೈ