ಅಮೇರಿಕ : ​ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಮಹತ್ವಾಕಾಂಕ್ಷೆಯ ಆರ್ಥಿಕ ನೀತಿಗೆ ತೀವ್ರ ಹಿನ್ನಡೆಯಾಗಿದ್ದು, ಅವರು ವಿಧಿಸಿದ್ದ 10% ಜಾಗತಿಕ ಸುಂಕಗಳನ್ನು ಫೆಡರಲ್ ನ್ಯಾಯಾಲಯವು ಕಾನೂನುಬಾಹಿರ ಎಂದು ಘೋಷಿಸಿದೆ. ಯುಎಸ್ ಅಂತಾರಾಷ್ಟ್ರೀಯ ವ್ಯಾಪಾರ ನ್ಯಾಯಾಲಯದ ಮೂವರು ನ್ಯಾಯಾಧೀಶರ ಪೀಠವು 2-1 ಮತಗಳ ಅಂತರದಿಂದ ಈ ಮಹತ್ವದ ತೀರ್ಪು ನೀಡಿದ್ದು, 1974ರ ವ್ಯಾಪಾರ ಕಾಯ್ದೆಯ ಸೆಕ್ಷನ್ 122ರ ಅಡಿಯಲ್ಲಿ ಇಂತಹ ಸುಂಕಗಳನ್ನು ವಿಧಿಸಲು ಆಡಳಿತ ಮಂಡಳಿಗೆ ಸಾಕಷ್ಟು ಆಧಾರಗಳಿಲ್ಲ ಎಂದು ಸ್ಪಷ್ಟಪಡಿಸಿದೆ. ಕಾಂಗ್ರೆಸ್ ಅನುಮೋದನೆಯಿಲ್ಲದೆ ಎಲ್ಲಾ ಆಮದುಗಳ ಮೇಲೆ ಸುಂಕ ಹೇರಲು ಸರ್ಕಾರ ಪ್ರಯತ್ನಿಸಿರುವುದು ಕಾನೂನುಬಾಹಿರ ಎಂದು ಸಿಎನ್‌ಎನ್ ವರದಿ ಮಾಡಿದೆ.

​ಈ ತೀರ್ಪಿನ ಪ್ರಕಾರ, ಮೊಕದ್ದಮೆ ಹೂಡಿರುವ ಕಂಪನಿಗಳಿಗೆ ಇನ್ನು ಮುಂದೆ ಸುಂಕ ಅನ್ವಯಿಸುವುದಿಲ್ಲ ಮತ್ತು ಅವರಿಂದ ಈ ಹಿಂದೆ ಸಂಗ್ರಹಿಸಲಾದ ಹಣವನ್ನು ಸರ್ಕಾರ ಮರುಪಾವತಿಸಬೇಕಾಗುತ್ತದೆ. ವಿಶೇಷವೆಂದರೆ, ಸೆಕ್ಷನ್ 122ರ ಅಡಿಯಲ್ಲಿ ಅಧ್ಯಕ್ಷರು ಶೇಕಡಾ 15ರವರೆಗೆ ಸುಂಕ ವಿಧಿಸಲು ಅವಕಾಶವಿದ್ದರೂ, ಅಮೆರಿಕದಲ್ಲಿ ಪ್ರಸ್ತುತ 'ಪಾವತಿ ಸಮತೋಲನ'ದ ಗಂಭೀರ ಬಿಕ್ಕಟ್ಟು ಇರುವುದನ್ನು ಸಾಬೀತುಪಡಿಸಲು ಸರ್ಕಾರ ವಿಫಲವಾಗಿದೆ ಎಂದು ನ್ಯಾಯಾಧೀಶರು ಅಭಿಪ್ರಾಯಪಟ್ಟಿದ್ದಾರೆ. ಈಗಾಗಲೇ ಫೆಬ್ರವರಿಯಲ್ಲಿ ಸುಪ್ರೀಂ ಕೋರ್ಟ್‌ನಿಂದಲೂ ಇಂತಹದೇ ಕಾನೂನು ಸವಾಲು ಎದುರಿಸಿದ್ದ ಟ್ರಂಪ್ ಆಡಳಿತಕ್ಕೆ ಈ ಹೊಸ ತೀರ್ಪು ಮತ್ತಷ್ಟು ಸಂಕಷ್ಟ ತಂದೊಡ್ಡಿದೆ. ಸದ್ಯಕ್ಕೆ ಈ ಆದೇಶವು ದೂರುದಾರರಿಗೆ ಮಾತ್ರ ಸೀಮಿತವಾಗಿದ್ದರೂ, ಟ್ರಂಪ್ ಅವರ ಒಟ್ಟಾರೆ ಸುಂಕ ನೀತಿಯ ಅಸ್ತಿತ್ವವನ್ನೇ ಇದು ಪ್ರಶ್ನಿಸುವಂತೆ ಮಾಡಿದ್ದು, ಆಡಳಿತ ಮಂಡಳಿಯು ಈ ತೀರ್ಪಿನ ವಿರುದ್ಧ ಮೇಲ್ಮನವಿ ಸಲ್ಲಿಸಲು ಸಿದ್ಧತೆ ನಡೆಸುತ್ತಿದೆ.