ಟೆಹ್ರಾನ್ : ಭಾರತ ಹಾಗೂ ಮಧ್ಯ ಏಷ್ಯಾ ನಡುವೆ ನೇರ ಮಾರ್ಗಕ್ಕೆ ಇರಾನ್‌ ನೊಂದಿಗೆ ಭಾರತ ಮಾಡಿಕೊಂಡಿದ್ದ ಮಹತ್ವಪೂರ್ಣ ಒಪ್ಪಂದ ಚಾಬಹಾರ್‌ ಬಂದರು ಯೋಜನೆ. ಆದರೆ, ಈ ಸಾಲಿನ ಬಜೆಟ್‌ ನಲ್ಲಿ ಭಾರತ ಈ ಚಾಬಹಾರ್‌ ಬಂದರು ಯೋಜನೆಗೆ ಯಾವುದೇ ಹಣವನ್ನು ಅನುಮೋದಿಸದಿರುವ ಬಗ್ಗೆ ಘೋಷಿಸಿದ್ದು, ಈ ಕುರಿತು ಇರಾನ್‌ ನ ವಿದೇಶಾಂಗ ಸಚಿವ ಅಬ್ಬಾಸ್‌ ಅರಘ್ಚಿ ಬೇಸರ ವ್ಯಕ್ತಪಡಿಸಿದ್ದಾರೆ. ಇರಾನ್‌ ವಿದೇಶಾಂಗ ಸಚಿವ ಅಂತಾರಾಷ್ಟ್ರೀಯ ಮಾಧ್ಯಮಕ್ಕೆ ನೀಡಿದ ಸಂದರ್ಶನದಲ್ಲಿ ಈ ಬಗ್ಗೆ ಹೇಳಿಕೊಂಡಿದ್ದಾರೆ. ಚಾಬಹಾರ್‌ ಬಂದರು ಯೋಜನೆಗೆ ಈ ಬಾರಿಯ ಕೇಂದ್ರ ಬಜೆಟ್‌ ನಲ್ಲಿ ಹಣವನ್ನು ಮೀಸಲಿಟ್ಟಿರುವುದಾಗಿ ಭಾರತ ಘೋಷಿಸದೆ ಇರುವುದು ನಿಮಗೆ ಬೇಸರವಿದೆಯೇ ಎಂದು ಸಂದರ್ಶಕರು ಕೇಳಿದ ಪ್ರಶ್ನೆಗೆ ಉತ್ತರಿಸಿದ ಇರಾನ್‌ ನ ವಿದೇಶಾಂಗ ಸಚಿವ ಅಬ್ಬಾಸ್‌ ಅರಘ್ಚಿ ಹೌದು ಎಂದು ತಿಳಿಸಿದ್ದಾರೆ. ಈ ಕುರಿತು ಮಾತನಾಡುತ್ತಾ "ಇದು ಭಾರತ ಹಾಗೂ ಇರಾನ್‌ ಉಭಯರಿಗೆ ನಿರಾಶೆಯನ್ನುಂಟು ಮಾಡಿದೆ ಎಂದು ನಾನು ಭಾವಿಸುತ್ತೇನೆ. ಏಕೆಂದರೆ ಪ್ರಧಾನಿ ನರೇಂದ್ರ ಮೋದಿಯವರು ಒಮ್ಮೆ ಹೇಳಿದಂತೆ ಈ ಚಾಬಹಾರ್ ಯೋಜನೆ ಹಿಂದೂ ಮಹಾಸಾಗರವನ್ನು ಮಧ್ಯ ಏಷ್ಯಾ, ಕಾಕಸಸ್ ಮತ್ತು ಅಲ್ಲಿಂದ ಮುಂದಕ್ಕೆ ಯುರೋಪ್‌ಗೆ ಸಂಪರ್ಕಿಸಬಲ್ಲ ಸುವರ್ಣ ದ್ವಾರವಾಗಿದೆ. ಇದೊಂದು ಅತ್ಯಂತ ಪ್ರಮುಖ ಕಾರ್ಯತಂತ್ರದ ಬಂದರಾಗಿದ್ದು, ಇದು ಸಂಪೂರ್ಣವಾಗಿ ಅಭಿವೃದ್ದಿಯಾದರೆ ಭಾರತವನ್ನು ಇರಾನ್ ಮೂಲಕ ಮಧ್ಯ ಏಷ್ಯಾ ಹಾಗೂ ಯುರೋಪ್‌ಗೆ ಸಂಪರ್ಕಿಸುವಲ್ಲಿ ಬಹಳ ಮುಖ್ಯವಾದ ಪಾತ್ರವನ್ನು ವಹಿಸಲಿದೆ" ಎಂದು ತಿಳಿಸಿದ್ದಾರೆ. ಮುಂದುವರೆದು, "ಇದೊಂದು ಅತ್ಯುತ್ತಮ ಸಾರಿಗೆ ಮಾರ್ಗವಾಗಿ ಕಾರ್ಯ ನಿರ್ವಹಿಸಬಹುದು. ಬಹುಶಃ ಒಂದು ದಿನ ನಾವು ಈ ಬಂದರಿನ ಸಂಪೂರ್ಣ ಅಭಿವೃದ್ಧಿಯನ್ನು ವೀಕ್ಷಿಸಬಹುದು ಎಂದು ನಾನು ಭಾವಿಸುತ್ತೇನೆ" ಎಂದು ಭರವಸೆಯನ್ನು ವ್ಯಕ್ತಪಡಿಸಿದ್ದಾರೆ.

ಇನ್ನು, ಭಾರತದ ಪಾಲಿಗೆ ಈ ಚಾಬಹಾರ್‌ ಬಂದರು ಯೋಜನೆ ಅತ್ಯಂತ ಮಹತ್ವ ಪೂರ್ಣ ಹಾಗೂ ಕಾರ್ಯತಂತ್ರದಿಂದ ಕೂಡಿದೆ. ಇದಕ್ಕೆ ಕಾರಣ ಮಧ್ಯ ಏಷ್ಯಾವನ್ನು ತಲುಪಲು ಪಾಕಿಸ್ತಾನ ಮೊದಲಿನಿಂದಲೂ ಭಾರತ ಭೂ ಸಾರಿಗೆಯನ್ನು ಅಡ್ಡಿಪಡಿಸುತ್ತಲೇ ಇದೆ. ಆದರೆ, ಈ ಯೋಜನೆಯಿಂದ ಭಾರತ ಪಾಕಿಸ್ತಾನವನ್ನು ಬೈಪಾಸ್‌ ಮಾಡುವ ಮೂಲಕ ಅಫ್ಘಾನಿಸ್ತಾನ ಹಾಗೂ ಮಧ್ಯ ಏಷ್ಯಾಗೆ ತಲುಪುವಂತೆ ಮಾಡಲಿದ್ದು, ನೇರ ವ್ಯಾಪಾರ ಮತ್ತು ಸಾರಿಗೆ ಮಾರ್ಗವನ್ನು ಸುಗಮವಾಗಿಸಲಿದೆ. ಅಷ್ಟೇ ಅಲ್ಲದೆ, ಕಾರ್ಯತಂತ್ರದ ದೃಷ್ಟಿಯಿಂದಲೂ ಸಾಕಷ್ಟು ಮಹತ್ವವನ್ನು ಪಡೆದಿದ್ದು, ಚೀನಾ ಈಗಾಗಲೇ ಪಾಕಿಸ್ತಾನದಲ್ಲಿ ಗ್ವಾದರ್ ಬಂದರನ್ನು ನಿರ್ಮಿಸುತ್ತಿದ್ದು, ಅಲ್ಲಿಂದ ಕೇವಲ 170 ಕಿಲೋ ಮೀಟರ್‌ ದೂರದಲ್ಲಿ ಚಾಬಹಾರ್‌ ಬಂದರಿದೆ. ಹಾಗಾಗಿ ಈ ಮೂಲಕ ಅರಬ್ಬಿ ಸಮುದ್ರದಲ್ಲಿ ಚೀನಾದ ಪ್ರಾಬಲ್ಯವನ್ನು ಹೆಚ್ಚಾಗದಂತೆ ಮಾಡಿ ಅರಬ್ಬಿ ಸಮುದ್ರದಲ್ಲಿ ಭಾರತದ ಸಾಮರ್ಥ್ಯವನ್ನು ಹೆಚ್ಚಿಸುವಲ್ಲಿ ಕಾರ್ಯನಿರ್ವಹಿಸುತ್ತದೆ. ಅಮೆರಿಕ ಹಾಗೂ ಇರಾನ್‌ ನಡುವಿನ ಉದ್ವಿಗ್ನತೆಯ ನಡುವೆ ಅಮೆರಿಕ ಕಳೆದ ವರ್ಷ ಇರಾನ್‌ನ ಚಾಬಹಾರ್‌ ಬಂದರಿನ ಮೇಲೆ ಸಂಪೂರ್ಣ ನಿಷೇಧವನ್ನು ಹೇರಿತ್ತು. ಇನ್ನು, ಇದಕ್ಕೂ ಮೊದಲೇ 2024ರ ಮೇ ತಿಂಗಳಿನಲ್ಲಿ ಚಾಬಹಾರ್ ಬಂದರಿನ ಟರ್ಮಿನಲ್‌ ವೊಂದನ್ನು 10 ವರ್ಷಗಳ ಕಾಲ ನಿರ್ವಹಿಸುವ ಒಪ್ಪಂದಕ್ಕೆ ಭಾರತ ಸಹಿ ಹಾಕಿತ್ತು. ಈಗಾಗಲೇ ಈ ಯೋಜನೆಗಾಗಿ 2024-25ರ ಬಜೆಟ್‌ ನಲ್ಲಿ 100 ಕೋಟಿ ರೂ. ಮೀಸಲಿಡುವುದಾಗಿ ಘೋಷಿಸಿತ್ತು. ಆದರೆ, ಸದ್ಯದ ಪರಿಸ್ಥಿತಿಯಲ್ಲಿ ಅಮೆರಿಕ ಹಾಗೂ ಇರಾನ್ ದೇಶಗಳ ನಡುವೆ ಸಾಕಷ್ಟು ಘರ್ಷಣೆಗಳು ನಡೆಯುತ್ತಿದ್ದು, ಈ ನಡುವೆ ಭಾರತ ಸಾಲಿನ ಬಜೆಟ್‌ ನಲ್ಲಿ ಈ ಯೋಜನೆಗೆ ಯಾವುದೇ ಹಣ ಮೀಸಲಿಡದೆ ಇರುವುದು ಗಮನ ಸೆಳೆದಿದೆ.