ಜಾಹೀರಾತು
ಇಸ್ಲಾಮಾಬಾದ್: ಪಾಕಿಸ್ತಾನದ ಬಾಹ್ಯಾಕಾಶ ಸಂಸ್ಥೆಯಾದ ಸುಪಾರ್ಕೊ (SUPARCO), ಇತ್ತೀಚೆಗಷ್ಟೇ ತನ್ನ ಇಒ-3 (EO-3) ಭೂ ವೀಕ್ಷಣಾ ಉಪಗ್ರಹವನ್ನು ಚೀನಾದ ತೈಯುನ್ ಉಡಾವಣಾ ಕೇಂದ್ರದಿಂದ ಯಶಸ್ವಿಯಾಗಿ ಕಕ್ಷೆಗೆ ಸೇರಿಸಿತ್ತು. ಈ ಐತಿಹಾಸಿಕ ಕ್ಷಣವನ್ನು ದೇಶದ ಜನತೆ ಸಾಮಾಜಿಕ ಜಾಲತಾಣಗಳಲ್ಲಿ ಸಂಭ್ರಮದಿಂದ ಆಚರಿಸುತ್ತಿದ್ದರು. ಈ ಸಂಭ್ರಮಕ್ಕೆ ಮತ್ತಷ್ಟು ಪುಷ್ಟಿ ನೀಡಿದ್ದು ಸುಪಾರ್ಕೊ ಬಿಡುಗಡೆ ಮಾಡಿದ ಕರಾಚಿ ಪೋರ್ಟ್ನ ಹೈ-ರೆಸಲ್ಯೂಷನ್ ಚಿತ್ರ. ಹೊಸ ಉಪಗ್ರಹ ಕಳುಹಿಸಿದ ಮೊದಲ ಚಿತ್ರ ಎಂದು ಬಿಂಬಿತವಾಗಿದ್ದ ಈ ಫೋಟೋ ಪಾಕಿಸ್ತಾನದ ಬಾಹ್ಯಾಕಾಶ ಶಕ್ತಿಯ ಸಂಕೇತವಾಗಿ ವೈರಲ್ ಆಗಿತ್ತು. ಆದರೆ, ಈ ಸಡಗರ ಕೇವಲ ಕೆಲವೇ ಗಂಟೆಗಳಲ್ಲಿ ಕಮರಿ ಹೋಗಿದೆ.
ಸ್ವತಂತ್ರ ಸಂಶೋಧಕರು ಈ ಫೋಟೋದ ಮೆಟಾಡೇಟಾ ಮತ್ತು ಟೈಮ್ಸ್ಟ್ಯಾಂಪ್ ಪರಿಶೀಲಿಸಿದಾಗ ಆಘಾತಕಾರಿ ಸತ್ಯವೊಂದು ಬಯಲಾಗಿದೆ. ಸುಪಾರ್ಕೊ ತನ್ನ ವೆಬ್ಸೈಟ್ನಲ್ಲಿ ಹಂಚಿಕೊಂಡಿದ್ದ ಆ ಚಿತ್ರವು ಇಒ-3 ಉಪಗ್ರಹ ಉಡಾವಣೆಗೂ ಮುನ್ನ, ಅಂದರೆ 2025ರಲ್ಲೇ ತೆಗೆದ ಹಳೆಯ ಚಿತ್ರವಾಗಿತ್ತು. ಸಾವಿರಾರು ಜನರು ಹೆಮ್ಮೆಯಿಂದ ಹಂಚಿಕೊಂಡಿದ್ದ ಈ ಚಿತ್ರಕ್ಕೂ ಹೊಸ ಸ್ಯಾಟಲೈಟ್ಗೂ ಯಾವುದೇ ಸಂಬಂಧವಿಲ್ಲ ಎಂಬುದು ಈಗ ಸಾಬೀತಾಗಿದೆ. ಸಾಧನೆಯನ್ನು ತೋರಿಸಿಕೊಳ್ಳುವ ಆತುರದಲ್ಲಿ ಸಂಸ್ಥೆಯು ಹಳೆಯ ಚಿತ್ರವನ್ನು ಹೊಸದರಂತೆ ಬಿಂಬಿಸಿ ಜಗತ್ತಿನ ಮುಂದೆ ಮುಜುಗರಕ್ಕೀಡಾಗಿದೆ.
ವಿಪರ್ಯಾಸವೆಂದರೆ, ಸುಪಾರ್ಕೊ ಸಂಸ್ಥೆಯ ಇತಿಹಾಸ ಇಂತಹ ಅತಿಶಯೋಕ್ತಿ ಮತ್ತು ವೈಫಲ್ಯಗಳಿಂದಲೇ ಕೂಡಿದೆ. ಭಾರತದ ಇಸ್ರೋ (ISRO) ಸ್ಥಾಪನೆಯಾಗುವುದಕ್ಕಿಂತ ಎಂಟು ವರ್ಷಗಳ ಮೊದಲೇ ಅಸ್ತಿತ್ವಕ್ಕೆ ಬಂದಿದ್ದರೂ, ಪಾಕಿಸ್ತಾನದ ಬಾಹ್ಯಾಕಾಶ ಸಂಸ್ಥೆಯು ಪ್ರಚಾರಕ್ಕೆ ನೀಡಿದ ಆದ್ಯತೆಯನ್ನು ತಾಂತ್ರಿಕ ಬೆಳವಣಿಗೆಗೆ ನೀಡಲಿಲ್ಲ. 1984ರಲ್ಲಿ ಐಟಿಯು (ITU) ನೀಡಿದ್ದ 5 ಪ್ರಮುಖ ಆರ್ಬಿಟಲ್ ಸ್ಲಾಟ್ಗಳನ್ನು ಬಳಸಿಕೊಳ್ಳುವಲ್ಲಿ ವಿಫಲವಾದ ಪಾಕಿಸ್ತಾನ, 1995ರ ವೇಳೆಗೆ ತನ್ನ 4 ಅಮೂಲ್ಯ ಜಿಯೋಸ್ಟೇಷನರಿ ಸ್ಲಾಟ್ಗಳನ್ನು ಕಳೆದುಕೊಂಡಿತು.
2001ರಲ್ಲಿ ಬದ್ರ್-ಬಿ (Badr-B) ಉಪಗ್ರಹ ಉಡಾವಣೆಯಾದಾಗಲೂ ಇದೇ ರೀತಿಯ ಭಾರಿ ಪ್ರಚಾರ ನೀಡಲಾಗಿತ್ತು. ಆದರೆ ಉಡಾವಣೆಯಾದ ಕೆಲವೇ ದಿನಗಳಲ್ಲಿ ಅದು ನಿಯಂತ್ರಣ ತಪ್ಪಿ ಬಾಹ್ಯಾಕಾಶದಲ್ಲಿ ಕಣ್ಮರೆಯಾದಾಗ, ಸಂಸ್ಥೆಯು ಆ ಬಗ್ಗೆ ಸಾರ್ವಜನಿಕರಿಗೆ ಯಾವುದೇ ಸ್ಪಷ್ಟನೆ ನೀಡದೆ ಮೌನಕ್ಕೆ ಶರಣಾಗಿತ್ತು. ಅಷ್ಟೇ ಅಲ್ಲದೆ, 2002ರಲ್ಲಿ ಅಂದಿನ ಅಧ್ಯಕ್ಷ ಪರ್ವೇಜ್ ಮುಷರಫ್ ಅವರು 'ಪಾಕ್ಸ್ಯಾಟ್-1' ಮೂಲಕ ನಾವು ಭಾರತಕ್ಕಿಂತ ಮುಂದಿದ್ದೇವೆ ಎಂದು ಘೋಷಿಸಿದ್ದರು. ಆದರೆ ವಾಸ್ತವದಲ್ಲಿ, ಅದು ಇಂಡೋನೇಷ್ಯಾ ದೇಶವು ಬ್ಯಾಟರಿ ಸಮಸ್ಯೆಯಿಂದಾಗಿ ಕೇವಲ 5 ಮಿಲಿಯನ್ ಡಾಲರ್ಗೆ ಪಾಕಿಸ್ತಾನಕ್ಕೆ ಮಾರಾಟ ಮಾಡಿದ್ದ ಹಳೆಯ ಉಪಗ್ರಹವಾಗಿತ್ತು.
ಪ್ರಸ್ತುತ ಉಡಾವಣೆಗೊಂಡಿರುವ ಇಒ-3 ಉಪಗ್ರಹವು ಪಾಕಿಸ್ತಾನದಲ್ಲೇ ವಿನ್ಯಾಸಗೊಂಡಿದ್ದು, ಕೃಷಿ ಮತ್ತು ರಾಷ್ಟ್ರೀಯ ಭದ್ರತೆಯ ದೃಷ್ಟಿಯಿಂದ ಪ್ರಮುಖವಾಗಿದೆ ಎನ್ನಲಾಗುತ್ತಿದೆ. ಆದರೂ, ಇಂದಿನ ಡಿಜಿಟಲ್ ಯುಗದಲ್ಲಿ ಮುಕ್ತ ಮೂಲ ಸಂಶೋಧಕರು ಕ್ಷಣಾರ್ಧದಲ್ಲಿ ಸುಳ್ಳನ್ನು ಬಯಲು ಮಾಡುತ್ತಿರುವುದು ಸುಪಾರ್ಕೊದ ವಿಶ್ವಾಸಾರ್ಹತೆಗೆ ದೊಡ್ಡ ಹೊಡೆತ ನೀಡಿದೆ. ನಿಜವಾದ ಸಾಧನೆ ಮಾಡಿದ್ದರೂ, ಅನಗತ್ಯ ಸುಳ್ಳು ಪ್ರಚಾರದ ಹಪಾಹಪಿಯಿಂದಾಗಿ ಪಾಕಿಸ್ತಾನದ ಬಾಹ್ಯಾಕಾಶ ಕಾರ್ಯಕ್ರಮ ಮತ್ತೊಮ್ಮೆ ಜಗತ್ತಿನ ಮುಂದೆ ಹಾಸ್ಯಾಸ್ಪದವಾಗಿ ಕಂಡುಬರುತ್ತಿದೆ.
