ಜಾಹೀರಾತು
ಯುಎಇ : ಅಮೆರಿಕ ಮತ್ತು ಇಸ್ರೇಲ್ ಇರಾನ್ ಮೇಲೆ ದಾಳಿ ನಡೆಸಿದಾಗ, ತಾವು ಯಾವುದೇ ಮಿಲಿಟರಿ ಕಾರ್ಯಾಚರಣೆಯಲ್ಲಿ ಭಾಗಿಯಾಗುವುದಿಲ್ಲ ಎಂದು ಬಹಿರಂಗವಾಗಿ ಘೋಷಿಸಿದ್ದ ಗಲ್ಫ್ ರಾಷ್ಟ್ರಗಳ ನಿಲುವಿಗೆ ಈಗ ಹೊಸದೊಂದು ತಿರುವು ಸಿಕ್ಕಿದೆ. ಇರಾನ್ ಮತ್ತು ಅಮೆರಿಕ ನಡುವೆ ಕದನ ವಿರಾಮ ಘೋಷಣೆಯಾದ ನಂತರವೂ, ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ) ಸದ್ದಿಲ್ಲದೆ ಇರಾನ್ ಮೇಲೆ ಸರಣಿ ವೈಮಾನಿಕ ದಾಳಿಗಳನ್ನು ನಡೆಸಿತ್ತು ಎಂದು ವಾಲ್ ಸ್ಟ್ರೀಟ್ ಜರ್ನಲ್ (WSJ) ವರದಿ ಮಾಡಿದೆ. ಅಮೆರಿಕ ಮತ್ತು ಇಸ್ರೇಲ್ನ ನಿಕಟ ಸಮನ್ವಯ ಹಾಗೂ ಗುಪ್ತಚರ ಮಾಹಿತಿಯ ಬೆಂಬಲದೊಂದಿಗೆ ಯುಎಇ ಈ ದಾಳಿಗಳನ್ನು ನಡೆಸಿತ್ತು ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ. ವರದಿಯ ಪ್ರಕಾರ, ಏಪ್ರಿಲ್ ತಿಂಗಳ ಆರಂಭದಲ್ಲಿ ಯುಎಇ ಇರಾನ್ನೊಳಗಿನ ಹಲವಾರು ಪ್ರಮುಖ ಇಂಧನ ಮತ್ತು ಮಿಲಿಟರಿ ಕೇಂದ್ರಗಳನ್ನು ಗುರಿಯಾಗಿಸಿಕೊಂಡು ದಾಳಿ ನಡೆಸಿತ್ತು. ಪರ್ಷಿಯನ್ ಕೊಲ್ಲಿಯಲ್ಲಿರುವ ಇರಾನ್ನ ಲಾವನ್ ದ್ವೀಪದ ತೈಲ ಸಂಸ್ಕರಣಾಗಾರ, ಹಾರ್ಮುಜ್ ಜಲಸಂಧಿಯ ಬಳಿಯ ಕಿಶ್ಮ್ ಮತ್ತು ಅಬು ಮುಸಾ ದ್ವೀಪಗಳು, ಬಂದರ್ ಅಬ್ಬಾಸ್ ಬಂದರು ಪ್ರದೇಶ ಹಾಗೂ ಇರಾನ್ನ ಬೃಹತ್ ಅಸಲುಯೆ ಪೆಟ್ರೋಕೆಮಿಕಲ್ ಮತ್ತು ಅನಿಲ ಸಂಕೀರ್ಣದ ಮೇಲೆ ಯುಎಇ ವಾಯುಪಡೆ ದಾಳಿ ನಡೆಸಿತ್ತು.
ಲಾವನ್ ದ್ವೀಪದ ತೈಲ ಸಂಸ್ಕರಣಾಗಾರದ ಮೇಲಿನ ದಾಳಿಯಿಂದಾಗಿ ಅಲ್ಲಿ ಭಾರಿ ಪ್ರಮಾಣದ ಬೆಂಕಿ ಕಾಣಿಸಿಕೊಂಡಿದ್ದು, ಹಲವು ತಿಂಗಳುಗಳ ಕಾಲ ಅದರ ಕಾರ್ಯಾಚರಣೆ ಸ್ಥಗಿತಗೊಳ್ಳುವಂತೆ ಮಾಡಿತ್ತು. ಅದರಲ್ಲೂ ವಿಶೇಷವಾಗಿ ಅಸಲುಯೆ ಇಂಧನ ಸೌಲಭ್ಯದ ಮೇಲೆ ಇಸ್ರೇಲ್ ಮತ್ತು ಯುಎಇ ಜಂಟಿಯಾಗಿ ನಡೆಸಿದ ದಾಳಿಯು ಅಂತರಾಷ್ಟ್ರೀಯ ಮಟ್ಟದಲ್ಲಿ ತೀವ್ರ ಕಳವಳವನ್ನು ಉಂಟುಮಾಡಿತು. ಇರಾನ್ನ ಇಂಧನ ಮೂಲಸೌಕರ್ಯಗಳ ಮೇಲಿನ ದಾಳಿಗಳು ಮುಂದುವರಿದರೆ, ಇಡೀ ಕೊಲ್ಲಿ ಪ್ರದೇಶವು ಯುದ್ಧದ ಜ್ವಾಲೆಯಲ್ಲಿ ಮುಳುಗಬಹುದು ಮತ್ತು ಜಾಗತಿಕ ತೈಲ ಮಾರುಕಟ್ಟೆಯ ಮೇಲೆ ಭಾರಿ ಹೊಡೆತ ಬೀಳಬಹುದು ಎಂಬ ಆತಂಕ ಸೃಷ್ಟಿಯಾಗಿತ್ತು. ಇದೇ ಕಾರಣಕ್ಕೆ ಇರಾನಿನ ಇಂಧನ ಸ್ಥಾವರಗಳ ಮೇಲಿನ ದಾಳಿಯನ್ನು ನಿಲ್ಲಿಸುವಂತೆ ಅಮೆರಿಕವು ಇಸ್ರೇಲ್ ಮೇಲೆ ಒತ್ತಡ ಹೇರಿತು ಎನ್ನಲಾಗಿದೆ. ಯುಎಇಯ ಈ ರಹಸ್ಯ ಮಿಲಿಟರಿ ಕ್ರಮವು ಗಲ್ಫ್ ವಲಯದ ಪ್ರಮುಖ ರಾಷ್ಟ್ರವಾದ ಸೌದಿ ಅರೇಬಿಯಾದ ತೀವ್ರ ಅಸಮಾಧಾನಕ್ಕೆ ಕಾರಣವಾಯಿತು. ಸೌದಿ ಅರೇಬಿಯಾ ಈ ಮಿಲಿಟರಿ ಕಾರ್ಯಾಚರಣೆಯಲ್ಲಿ ಭಾಗವಹಿಸಲು ನಿರಾಕರಿಸಿದ್ದರಿಂದ, ಯುಎಇ ಅಧ್ಯಕ್ಷ ಶೇಖ್ ಮೊಹಮ್ಮದ್ ಬಿನ್ ಜಾಯೆದ್ ಅವರು ಸೌದಿ ಕ್ರೌನ್ ಪ್ರಿನ್ಸ್ ಮೊಹಮ್ಮದ್ ಬಿನ್ ಸಲ್ಮಾನ್ ಅವರ ಮೇಲೆ ಅಸಮಾಧಾನಗೊಂಡಿದ್ದರು ಎಂದು ವರದಿ ಹೇಳುತ್ತದೆ. ಮತ್ತೊಂದೆಡೆ, ಯುಎಇ ನಡೆಸಿದ ದಾಳಿಗೆ ಇಡೀ ಗಲ್ಫ್ ಪ್ರದೇಶವೇ ಇರಾನ್ನ ಪ್ರತೀಕಾರವನ್ನು ಎದುರಿಸಬೇಕಾಗಬಹುದು ಎಂದು ಸೌದಿ ಅರೇಬಿಯಾ ಭಯಪಟ್ಟಿತ್ತು. ಈ ಹಿನ್ನೆಲೆಯಲ್ಲಿ ಸೌದಿ ನಾಯಕತ್ವವು ಅಮೆರಿಕದೊಂದಿಗೆ ಮಾತುಕತೆ ನಡೆಸಿ, ಯುಎಇಯ ಕ್ರಮಗಳು ಇರಾನಿನ ಪ್ರತೀಕಾರದ ದಾಳಿಯ ಅಪಾಯವನ್ನು ಹೆಚ್ಚಿಸುತ್ತಿವೆ ಎಂದು ಕಳವಳ ವ್ಯಕ್ತಪಡಿಸಿತ್ತು ಹಾಗೂ ರಾಜತಾಂತ್ರಿಕ ಮಾರ್ಗಗಳ ಮೂಲಕ ಬಿಕ್ಕಟ್ಟು ಶಮನಗೊಳಿಸಲು ಒತ್ತಾಯಿಸಿತ್ತು.
ಸೌದಿ ಅರೇಬಿಯಾ ಹೆದರಿದಂತೆಯೇ, ಇರಾನ್ ಈ ದಾಳಿಗಳ ವಿರುದ್ಧ ಯುಎಇ ಮೇಲೆ ಭೀಕರವಾಗಿ ಸೇಡು ತೀರಿಸಿಕೊಂಡಿತು. ಇರಾನ್ ಯುಎಇಯನ್ನು ಗುರಿಯಾಗಿಸಿ ಬ್ಯಾಲಿಸ್ಟಿಕ್ ಕ್ಷಿಪಣಿಗಳು, ಕ್ರೂಸ್ ಕ್ಷಿಪಣಿಗಳು ಮತ್ತು ಡ್ರೋನ್ಗಳ ಮೂಲಕ ಬೃಹತ್ ದಾಳಿಯನ್ನು ನಡೆಸಿತು. ಒಟ್ಟಾರೆಯಾಗಿ 2,800 ಕ್ಕೂ ಹೆಚ್ಚು ಸ್ಫೋಟಕಗಳನ್ನು ಯುಎಇ ಕಡೆಗೆ ಹಾರಿಸಲಾಯಿತು. ಈ ವಿನಾಶಕಾರಿ ದಾಳಿಗಳಲ್ಲಿ ಕನಿಷ್ಠ 13 ಜನರು ಸಾವನ್ನಪ್ಪಿದರು ಮತ್ತು 224 ಕ್ಕೂ ಹೆಚ್ಚು ಜನರು ಗಾಯಗೊಂಡರು. ಇರಾನ್ ದಾಳಿಯಿಂದಾಗಿ ದುಬೈ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದ ಟರ್ಮಿನಲ್ 3 ತೀವ್ರವಾಗಿ ಹಾನಿಗೊಳಗಾಯಿತು ಮತ್ತು ಜೆಬೆಲ್ ಅಲಿ ಬಂದರು ಪ್ರದೇಶದಲ್ಲಿ ಭಾರಿ ಬೆಂಕಿ ಕಾಣಿಸಿಕೊಂಡಿತು. ಇದರೊಂದಿಗೆ ಫುಜೈರಾ ಪೆಟ್ರೋಲಿಯಂ ಕೇಂದ್ರದಲ್ಲಿದ್ದ ಎರಡು ದೊಡ್ಡ ತೈಲ ಸಂಗ್ರಹ ಟ್ಯಾಂಕ್ಗಳು ಹಲವಾರು ದಿನಗಳವರೆಗೆ ಹೊತ್ತಿ ಉರಿದವು. ಇದುವರೆಗೆ ಗಲ್ಫ್ ಪ್ರದೇಶದ ಅತ್ಯಂತ ಸುರಕ್ಷಿತ ವ್ಯಾಪಾರ ಮತ್ತು ಹಣಕಾಸು ಕೇಂದ್ರವೆಂದು ಪರಿಗಣಿಸಲ್ಪಟ್ಟಿದ್ದ ಯುಎಇ, ಈ ಯುದ್ಧದಿಂದ ನೇರವಾಗಿ ತತ್ತರಿಸುವಂತಾಯಿತು.
ಈ ಬಿಕ್ಕಟ್ಟು ಯುಎಇಗೆ ಕೇವಲ ಮಿಲಿಟರಿ ಮಟ್ಟದಲ್ಲಿ ಮಾತ್ರವಲ್ಲದೆ ಆರ್ಥಿಕವಾಗಿಯೂ ಭಾರಿ ದೊಡ್ಡ ಹೊಡೆತವನ್ನು ನೀಡಿತು. ದಾಳಿಗಳ ಬೆನ್ನಲ್ಲೇ ದುಬೈ ಮತ್ತು ಅಬುಧಾಬಿ ಷೇರು ಮಾರುಕಟ್ಟೆಗಳಿಂದ ಸುಮಾರು $120 ಬಿಲಿಯನ್ ಮೌಲ್ಯದ ಸಂಪತ್ತು ನಾಶವಾಯಿತು. ಯುಎಇಯ ರಿಯಲ್ ಎಸ್ಟೇಟ್ ಮಾರುಕಟ್ಟೆ ಮಂದಗತಿಯನ್ನು ಅನುಭವಿಸಿತು ಮತ್ತು ಕೆಲವು ಪ್ರಮುಖ ಪ್ರದೇಶಗಳಲ್ಲಿ ಆಸ್ತಿ ಬೆಲೆಗಳು ಶೇಕಡಾ 15 ರಷ್ಟು ಕುಸಿದವು. ವಿಮಾನ ನಿಲ್ದಾಣಗಳ ಕಾರ್ಯಾಚರಣೆ ಸಂಪೂರ್ಣ ಅಸ್ತವ್ಯಸ್ತಗೊಂಡಿತು ಹಾಗೂ ಹಾರ್ಮುಜ್ ಜಲಸಂಧಿಯಲ್ಲಿ ಉಂಟಾದ ದಿಗ್ಬಂಧನವು ಪ್ರಾದೇಶಿಕ ವ್ಯಾಪಾರ ಮತ್ತು ಇಂಧನ ಪೂರೈಕೆಯ ಮೇಲೆ ತೀವ್ರ ಪರಿಣಾಮ ಬೀರಿತು. ಇಡೀ ಬಿಕ್ಕಟ್ಟಿನ ಪರಿಣಾಮವಾಗಿ ಯುಎಇಯ ಒಟ್ಟು ದೇಶೀಯ ಉತ್ಪನ್ನಕ್ಕೆ (ಜಿಡಿಪಿ) ಸರಿಸುಮಾರು ಶೇಕಡಾ 5 ರಷ್ಟು ನಷ್ಟ ಉಂಟಾಗಬಹುದು ಎಂದು ವಿಶ್ವಸಂಸ್ಥೆಯ ಅಭಿವೃದ್ಧಿ ಕಾರ್ಯಕ್ರಮ (UNDP) ಅಂದಾಜಿಸಿದೆ.
