ನವದೆಹಲಿ : ಸಂಕಷ್ಟದಲ್ಲಿರುವ ಬೈಜೂಸ್ ಸಂಸ್ಥಾಪಕ ಬೈಜು ರವೀಂದ್ರನ್ ಅವರಿಗೆ ಅಮೆರಿಕದ ನ್ಯಾಯಾಲಯವೊಂದು ಮರ್ಮಾಘಾತ ನೀಡಿದೆ. ಕಂಪನಿಯ ಸಾಲದ ಹಣಕಾಸು ವ್ಯವಹಾರಗಳಲ್ಲಿ ಅಕ್ರಮ ಎಸಗಿದ ಆರೋಪದ ಮೇಲೆ ಬೈಜು ರವೀಂದ್ರನ್ ಅವರು 1.07 ಬಿಲಿಯನ್ ಡಾಲರ್ (ಅಂದಾಜು 9,600 ಕೋಟಿ ರೂ.) ಪಾವತಿಸಬೇಕೆಂದು ಅಮೆರಿಕದ ದಿವಾಳಿ ನ್ಯಾಯಾಲಯ ಆದೇಶ ಹೊರಡಿಸಿದೆ. ಬೈಜೂಸ್ ಅಮೆರಿಕದ ಸಾಲದಾತರಿಂದ ಪಡೆದಿದ್ದ 1.2 ಬಿಲಿಯನ್ ಡಾಲರ್ ಸಾಲದ ಹಣವನ್ನು ನಿರ್ವಹಿಸಲು 'ಬೈಜೂಸ್ ಆಲ್ಫಾ' ಎಂಬ ವಿಶೇಷ ಘಟಕವನ್ನು ಸ್ಥಾಪಿಸಿತ್ತು. ಆದರೆ, ಈ ಘಟಕದಿಂದ 533 ಮಿಲಿಯನ್ ಡಾಲರ್ ಹಣವನ್ನು ಮಿಯಾಮಿ ಮೂಲದ 'ಕ್ಯಾಮ್‌ಶಾಫ್ಟ್ ಕ್ಯಾಪಿಟಲ್' ಎಂಬ ಹೆಡ್ಜ್ ಫಂಡ್‌ಗೆ ಗುಟ್ಟಾಗಿ ವರ್ಗಾಯಿಸಲಾಗಿತ್ತು. ಈ ಹಣದ ವರ್ಗಾವಣೆ ಮತ್ತು ಅದರ ನಂತರದ ಚಲನವಲನಗಳ ಬಗ್ಗೆ ಮಾಹಿತಿ ನೀಡುವಂತೆ ಕೋರ್ಟ್ ಸೂಚಿಸಿದ್ದರೂ, ಬೈಜು ರವೀಂದ್ರನ್ ಅವರು ದಾಖಲೆಗಳನ್ನು ಒದಗಿಸಲು ಅಥವಾ ವಿಚಾರಣೆಗೆ ಹಾಜರಾಗಲು ವಿಫಲರಾಗಿದ್ದರು. ಈ ಕಾರಣಕ್ಕಾಗಿ ಡೆಲವೇರ್ ಕೋರ್ಟ್‌ನ ನ್ಯಾಯಾಧೀಶ ಬ್ರೆಂಡನ್ ಶಾನನ್ ಅವರು ನವೆಂಬರ್ 20 ರಂದು ಈ ಮಹತ್ವದ ತೀರ್ಪು ನೀಡಿದ್ದಾರೆ.

ಪ್ರಕರಣದ ಪ್ರಮುಖ ಅಂಶವೇ ಈ 533 ಮಿಲಿಯನ್ ಡಾಲರ್ (ಸುಮಾರು 4,800 ಕೋಟಿ ರೂ.) ಹಣವಾಗಿದೆ. ಬೈಜೂಸ್ ಆಲ್ಫಾದಿಂದ ಈ ಹಣವನ್ನು ಮೊದಲು ಕ್ಯಾಮ್‌ಶಾಫ್ಟ್ ಕ್ಯಾಪಿಟಲ್‌ಗೆ ವರ್ಗಾಯಿಸಲಾಯಿತು. ನಂತರ ಅದನ್ನು 'ಇನ್ಸ್‌ಪಿಲರ್ನ್' ಎಂಬ ಅಂಗಸಂಸ್ಥೆಗೆ ಮತ್ತು ಅಂತಿಮವಾಗಿ ಕಡಲಾಚೆಯ ಟ್ರಸ್ಟ್‌ವೊಂದಕ್ಕೆ ವರ್ಗಾಯಿಸಲಾಗಿದೆ ಎಂದು ನ್ಯಾಯಾಲಯದ ದಾಖಲೆಗಳು ಹೇಳುತ್ತಿವೆ. ಸಾಲ ನೀಡಿದವರು ತಮ್ಮ ಹಣವನ್ನು ಮರಳಿ ಪಡೆಯಲು ಪ್ರಯತ್ನಿಸುತ್ತಿದ್ದಾಗ, ಉದ್ದೇಶಪೂರ್ವಕವಾಗಿಯೇ ಈ ಆಸ್ತಿಯನ್ನು ಬೈಜೂಸ್ ಆಲ್ಫಾದಿಂದ ಬೇರೆಡೆಗೆ ಸಾಗಿಸಿದೆ ಎಂದು ಆರೋಪಿಸಲಾಗಿದೆ. ಕಂಪನಿಯ ಹಣಕಾಸು ನಿರ್ವಹಣೆಯಲ್ಲಿ ನಂಬಿಕೆ ದ್ರೋಹ ಮತ್ತು ಹಣದ ದುರ್ಬಳಕೆಗಾಗಿ ನ್ಯಾಯಾಲಯವು ಬೈಜು ರವೀಂದ್ರನ್ ಅವರನ್ನೇ ವೈಯಕ್ತಿಕವಾಗಿ ಹೊಣೆಗಾರರನ್ನಾಗಿ ಮಾಡಿದೆ. 533 ಮಿಲಿಯನ್ ಡಾಲರ್ ಮೂಲ ಮೊತ್ತದ ಜೊತೆಗೆ, ನಂಬಿಕೆ ದ್ರೋಹ ಮತ್ತು ಪಿತೂರಿಯ ಆರೋಪದಡಿಯಲ್ಲಿ ಹೆಚ್ಚುವರಿಯಾಗಿ 540.6 ಮಿಲಿಯನ್ ಡಾಲರ್ ದಂಡವನ್ನೂ ವಿಧಿಸಲಾಗಿದೆ. ಒಟ್ಟಾರೆಯಾಗಿ ಅವರ ಹೊಣೆಗಾರಿಕೆ 1.07 ಬಿಲಿಯನ್ ಡಾಲರ್‌ಗೆ ಏರಿಕೆಯಾಗಿದೆ.