ವಾಲ್ ಸ್ಟ್ರೀಟ್ : ವಿಶ್ವದ ಮೊದಲ ಹಾಗೂ ಏಕೈಕ ಟ್ರಿಲಿಯನೇರ್ ಎಂಬ ಹೊಸ ದಾಖಲೆ ಬರೆದಿದ್ದ ಬಿಲಿಯನೇರ್ ಉದ್ಯಮಿ ಎಲಾನ್ ಮಸ್ಕ್, ಇದೀಗ ಆ ಐತಿಹಾಸಿಕ ಶ್ರೀಮಂತಿಕೆಯ ಪಟ್ಟವನ್ನು ಕಳೆದುಕೊಂಡಿದ್ದಾರೆ. ಇತ್ತೀಚೆಗಷ್ಟೇ ಷೇರು ಮಾರುಕಟ್ಟೆಗೆ ಐಪಿಒ (IPO) ಮೂಲಕ ಪದಾರ್ಪಣೆ ಮಾಡಿದ್ದ ಮಸ್ಕ್ ಮಾಲೀಕತ್ವದ ಬಾಹ್ಯಾಕಾಶ ಸಂಸ್ಥೆ 'ಸ್ಪೇಸ್ ಎಕ್ಸ್' (SpaceX), ಆರಂಭದಲ್ಲಿ ಹೂಡಿಕೆದಾರರಿಂದ ಅಭೂತಪೂರ್ವ ಬೆಂಬಲ ಪಡೆದುಕೊಂಡಿತ್ತು. ಕೇವಲ 135 ಡಾಲರ್‌ಗೆ ನಿಗದಿಯಾಗಿದ್ದ ಸಂಸ್ಥೆಯ ಷೇರು ಮೌಲ್ಯ ಕೆಲವೇ ದಿನಗಳಲ್ಲಿ 225 ಡಾಲರ್‌ಗೆ ಜಿಗಿತ ಕಾಣುವ ಮೂಲಕ ಮಸ್ಕ್ ಅವರ ಒಟ್ಟು ಆಸ್ತಿ ಮೌಲ್ಯವನ್ನು 1.4 ಟ್ರಿಲಿಯನ್ ಡಾಲರ್ ದಾಟಿಸಿತ್ತು. ಆದರೆ, ಈ ಐತಿಹಾಸಿಕ ಮುನ್ನಡೆ ಬಹಳ ದಿನಗಳ ಕಾಲ ಉಳಿಯಲಿಲ್ಲ.

ಜೂನ್ 16 ರಂದು ಸ್ಪೇಸ್ ಎಕ್ಸ್ ಸಂಸ್ಥೆ ಕೈಗೊಂಡ ಒಂದು ಮಹತ್ವದ ಆರ್ಥಿಕ ನಿರ್ಧಾರವು ಇಡೀ ಚಿತ್ರಣವನ್ನೇ ಬದಲಿಸಿದೆ. ಪ್ರಖ್ಯಾತ ಎಐ ಕೋಡಿಂಗ್ ಏಜೆಂಟ್ ಸಂಸ್ಥೆಯಾದ 'ಕರ್ಸರ್' (Cursor) ಕಂಪನಿಯನ್ನು ಸುಮಾರು 60 ಬಿಲಿಯನ್ ಡಾಲರ್ ಭಾರಿ ಮೊತ್ತಕ್ಕೆ ಖರೀದಿ ಮಾಡುವುದಾಗಿ ಸ್ಪೇಸ್ ಎಕ್ಸ್ ಘೋಷಿಸಿತ್ತು. ಬಾಹ್ಯಾಕಾಶ ತಂತ್ರಜ್ಞಾನದಲ್ಲಿ ಕೃತಕ ಬುದ್ಧಿಮತ್ತೆ (AI) ಡೇಟಾ ಸ್ಥಾಪಿಸುವ ಮಸ್ಕ್ ಅವರ ದೂರದರ್ಶಿ ಯೋಜನೆಗೆ ಇದು ಪೂರಕವಾಗಿದ್ದರೂ, ಪ್ರಾಯೋಗಿಕವಾಗಿ ಈ ಯೋಜನೆಗಳು ಇನ್ನೂ ಜಾರಿಯಾಗದ ಕಾರಣ ಹೂಡಿಕೆದಾರರಲ್ಲಿ ತೀವ್ರ ಆತಂಕ ಮೂಡಿಸಿದೆ. ಎಐ ತಂತ್ರಜ್ಞಾನದ ಮೇಲಿನ ಅತಿಯಾದ ಹೂಡಿಕೆ ಹಾಗೂ ಅವಲಂಬನೆಯ ಕುರಿತು ಮಾರುಕಟ್ಟೆಯಲ್ಲಿ ಅನುಮಾನಗಳು ವ್ಯಕ್ತವಾದ ಬೆನ್ನಲ್ಲೇ ಸ್ಪೇಸ್ ಎಕ್ಸ್ ಷೇರುಗಳು ಸತತವಾಗಿ ಕುಸಿತ ಕಾಣತೊಡಗಿದವು.

ಈ ಖರೀದಿ ನಿರ್ಧಾರದ ಪರಿಣಾಮವಾಗಿ ಸ್ಪೇಸ್ ಎಕ್ಸ್ ಷೇರುಗಳ ಮೌಲ್ಯದಲ್ಲಿ ಶೇಕಡಾ 30 ರಷ್ಟು ಭಾರಿ ಪತನ ಉಂಟಾಗಿದ್ದು, ಪ್ರಸ್ತುತ 152 ರಿಂದ 154 ಡಾಲರ್ ಮಟ್ಟಕ್ಕೆ ಕುಸಿದಿದೆ. ಇದರ ಬೆನ್ನಲ್ಲೇ ಮಸ್ಕ್ ಅವರ ಮತ್ತೊಂದು ಪ್ರಮುಖ ಸಂಸ್ಥೆಯಾದ ಟೆಸ್ಲಾ (Tesla) ಕಂಪನಿಯ ಷೇರುಗಳೂ ಸಹ ಶೇಕಡಾ 21 ರಷ್ಟು ನಷ್ಟ ಅನುಭವಿಸಿವೆ. ಈ ಉಭಯ ಕಂಪನಿಗಳ ಷೇರು ಪತನದಿಂದಾಗಿ ಎಲಾನ್ ಮಸ್ಕ್ ಅವರ ಒಟ್ಟು ಆಸ್ತಿ ಮೌಲ್ಯ ಪ್ರಸ್ತುತ 957 ರಿಂದ 997 ಬಿಲಿಯನ್ ಡಾಲರ್‌ಗೆ ಇಳಿಕೆಯಾಗಿದ್ದು, ಅವರು ಟ್ರಿಲಿಯನೇರ್ ಕ್ಲಬ್‌ನಿಂದ ಹೊರಬಂದಿದ್ದಾರೆ. ಆದಾಗ್ಯೂ, ವಿಶ್ವದ ಅತ್ಯಂತ ಶ್ರೀಮಂತ ವ್ಯಕ್ತಿ ಎಂಬ ಹೆಗ್ಗಳಿಕೆಯನ್ನು ಮಸ್ಕ್ ಅವರೇ ಕಾಯ್ದುಕೊಂಡಿದ್ದಾರೆ. ಸದ್ಯ 284 ಬಿಲಿಯನ್ ಡಾಲರ್ ಆಸ್ತಿಯೊಂದಿಗೆ ಎರಡನೇ ಸ್ಥಾನದಲ್ಲಿರುವ ಗೂಗಲ್ ಸಹ-ಸಂಸ್ಥಾಪಕ ಲ್ಯಾರಿ ಪೇಜ್ ಅವರಿಗಿಂತ ಎಲಾನ್ ಮಸ್ಕ್ ಇನ್ನೂ ಬಹುದೊಡ್ಡ ಅಂತರದಲ್ಲಿ ಮುಂದಿದ್ದಾರೆ.