ಜೋಸ್ : ಈಶಾನ್ಯ ನೈಜೀರಿಯಾದ ಅಡಮಾವಾ ರಾಜ್ಯದಲ್ಲಿ ಭಾನುವಾರ ಭೀಕರ ಗುಂಡಿನ ದಾಳಿ ನಡೆದಿದ್ದು, ಫುಟ್ಬಾಲ್ ಮೈದಾನದಲ್ಲಿ ಜಮಾಯಿಸಿದ್ದ 29 ಮಂದಿ ಸಾವನ್ನಪ್ಪಿದ್ದಾರೆ. ಕ್ಯಾಮರೂನ್ ಗಡಿಗೆ ಹೊಂದಿಕೊಂಡಿರುವ ಗೊಂಬಿ ಸ್ಥಳೀಯ ಸರ್ಕಾರಿ ವ್ಯಾಪ್ತಿಯ ಗಯಾಕು ಸಮುದಾಯದ ಮೇಲೆ ಈ ದಾಳಿ ನಡೆದಿದೆ ಎಂದು ರಾಜ್ಯ ಗವರ್ನರ್ ಅಹ್ಮದು ಉಮರು ಫಿಂಟಿರಿ ದೃಢಪಡಿಸಿದ್ದಾರೆ.

​ಗಯಾಕು ಸಮುದಾಯದ ಯುವಕರು ಫುಟ್ಬಾಲ್ ಆಟದಲ್ಲಿ ಮಗ್ನರಾಗಿದ್ದಾಗ ಮತ್ತು ಹಲವರು ಆಟ ವೀಕ್ಷಿಸಲು ಮೈದಾನದಲ್ಲಿ ಜಮಾಯಿಸಿದ್ದ ಸಂದರ್ಭದಲ್ಲಿ ನುಗ್ಗಿದ ಶಸ್ತ್ರಸಜ್ಜಿತ ದಾಳಿಕೋರರು ಮನಬಂದಂತೆ ಗುಂಡಿನ ಮಳೆಗರೆದಿದ್ದಾರೆ. ಮೃತರ ಪೈಕಿ ಬಹುತೇಕರು ಯುವಕರಾಗಿದ್ದು, ಆಟ ನೋಡಲು ಬಂದಿದ್ದ ಕೆಲವು ಮಹಿಳೆಯರು ಕೂಡ ಈ ಹಿಂಸಾಚಾರಕ್ಕೆ ಬಲಿಯಾಗಿದ್ದಾರೆ ಎಂದು ಎಎಫ್‌ಪಿ ವರದಿ ಮಾಡಿದೆ. ದಾಳಿಕೋರರು ಕೇವಲ ಗುಂಡಿನ ದಾಳಿ ನಡೆಸುವುದಲ್ಲದೆ, ಸ್ಥಳೀಯರ ಮನೆಗಳು, ಪೂಜಾ ಸ್ಥಳಗಳು ಹಾಗೂ ನೂರಾರು ಮೋಟಾರ್ ಸೈಕಲ್‌ಗಳಿಗೆ ಬೆಂಕಿ ಹಚ್ಚಿ ಸಾರ್ವಜನಿಕ ಆಸ್ತಿಪಾಸ್ತಿ ನಾಶಪಡಿಸಿದ್ದಾರೆ.

​ಈ ಭೀಕರ ಕೃತ್ಯಕ್ಕೆ ಈ ಭಾಗದಲ್ಲಿ ಸಕ್ರಿಯವಾಗಿರುವ ಬೊಕೊ ಹರಾಮ್ ಉಗ್ರಗಾಮಿ ಸಂಘಟನೆ ಕಾರಣವಿರಬಹುದು ಎಂದು ಗವರ್ನರ್ ಸಂಶಯ ವ್ಯಕ್ತಪಡಿಸಿದ್ದಾರೆ. ಆದರೆ, ಇಸ್ಲಾಮಿಕ್ ಸ್ಟೇಟ್‌ನ ಪಶ್ಚಿಮ ಆಫ್ರಿಕಾ ಪ್ರಾಂತ್ಯ (ISWAP) ಈ ದಾಳಿಯ ಹೊಣೆಯನ್ನು ಹೊತ್ತುಕೊಂಡಿದೆ. ಕ್ರೈಸ್ತ ಸಮುದಾಯವನ್ನು ಗುರಿಯಾಗಿಸಿಕೊಂಡು ಈ ದಾಳಿ ನಡೆಸಲಾಗಿದ್ದು, ಚರ್ಚ್ ಮತ್ತು ವಾಹನಗಳನ್ನು ಸುಟ್ಟುಹಾಕಲಾಗಿದೆ ಎಂದು ಉಗ್ರಗಾಮಿ ಗುಂಪು ಹೇಳಿಕೊಂಡಿರುವುದಾಗಿ ಸೈಟ್ ಮಾನಿಟರಿಂಗ್ ಸಂಸ್ಥೆ ತಿಳಿಸಿದೆ.

​ನೈಜೀರಿಯಾದಲ್ಲಿ ಸಾರ್ವತ್ರಿಕ ಚುನಾವಣೆಗಳು ಸಮೀಪಿಸುತ್ತಿರುವ ಬೆನ್ನಲ್ಲೇ ಈ ರೀತಿಯ ಮಾರಕ ದಾಳಿ ನಡೆದಿರುವುದು ಭದ್ರತಾ ವ್ಯವಸ್ಥೆಯ ಬಗ್ಗೆ ಆತಂಕ ಮೂಡಿಸಿದೆ. ಜಿಹಾದಿಗಳು, ಸ್ಥಳೀಯ ಕ್ರಿಮಿನಲ್ ಗ್ಯಾಂಗ್‌ಗಳು ಹಾಗೂ ಭೂಮಿಗಾಗಿ ನಡೆಯುವ ಕೋಮು ಹಿಂಸಾಚಾರದಿಂದ ಈ ಪ್ರದೇಶವು ದಶಕಗಳಿಂದ ಸಂಕಷ್ಟಕ್ಕೆ ಸಿಲುಕಿದೆ. ಸದ್ಯ ಘಟನಾ ಸ್ಥಳದಲ್ಲಿ ಬಿಗುವಿನ ವಾತಾವರಣವಿದ್ದು, ಭದ್ರತಾ ಪಡೆಗಳು ಶೋಧ ಕಾರ್ಯವನ್ನು ತೀವ್ರಗೊಳಿಸಿವೆ.