ದಕ್ಷಿಣ ಕೊರಿಯ : ದಕ್ಷಿಣ ಕೊರಿಯಾದ ಬುಸಾನ್ನಲ್ಲಿ ನಡೆಯುತ್ತಿರುವ ವಿಶ್ವ ಪಾರಂಪರಿಕ ಸಮಿತಿಯ 48ನೇ ಅಧಿವೇಶನದಲ್ಲಿ ಜಾಗತಿಕವಾಗಿ ಅತ್ಯಂತ ಮಹತ್ವದ ನಾಲ್ಕು ಪ್ರಸಿದ್ಧ ತಾಣಗಳನ್ನು 'ಯುನೆಸ್ಕೋ ವಿಶ್ವ ಪಾರಂಪರಿಕ ಪಟ್ಟಿ'ಗೆ ಅಧಿಕೃತವಾಗಿ ಸೇರಿಸಲಾಗಿದೆ. ಅಸಾಧಾರಣ ಸಾಂಸ್ಕೃತಿಕ, ಐತಿಹಾಸಿಕ ಹಾಗೂ ನೈಸರ್ಗಿಕ ಮೌಲ್ಯಗಳನ್ನು ಹೊಂದಿರುವ ಈ ಸ್ಥಳಗಳನ್ನು ಭವಿಷ್ಯದ ಪೀಳಿಗೆಗಾಗಿ ಸುದೀರ್ಘ ಕಾಲ ಸಂರಕ್ಷಿಸುವ ಉದ್ದೇಶದಿಂದ ಈ ವಿಶೇಷ ಮಾನ್ಯತೆ ನೀಡಲಾಗಿದೆ.

ಈ ನೂತನ ಪಟ್ಟಿಯಲ್ಲಿ ಎರಡನೇ ಮಹಾಯುದ್ಧದ ಸಮಯದಲ್ಲಿ (ಜೂನ್ 6, 1944) ಮಿತ್ರಪಡೆಗಳು ಕಾಲಿಟ್ಟು ಯುರೋಪಿನ ವಿಮೋಚನೆಯಲ್ಲಿ ಪ್ರಮುಖ ಪಾತ್ರ ವಹಿಸಿದ ಫ್ರಾನ್ಸ್‌ನ 'ಡಿ-ಡೇ ಲ್ಯಾಂಡಿಂಗ್ ಬೀಚ್‌ಗಳು' ಸೇರಿವೆ. ಇದರೊಂದಿಗೆ, ಗ್ರೀಕ್ ಪೌರಾಣಿಕ ಕಥೆಗಳಲ್ಲಿ ದೇವತೆಗಳ ವಾಸಸ್ಥಾನವೆಂದು ಪ್ರಸಿದ್ಧವಾಗಿರುವ ಹಾಗೂ ಅಪರೂಪದ ಜೀವವೈವಿಧ್ಯ ಮತ್ತು ವಿಶಿಷ್ಟ ನೈಸರ್ಗಿಕ ಸೌಂದರ್ಯಕ್ಕೆ ಹೆಸರಾದ ಗ್ರೀಸ್‌ನ ಅತ್ಯುನ್ನತ 'ಒಲಿಂಪಸ್ ಪರ್ವತ'ವೂ ಪಟ್ಟಿಗೆ ಸೇರ್ಪಡೆಯಾಗಿದೆ.

ಇವುಗಳ ಜೊತೆಗೆ, 6ನೇ ಮತ್ತು 8ನೇ ಶತಮಾನದ ನಡುವೆ ಜಪಾನ್‌ನ ಆರಂಭಿಕ ಕೇಂದ್ರೀಕೃತ ಆಡಳಿತ ವ್ಯವಸ್ಥೆ ಹಾಗೂ ರಾಜಕೀಯ-ಸಾಂಸ್ಕೃತಿಕ ಬೆಳವಣಿಗೆಯನ್ನು ಸಾರುವ ಪ್ರಾಚೀನ ರಾಜಧಾನಿಗಳಾದ 'ಅಸುಕಾ ಮತ್ತು ಫುಜಿವಾರಾ' ಪುರಾತತ್ವ ತಾಣಗಳು ಈ ಗೌರವಕ್ಕೆ ಪಾತ್ರವಾಗಿವೆ. ಹಾಗೆಯೇ, ಪ್ರಪಂಚದ ಅತಿ ದೊಡ್ಡ ಪ್ರಾಣಿಗಳ ಋತುಮಾನದ ವಲಸೆಗೆ ಸಾಕ್ಷಿಯಾಗುವ ದಕ್ಷಿಣ ಸೂಡಾನ್‌ನ ಬೃಹತ್ ರಕ್ಷಿತ ಅರಣ್ಯ ಪ್ರದೇಶ 'ಬೋಮಾ-ಬಾಡಿಂಗಿಲೊ ವಲಸೆ ಪ್ರದೇಶ'ವು ಆ ದೇಶದ ಚೊಚ್ಚಲ ಯುನೆಸ್ಕೋ ವಿಶ್ವ ಪಾರಂಪರಿಕ ತಾಣವಾಗಿ ಇತಿಹಾಸ ನಿರ್ಮಿಸಿದೆ.

ಯುನೆಸ್ಕೋ ವಿಶ್ವ ಪಾರಂಪರಿಕ ಪಟ್ಟಿಗೆ ಸೇರ್ಪಡೆಯಾಗಿರುವುದು ಈ ತಾಣಗಳಿಗೆ ಜಾಗತಿಕ ಮಟ್ಟದಲ್ಲಿ ಅತ್ಯುನ್ನತ ಸಾಂಸ್ಕೃತಿಕ ಮತ್ತು ಪರಿಸರ ಮೌಲ್ಯದ ಮಾನ್ಯತೆಯನ್ನು ತಂದುಕೊಟ್ಟಿದ್ದು, ಆಯಾ ದೇಶಗಳಿಗೆ ತಮ್ಮ ಐತಿಹಾಸಿಕ ಹಾಗೂ ನೈಸರ್ಗಿಕ ಪರಂಪರೆಯನ್ನು ಸುಸ್ಥಿರವಾಗಿ ಕಾಪಾಡಿಕೊಳ್ಳಲು ಹೆಚ್ಚಿನ ಉತ್ತೇಜನ ನೀಡಲಿದೆ.