ಪಾಕಿಸ್ತಾನ : ಪಾಕಿಸ್ತಾನದಲ್ಲಿ ರಂಜಾನ್ ಮಾಸದ ಸಂದರ್ಭದಲ್ಲಿ ನಡೆದ ಒಂದು ಉನ್ನತ ಮಟ್ಟದ ಇಫ್ತಾರ್ ಸಭೆಯು ಈಗ ದೇಶಾದ್ಯಂತ ದೊಡ್ಡ ವಿವಾದವನ್ನು ಹುಟ್ಟುಹಾಕಿದೆ. ಮಾರ್ಚ್ 19ರಂದು ನಡೆದ ಈ ಸಭೆಯಲ್ಲಿ ಪಾಕಿಸ್ತಾನದ ಸೇನಾ ಮುಖ್ಯಸ್ಥ ಫೀಲ್ಡ್ ಮಾರ್ಷಲ್ ಅಸಿಮ್ ಮುನೀರ್ ದೇಶದ ಪ್ರಮುಖ ಶಿಯಾ ಧರ್ಮಗುರುಗಳೊಂದಿಗೆ ಮುಖಾಮುಖಿಯಾಗಿದ್ದರು. ಆದರೆ ಈ ಸಭೆಯು ಈಗ ರಾಷ್ಟ್ರೀಯ ಚರ್ಚೆಯ ವಿಷಯವಾಗಿದೆ. ಮೂಲಗಳ ಪ್ರಕಾರ ಮುನೀರ್​​ ಈ ಸಭೆಯಲ್ಲಿ ಶಿಯಾ ಸಮುದಾಯದವರಿಗೆ ಬೆದರಿಕೆ ಹಾಕಿದ್ದಾರೆ ಎನ್ನಲಾಗಿದೆ. ಸೇನಾ ಮುಖ್ಯಸ್ಥ ಮುನೀರ್​​ ಸುಮಾರು ಒಂದು ಗಂಟೆಯ ಕಾಲ ನಿರಂತರವಾಗಿ ಶಿಯಾ ಮುಖಂಡರೊಂದಿಗೆ ಮಾತನಾಡಿದರು. ಧರ್ಮಗುರುಗಳಿಗೆ ಪ್ರತಿಕ್ರಿಯಿಸಲು ಅಥವಾ ತಮ್ಮ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಲು ಯಾವುದೇ ಅವಕಾಶ ನೀಡಲಿಲ್ಲ ಎಂದು ಹಾಜರಿದ್ದವರು ಹೇಳುತ್ತಾರೆ.

ಈ ಸಭೆಯಲ್ಲಿ ವಾತಾವರಣ ತುಂಬಾ ಉದ್ವಿಗ್ನವಾಗಿತ್ತು ಮತ್ತು ಸಂಭಾಷಣೆ ಏಕಪಕ್ಷೀಯವಾಗಿತ್ತು ಎಂದು ಎಲ್ಲರೂ ಹೇಳಿದ್ದಾರೆ. ವಿವಾದದ ದೊಡ್ಡ ಕಾರಣವೆಂದರೆ ಜನರಲ್ ಅಸಿಮ್ ಮುನೀರ್ ಅವರ ಒಂದು ಹೇಳಿಕೆ. ಅವರು ಶಿಯಾ ಧರ್ಮಗುರುಗಳಿಗೆ 'ನಿಮಗೆ ಇರಾನ್ ಬಗ್ಗೆ ಅಷ್ಟೊಂದು ಪ್ರೀತಿ ಇದ್ದರೆ ಅಲ್ಲಿಗೆ ಹೋಗಿ' ಎಂದು ಹೇಳಿದ್ದಾರೆ ಎಂದು ವರದಿಗಳು ತಿಳಿಸಿವೆ. ಈ ಮಾತು ಶಿಯಾ ಸಮುದಾಯದ ಜನರನ್ನು ತುಂಬಾ ಕೋಪಗೊಳಿಸಿದೆ. ಅವರು ಇದನ್ನು ತಮ್ಮ ದೇಶಭಕ್ತಿಯನ್ನು ಪ್ರಶ್ನಿಸುವಂತಹ ಅವಮಾನಕರ ಹೇಳಿಕೆ ಎಂದು ಪರಿಗಣಿಸಿದ್ದಾರೆ. ಅನೇಕ ಧರ್ಮಗುರುಗಳು ಇದನ್ನು "ಸ್ವೀಕಾರಾರ್ಹವಲ್ಲ" ಎಂದು ತೀವ್ರವಾಗಿ ಖಂಡಿಸಿದ್ದಾರೆ.

ಮೌಲಾನಾ ಹಸ್ನೈನ್ ಅಬ್ಬಾಸ್ ಗಾರ್ಡೇಜಿ ಅವರು 'ಸಾಂವಿಧಾನಿಕ ಹುದ್ದೆಯಲ್ಲಿರುವ ಅಧಿಕಾರಿಯಿಂದ ಇಂತಹ ಭಾಷೆ ಬರಬಾರದು' ಎಂದು ಸ್ಪಷ್ಟವಾಗಿ ಹೇಳಿದ್ದಾರೆ. ಅಲ್ಲಮ ನಜೀರ್ ಅಬ್ಬಾಸ್ ತಕ್ವಿ ಅವರು 'ಸಭೆಯಲ್ಲಿ ಹಲವು ಬಾರಿ ಸಂಭಾಷಣೆಯಲ್ಲಿ ಭಾಗವಹಿಸಲು ಪ್ರಯತ್ನಿಸಿದೆವು. ಆದರೆ ಮಾತನಾಡಲು ಅವಕಾಶ ನಿರಾಕರಿಸಲಾಯಿತು' ಎಂದು ತಿಳಿಸಿದ್ದಾರೆ. ಭೋಜನದ ನಂತರ ಎರಡನೇ ಸಭೆ ನಡೆಸುವ ಭರವಸೆ ನೀಡಲಾಗಿತ್ತು. ಆದರೆ ಸೇನಾ ಮುಖ್ಯಸ್ಥರು ಹಠಾತ್ತನೆ ಅಲ್ಲಿಂದ ಹೊರಟುಹೋದರು ಎಂದು ವರದಿಯಾಗಿದೆ. ಈ ವಿವಾದವು ಪಾಕಿಸ್ತಾನದ ಧಾರ್ಮಿಕ ಮತ್ತು ರಾಜಕೀಯ ವಾತಾವರಣವನ್ನು ಮತ್ತಷ್ಟು ಬಿಸಿಮಾಡಿದೆ. ಶುಕ್ರವಾರ ಸೈಯದ್ ಜವಾದ್ ನಖ್ವಿ ಅವರು ಸೇನಾ ಮುಖ್ಯಸ್ಥರ ವರ್ತನೆಯ ಮೇಲೆ ನೇರ ದಾಳಿ ಮಾಡಿದ್ದಾರೆ. ಅವರು ಇದನ್ನು ಜನರಲ್ ಜಿಯಾ-ಉಲ್-ಹಕ್ ಅವರ ಕಾಲದ ನೀತಿಗಳಿಗೆ ಹೋಲಿಸಿದ್ದಾರೆ. ಆ ಯುಗದಲ್ಲಿ ಶಿಯಾ ಸಮುದಾಯದ ಮೇಲೆ ಹೇರಲಾಗಿದ್ದ ಒತ್ತಡ ಈಗ ಮತ್ತೆ ಕಾಣಿಸಿಕೊಳ್ಳುತ್ತಿದೆ ಎಂದು ಹೇಳಿದ್ದಾರೆ. ಪಾಕಿಸ್ತಾನ ಈಗ ತನ್ನದೇ ಆದ ರೀತಿಯಲ್ಲಿ ದೇಶಪ್ರೇಮವನ್ನು ವ್ಯಾಖ್ಯಾನಿಸುತ್ತಿದೆ. ಯಾವುದೇ ಧಾರ್ಮಿಕ ಅಥವಾ ಸೈದ್ಧಾಂತಿಕ ಸಂಬಂಧವನ್ನು ಅನುಮಾನದಿಂದ ನೋಡಲಾಗುತ್ತಿದೆ ಎಂದು ನಖ್ವಿ ಆರೋಪಿಸಿದ್ದಾರೆ. ಇರಾನ್‌ನೊಂದಿಗಿನ ಧಾರ್ಮಿಕ ಅಥವಾ ಭಾವನಾತ್ಮಕ ಸಂಬಂಧಗಳನ್ನು ದೇಶಕ್ಕೆ ವಿರುದ್ಧವಾಗಿ ಬಳಸುವುದು ಸುಳ್ಳು ನಿರೂಪಣೆ ಎಂದು ಅವರು ಸ್ಪಷ್ಟವಾಗಿ ಹೇಳಿದ್ದಾರೆ. ಉಲೇಮಾ ನಾಯಕರು ಮತ್ತೊಂದು ದೊಡ್ಡ ಆರೋಪವನ್ನು ಮಾಡಿದ್ದಾರೆ. ಸೇನೆಯ ಕೆಲವು ಕಾರ್ಯತಂತ್ರದ ನೀತಿಗಳು, ವಿಶೇಷವಾಗಿ ವಿದೇಶಿ ಶಕ್ತಿಗಳಿಗೆ ಮಿಲಿಟರಿ ನೆಲೆಗಳನ್ನು ಒದಗಿಸುವ ನಿರ್ಧಾರಗಳನ್ನು ಪ್ರಶ್ನಿಸುವವರನ್ನು ನಿಗ್ರಹಿಸಲು ಪ್ರಯತ್ನ ನಡೆಯುತ್ತಿದೆ ಎಂದು ಅವರು ಹೇಳುತ್ತಾರೆ. ಇದು ಧಾರ್ಮಿಕ ಸಮುದಾಯಗಳ ನಡುವಿನ ಒತ್ತಡವನ್ನು ಹೆಚ್ಚಿಸುತ್ತಿದೆ.