ಜಾಹೀರಾತು
ನ್ಯೂ ಯಾರ್ಕ್ : ಜಗತ್ತಿನ ಮಹಾನ್ ಉದ್ಯಮಿ ಮತ್ತು ಟೆಕ್ ದಂತಕಥೆ ಎಲೋನ್ ಮಸ್ಕ್ ಈಗ ಜಗತ್ತಿನ ಇತಿಹಾಸದಲ್ಲೇ ಮೊದಲ ಟ್ರಿಲಿಯನೇರ್ (ಲಕ್ಷ ಕೋಟಿ ಡಾಲರ್ ಒಡೆಯ) ಎಂಬ ಐತಿಹಾಸಿಕ ಮತ್ತು ಅದ್ಭುತ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಮಸ್ಕ್ ಒಡೆತನದ ಬಾಹ್ಯಾಕಾಶ ಸಂಸ್ಥೆಯಾದ ಸ್ಪೇಸ್ಎಕ್ಸ್ ಜಾಗತಿಕ ಷೇರು ಮಾರುಕಟ್ಟೆಗೆ ಲಗ್ಗೆ ಇಟ್ಟ ಬೆನ್ನಲ್ಲೇ, ಅವರ ಆಸ್ತಿ ಮೌಲ್ಯವು ಜಗತ್ತಿನ ಯಾವುದೇ ವ್ಯಕ್ತಿ ಇದುವರೆಗೆ ತಲುಪದ ಅತಿ ದೊಡ್ಡ ಮೈಲಿಗಲ್ಲನ್ನು ದಾಟಿದೆ. ವಾಲ್ ಸ್ಟ್ರೀಟ್ನ ನಾಸ್ದಾಕ್ (Nasdaq) ಮಾರುಕಟ್ಟೆಯಲ್ಲಿ 'SPCX' ಹೆಸರಿನಲ್ಲಿ ಸ್ಪೇಸ್ಎಕ್ಸ್ ವಹಿವಾಟು ಆರಂಭಿಸುತ್ತಿದ್ದಂತೆ ಷೇರುಗಳು ಶೇಕಡಾ 11 ಕ್ಕೂ ಹೆಚ್ಚು ಜಿಗಿತ ಕಂಡು 150 ಡಾಲರ್ ತಲುಪಿದ್ದು, ಮಸ್ಕ್ ಸಂಪತ್ತನ್ನು ಗಗನಕ್ಕೇರಿಸಿದೆ.
ಷೇರು ಮಾರುಕಟ್ಟೆಯ ಇತಿಹಾಸದಲ್ಲೇ ಸಾರ್ವಕಾಲಿಕ ಬೃಹತ್ ಐಪಿಒ (IPO) ಪ್ರಕ್ರಿಯೆಯನ್ನು ಸ್ಪೇಸ್ಎಕ್ಸ್ ಪೂರ್ಣಗೊಳಿಸುವ ಮೂಲಕ ಸೌದಿ ಅರಾಮ್ಕೋದ ದಾಖಲೆಯನ್ನು ಧೂಳಿಪಟ ಮಾಡಿದೆ. ಈ ವಿಶ್ವ ದಾಖಲೆಯ ಐಪಿಒನಲ್ಲಿ ಪ್ರತಿ ಷೇರಿಗೆ 135 ಡಾಲರ್ನಂತೆ ಒಟ್ಟು 55.56 ಕೋಟಿ ಷೇರುಗಳನ್ನು ಮಾರಾಟ ಮಾಡಿ, ಬರೋಬ್ಬರಿ 75 ಬಿಲಿಯನ್ ಡಾಲರ್ (ಸುಮಾರು 6.2 ಲಕ್ಷ ಕೋಟಿ ರೂಪಾಯಿ) ಬಂಡವಾಳವನ್ನು ಮಾರುಕಟ್ಟೆಯಿಂದ ಬಾಚಿಕೊಳ್ಳಲಾಗಿದೆ. ಕಂಪನಿಗೆ ಕೇವಲ 75 ಬಿಲಿಯನ್ ಡಾಲರ್ ಅಗತ್ಯವಿತ್ತು, ಆದರೆ ಮಾರುಕಟ್ಟೆಯಲ್ಲಿ ಸೃಷ್ಟಿಯಾಗಿದ್ದ ಭೀಕರ ಕ್ರೇಜ್ನಿಂದಾಗಿ ಹೂಡಿಕೆದಾರರು ಬರೋಬ್ಬರಿ 250 ಬಿಲಿಯನ್ ಡಾಲರ್ (20 ಲಕ್ಷ ಕೋಟಿ ರೂಪಾಯಿಗೂ ಅಧಿಕ) ಹಣ ಹೂಡಲು ಬಿಡ್ ಸಲ್ಲಿಸಿ ಮುಗಿಬಿದ್ದಿದ್ದರು.
ಇದರೊಂದಿಗೆ 2019 ರಲ್ಲಿ ಸೌದಿಯ ತೈಲ ಸಂಸ್ಥೆ ಸೌದಿ ಅರಾಮ್ಕೋ (29.4 ಬಿಲಿಯನ್ ಡಾಲರ್) ನಿರ್ಮಿಸಿದ್ದ ಜಗತ್ತಿನ ಅತಿ ದೊಡ್ಡ ಐಪಿಒ ದಾಖಲೆಯನ್ನು ಸ್ಪೇಸ್ಎಕ್ಸ್ ಎರಡೂವರೆ ಪಟ್ಟು ಹೆಚ್ಚು ಹಣ ಸಂಗ್ರಹಿಸುವ ಮೂಲಕ ಮಕಾಡೆ ಮಲಗಿಸಿದೆ. ಐಪಿಒ ನಂತರ ಕಂಪನಿಯ ಒಟ್ಟು ಮಾರುಕಟ್ಟೆ ಮೌಲ್ಯ 2 ಟ್ರಿಲಿಯನ್ ಡಾಲರ್ ದಾಟಿದ್ದು, ಅಮೆರಿಕದ 6ನೇ ಅತಿ ದೊಡ್ಡ ಸಾರ್ವಜನಿಕ ಕಂಪನಿಯಾಗಿ ಹೊರಹೊಮ್ಮಿದೆ. ಐಪಿಒ ಆರಂಭಕ್ಕೂ ಮುನ್ನ ಮಸ್ಕ್ ಆಸ್ತಿ ಸುಮಾರು 780 ಬಿಲಿಯನ್ ಡಾಲರ್ ಇತ್ತು. ಆದರೆ ಸ್ಪೇಸ್ಎಕ್ಸ್ ಲಿಸ್ಟ್ ಆದ ತಕ್ಷಣ ಮಸ್ಕ್ ಹೊಂದಿರುವ ಶೇಕಡಾ 82.4 ರಷ್ಟು ಪಾಲಿನ ಮೌಲ್ಯವೇ ಬರೋಬ್ಬರಿ 866 ಬಿಲಿಯನ್ ಡಾಲರ್ ತಲುಪಿದೆ. ಇದನ್ನು ಅವರ ಟೆಸ್ಲಾ (Tesla) ಕಂಪನಿಯ 280 ಬಿಲಿಯನ್ ಡಾಲರ್ ಷೇರುಗಳು ಹಾಗೂ ಇತರ ಹೂಡಿಕೆಗಳೊಂದಿಗೆ ಒಟ್ಟುಗೂಡಿಸಿದಾಗ, ಮಸ್ಕ್ ಅವರ ನಿವ್ವಳ ಆಸ್ತಿ ಮೌಲ್ಯ 1.1 ಟ್ರಿಲಿಯನ್ ಡಾಲರ್ ಗಡಿಯನ್ನು ದಾಟಿದೆ. ಭಾರತೀಯ ರೂಪಾಯಿ ಮೌಲ್ಯದಲ್ಲಿ ಇದು ಸುಮಾರು 91 ಲಕ್ಷ ಕೋಟಿ ರೂಪಾಯಿಗಳಿಗಿಂತಲೂ ಹೆಚ್ಚಾಗಿದೆ.
ಎಲೋನ್ ಮಸ್ಕ್ ಅವರ ಈ ವೈಯಕ್ತಿಕ ಸಂಪತ್ತು ಜಗತ್ತಿನ ಹಲವು ಪ್ರಮುಖ ದೇಶಗಳಿಗಿಂತಲೂ ದೊಡ್ಡದಾಗಿದೆ. ಜಗತ್ತಿನ 2ನೇ ಶ್ರೀಮಂತ, ಗೂಗಲ್ ಸಹ-ಸ್ಥಾಪಕ ಲ್ಯಾರಿ ಪೇಜ್ (304 ಬಿಲಿಯನ್ ಡಾಲರ್) ಅವರಿಗಿಂತ ಮಸ್ಕ್ ಆಸ್ತಿ ಬರೋಬ್ಬರಿ ಮೂರು ಪಟ್ಟು ಹೆಚ್ಚಾಗಿದೆ. ಇಷ್ಟೇ ಅಲ್ಲದೆ, ಐರ್ಲೆಂಡ್, ತೈವಾನ್, ಸ್ವೀಡನ್ ಮತ್ತು ಸಿಂಗಾಪುರದಂತಹ ಪ್ರಗತಿಶೀಲ ದೇಶಗಳ ಒಟ್ಟು ಜಿಡಿಪಿಗಿಂತಲೂ (ದೇಶದ ಒಟ್ಟು ಆರ್ಥಿಕತೆ) ಮಸ್ಕ್ ಅವರ ವೈಯಕ್ತಿಕ ಆಸ್ತಿ ಮೌಲ್ಯ ದೊಡ್ಡದಾಗಿರುವುದು ಇಡೀ ವಿಶ್ವವೇ ಅವರತ್ತ ತಿರುಗಿ ನೋಡುವಂತೆ ಮಾಡಿದೆ.
