ಇಸ್ರೇಲ್ : ಅಮೆರಿಕ ಮತ್ತು ಇರಾನ್ ನಡುವೆ ಏರ್ಪಟ್ಟಿರುವ ಒಪ್ಪಂದಕ್ಕೂ ಇಸ್ರೇಲ್‌ಗೂ ಯಾವುದೇ ಸಂಬಂಧವಿಲ್ಲ ಹಾಗೂ ಈ ಒಪ್ಪಂದವು ತಮ್ಮ ದೇಶವನ್ನು ಯಾವುದೇ ರೀತಿಯಲ್ಲಿಯೂ ನಿರ್ಬಂಧಿಸುವುದಿಲ್ಲ ಎಂದು ಇಸ್ರೇಲ್‌ನ ರಾಷ್ಟ್ರೀಯ ಭದ್ರತಾ ಸಚಿವ ಇಟಮರ್ ಬೆನ್ ಗ್ವಿರ್ ಸ್ಪಷ್ಟಪಡಿಸಿದ್ದಾರೆ. ಅಮೆರಿಕ ನೇತೃತ್ವದಲ್ಲಿ ನಡೆಯುವ ಯಾವುದೇ ರಾಜತಾಂತ್ರಿಕ ಉಪಕ್ರಮಗಳು ಇಸ್ರೇಲ್‌ನ ದೇಶೀಯ ಅಥವಾ ಮಿಲಿಟರಿ ನೀತಿಯನ್ನು ನಿರ್ದೇಶಿಸಲು ಸಾಧ್ಯವಿಲ್ಲ. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಇರಾನ್‌ನೊಂದಿಗೆ ಮಾಡಿಕೊಂಡಿರುವ ಒಪ್ಪಂದಕ್ಕೆ ನಾವು ಪಾಲುದಾರರಲ್ಲ. ಇಸ್ರೇಲ್ ಸಾರ್ವಭೌಮ ಮತ್ತು ಸ್ವತಂತ್ರ ರಾಷ್ಟ್ರವಾಗಿದ್ದು, ಅದು ಅಮೆರಿಕದ ಅಧೀನದಲ್ಲಿಲ್ಲ. ನಮ್ಮ ಪ್ರಥಮ ಕರ್ತವ್ಯ ಇಸ್ರೇಲ್‌ನ ನಾಗರಿಕರು, ಐಡಿಎಫ್ (ಇಸ್ರೇಲ್ ರಕ್ಷಣಾ ಪಡೆ) ಸೈನಿಕರು ಮತ್ತು ಯಹೂದಿ ಜನರಿಗೆ ಮಾತ್ರ ಸೀಮಿತವಾಗಿದೆ. ಇಸ್ರೇಲ್ ಭೂಮಿಯಲ್ಲಿ ಭದ್ರತೆ ಒದಗಿಸುವುದೇ ನಮ್ಮ ಮೊದಲ ಆದ್ಯತೆಯಾಗಿದೆ ಎಂದು ಅವರು ಸಾಮಾಜಿಕ ಜಾಲತಾಣ 'ಎಕ್ಸ್' (ಟ್ವಿಟರ್) ಖಾತೆಯಲ್ಲಿ ಬರೆದುಕೊಂಡಿದ್ದಾರೆ.

ಅಂತರರಾಷ್ಟ್ರೀಯ ಒತ್ತಡಗಳಿಗೆ ಮಣಿದು ಇಸ್ರೇಲ್‌ನ ಭದ್ರತೆಯನ್ನು ಬಲಿಕೊಟ್ಟಾಗಲೆಲ್ಲಾ ದೇಶವು ಭಾರಿ ಬೆಲೆಯನ್ನು ತೆರಬೇಕಾಗಿ ಬಂದಿದೆ. ಹಿಂದೆ ನಡೆದ ಓಸ್ಲೋ ಒಪ್ಪಂದ, 2006ರ ಲೆಬನಾನ್ ಒಪ್ಪಂದ ಹಾಗೂ ಗಾಜಾದ ಮೇಲಿನ ಪ್ರತಿಯೊಂದು ಕದನ ವಿರಾಮ ಅಥವಾ ನಿರ್ಬಂಧದ ಅವಧಿಯಲ್ಲೂ ಇಸ್ರೇಲ್ ರಕ್ತದ ಬೆಲೆಯನ್ನು ಪಾವತಿಸಿದೆ. ನಾವು ಅಮೆರಿಕವನ್ನು ಪ್ರೀತಿಸುತ್ತೇವೆ ಮತ್ತು ಅಧ್ಯಕ್ಷ ಟ್ರಂಪ್ ಅವರ ನಿರ್ಧಾರಗಳಿಗೆ ಕೃತಜ್ಞರಾಗಿರುತ್ತೇವೆ. ಆದರೆ ಇಸ್ರೇಲ್ ಯಾವುದೇ ಕಾರಣಕ್ಕೂ 'ಬನಾನ ರಿಪಬ್ಲಿಕ್' (ದುರ್ಬಲ ರಾಷ್ಟ್ರ) ಅಲ್ಲ ಎಂದು ಅವರು ಕಠಿಣ ಪದಗಳಲ್ಲಿ ಎಚ್ಚರಿಸಿದ್ದಾರೆ. ಲೆಬನಾನ್‌ನಿಂದ ಇಸ್ರೇಲ್‌ನತ್ತ ಗುರಿಯಿಟ್ಟು ಬರುವ ಪ್ರತಿಯೊಂದು ಡ್ರೋನ್ ಮತ್ತು ಕ್ಷಿಪಣಿಗೂ ಇಸ್ರೇಲ್ ಸೇನೆ ತಕ್ಕ ಪ್ರತ್ಯುತ್ತರ ನೀಡಲಿದೆ. ದೇಶದ ಭದ್ರತೆಯನ್ನು ಖಾತರಿಪಡಿಸದ ಇಂತಹ ಯಾವುದೇ ಒಪ್ಪಂದಗಳಿಗೆ ಇಸ್ರೇಲ್ ಒಪ್ಪಿಗೆ ನೀಡುವುದಿಲ್ಲ. ಉಗ್ರಗಾಮಿ ಸಂಘಟನೆಯಾದ ಹೆಜ್ಬೊಲ್ಲಾವನ್ನು ಸಂಪೂರ್ಣವಾಗಿ ಕಿತ್ತುಹಾಕುವವರೆಗೂ ನಮ್ಮ ಹೋರಾಟ ನಿಲ್ಲುವುದಿಲ್ಲ ಮತ್ತು ಅದಕ್ಕಿಂತ ಕಡಿಮೆ ಮಟ್ಟದ ಯಾವುದೇ ಒಪ್ಪಂದಕ್ಕೆ ನಾವು ರಾಜಿ ಮಾಡಿಕೊಳ್ಳುವುದಿಲ್ಲ. ನಮ್ಮ ಸೈನಿಕರು ಪ್ರಾಣದ ಹಂಗು ತೊರೆದು ವಶಪಡಿಸಿಕೊಂಡಿರುವ ಮತ್ತು ಭಯೋತ್ಪಾದಕ ಮೂಲಸೌಕರ್ಯಗಳನ್ನು ತೆರವುಗೊಳಿಸಿರುವ ಯಾವುದೇ ಪ್ರದೇಶದಿಂದ ಇಸ್ರೇಲ್ ಹಿಂದೆ ಸರಿಯುವ ಪ್ರಶ್ನೆಯೇ ಇಲ್ಲ. ಇಸ್ರೇಲ್ ಮೇಲೆ ದಾಳಿ ನಡೆಯುತ್ತಿರುವಾಗ ನಾವು ಖಂಡಿತವಾಗಿಯೂ ಮೌನವಾಗಿರಲು ಸಾಧ್ಯವಿಲ್ಲ ಎಂದು ಬೆನ್ ಗ್ವಿರ್ ತಮ್ಮ ಕಠಿಣ ನಿಲುವನ್ನು ವ್ಯಕ್ತಪಡಿಸಿದ್ದಾರೆ.