ಮ್ಯಾಡ್ರಿಡ್: ಯೂರೋಪ್‌ನ ಪ್ರಮುಖ ದೇಶಗಳಲ್ಲೊಂದಾದ ಸ್ಪೇನ್‌ನಲ್ಲಿ ವಸತಿ ಅಭಾವ ಹಾಗೂ ತೀವ್ರವಾಗಿ ಏರಿಕೆಯಾಗಿರುವ ಮನೆ ಬಾಡಿಗೆ ದರಗಳನ್ನು ಖಂಡಿಸಿ ಲಕ್ಷಾಂತರ ನಾಗರಿಕರು ಬೀದಿಗಿಳಿದು ಬೃಹತ್ ಪ್ರತಿಭಟನೆ ನಡೆಸುತ್ತಿದ್ದಾರೆ. ಪ್ರಮುಖ ನಗರಗಳಾದ ಮ್ಯಾಡ್ರಿಡ್ ಮತ್ತು ಬಾರ್ಸಿಲೋನಾದಲ್ಲಿ ಪರಿಸ್ಥಿತಿ ತೀವ್ರ ಸ್ವರೂಪ ಪಡೆದುಕೊಂಡಿದ್ದು, “ಬಾಡಿಗೆ ದರವನ್ನು ಶೇ. 50 ರಷ್ಟು ಕಡಿತಗೊಳಿಸಿ, ಇಲ್ಲದಿದ್ದರೆ ನಾವು ಬಾಡಿಗೆ ನೀಡುವುದನ್ನೇ ತಡೆಯುತ್ತೇವೆ (ರೆಂಟ್ ಸ್ಟ್ರೈಕ್)” ಎಂದು ಬಾಡಿಗೆದಾರರು ಎಚ್ಚರಿಕೆ ನೀಡಿದ್ದಾರೆ. ಜನಸಾಮಾನ್ಯರ ಈ ಆಕ್ರೋಶವು ಪ್ರಸ್ತುತ ಸರ್ಕಾರವನ್ನೇ ಪತನದ ಅಂಚಿಗೆ ತಳ್ಳುವ ಭೀತಿ ಹುಟ್ಟುಹಾಕಿದೆ.

ಕಳೆದ ಐದು ವರ್ಷಗಳಲ್ಲಿ ಸ್ಪೇನ್‌ನಲ್ಲಿ ಮನೆ ಬಾಡಿಗೆ ದರಗಳು ಸರಾಸರಿ ಶೇ. 30 ರಿಂದ ಶೇ. 50 ರಷ್ಟು ಹೆಚ್ಚಾಗಿವೆ. ಪ್ರಮುಖ ನಗರಗಳಲ್ಲಿ ಒಂದು ಚದರ ಮೀಟರ್‌ ವಸತಿಗೆ 20 ರಿಂದ 25 ಯೂರೋ ದರವಿದ್ದು, 1,000 ಚದರಡಿಯ ಸಾಧಾರಣ ಮನೆಗೆ ಮಾಸಿಕ 2 ಲಕ್ಷ ರೂಪಾಯಿಗೂ ಅಧಿಕ ಬಾಡಿಗೆ ನೀಡಬೇಕಾದ ಪರಿಸ್ಥಿತಿ ಇದೆ. ಇದರಿಂದಾಗಿ ಯುವಜನರು ಮತ್ತು ಮಧ್ಯಮ ವರ್ಗದ ಕುಟುಂಬಗಳು ತಮ್ಮ ಒಟ್ಟು ಆದಾಯದ ಅರ್ಧಕ್ಕಿಂತ ಹೆಚ್ಚಿನ ಭಾಗವನ್ನು ಕೇವಲ ವಸತಿಗಾಗಿ ವೆಚ್ಚ ಮಾಡುತ್ತಿದ್ದಾರೆ. ಪ್ರಸ್ತುತ ದೇಶದಲ್ಲಿ ಸುಮಾರು 7 ಲಕ್ಷ ಮನೆಗಳ ಕೊರತೆಯಿರುವುದು ಬಾಡಿಗೆ ದರ ನಿಯಂತ್ರಣ ತಪ್ಪಲು ಪ್ರಮುಖ ಕಾರಣವಾಗಿದೆ.

ಸ್ಥಳೀಯ ನಾಗರಿಕರಿಗೆ ದೀರ್ಘಾವಧಿ ಬಾಡಿಗೆಗೆ ಮನೆಗಳನ್ನು ನೀಡುವ ಬದಲು, ಆಸ್ತಿ ಮಾಲೀಕರು ವಿದೇಶಿ ಪ್ರವಾಸಿಗರಿಗೆ ಅಲ್ಪಾವಧಿ ವಾಸ್ತವ್ಯಕ್ಕಾಗಿ (ಶಾರ್ಟ್-ಟರ್ಮ್ ಹಾಲಿಡೇ ರೆಂಟಲ್ಸ್) ಹೆಚ್ಚಿನ ದರಕ್ಕೆ ಬಾಡಿಗೆಗೆ ನೀಡುತ್ತಿದ್ದಾರೆ. ಇದರ ಜೊತೆಗೆ ವಿದೇಶಿ ರಿಯಲ್ ಎಸ್ಟೇಟ್ ಹೂಡಿಕೆದಾರರು ಮತ್ತು ಕಾರ್ಪೊರೇಟ್ ಸಂಸ್ಥೆಗಳು ವಸತಿ ಸಮುಚ್ಚಯಗಳನ್ನು ಖರೀದಿಸಿ ಕೃತಕವಾಗಿ ಬಾಡಿಗೆ ದರ ಹೆಚ್ಚಿಸುತ್ತಿವೆ ಎಂಬ ಆರೋಪಗಳು ಕೇಳಿಬಂದಿವೆ. ಪರಿಣಾಮವಾಗಿ 30 ವರ್ಷ ದಾಟಿದ ಯುವಕರೂ ಸ್ವಂತ ಮನೆ ಅಥವಾ ಸ್ವತಂತ್ರ ವಾಸ್ತವ್ಯ ಹೊಂದಲಾಗದೆ ಪೋಷಕರೊಂದಿಗೇ ವಾಸಿಸುವಂತಾಗಿದೆ.

ಇತ್ತೀಚೆಗೆ 87 ವರ್ಷದ ಮೇರಿಕಾರ್ಮನ್ ಅಬಾಸ್ಕಲ್ ಎಂಬ ವೃದ್ಧೆಯನ್ನು ಮನೆ ಬಾಡಿಗೆ ಪಾವತಿಸಿಲ್ಲವೆಂಬ ಕಾರಣಕ್ಕೆ ಬಲವಂತವಾಗಿ ಹೊರಹಾಕಿದ್ದು ಸಾರ್ವಜನಿಕರಲ್ಲಿ ತೀವ್ರ ಆಕ್ರೋಶದ ಕಿಡಿ ಹೊತ್ತಿಸಿದೆ. ಈ ಘಟನೆಯಿಂದ ಪ್ರಚೋದಿತರಾದ ಸಾವಿರಾರು ಜನರು ಬೀದಿಗಿಳಿದು ಹೋರಾಟ ಆರಂಭಿಸಿದ್ದಾರೆ. ಸ್ಪೇನ್ ಸರ್ಕಾರವು ಹೊಸ ವಸತಿ ಕಾಯ್ದೆಯಡಿ ಬಾಡಿಗೆ ದರಗಳ ಮೇಲೆ ಪರಿಮಿತಿ ಹೇರಲು ಪ್ರಯತ್ನಿಸಿದರೂ, ಮಾಲೀಕರು ಮನೆಗಳನ್ನು ಪ್ರವಾಸಿ ವಸತಿಗಳಾಗಿ ಪರಿವರ್ತಿಸುತ್ತಿರುವುದರಿಂದ ಬಿಕ್ಕಟ್ಟು ಉಲ್ಬಣಗೊಂಡಿದೆ. ಬಾಡಿಗೆದಾರರ ಹಕ್ಕು ರಕ್ಷಣೆಯ ವಿಧೇಯಕ ಸಂಸತ್ತಿನಲ್ಲಿ ಸೋಲನುಭವಿಸಿರುವುದು ಸರ್ಕಾರಕ್ಕೆ ಹಿನ್ನಡೆಯಾಗಿದೆ. ವಸತಿಯನ್ನು ಕೇವಲ ಲಾಭದಾಯಕ ವ್ಯಾಪಾರವಾಗಿ ನೋಡದೆ 'ಮೂಲಭೂತ ಮಾನವ ಹಕ್ಕು' ಎಂದು ಪರಿಗಣಿಸಿ ಕಟ್ಟುನಿಟ್ಟಿನ ನಿಯಂತ್ರಣ ತರಬೇಕೆಂದು ಸಾರ್ವಜನಿಕರು ಒತ್ತಾಯಿಸುತ್ತಿದ್ದಾರೆ.