ರಾಮನಗರ : ಕಷ್ಟಪಟ್ಟು ಬೆಳೆದ ಬೆಳೆಯನ್ನು ಮಾರುಕಟ್ಟೆಯಲ್ಲಿ ಮಾರಿ, ಆ ಹಣವನ್ನು ಜೇಬಿನಲ್ಲಿ ಇಟ್ಟುಕೊಂಡು ಜಮೀನಿಗೆ ಕೆಲಸಕ್ಕೆ ಹೋಗಿದ್ದ ರೈತರೊಬ್ಬರು ದುರದೃಷ್ಟವಶಾತ್ 17 ಸಾವಿರ ರೂಪಾಯಿಗಳನ್ನು ಕಳೆದುಕೊಂಡಿದ್ದರು. ನೇಗಿಲು ಹೊಡೆಯುವಾಗ ಆ ಹಣದ ಕಂತೆ ಮಣ್ಣಿನ ಅಡಿಯಲ್ಲಿ ಹೂತುಹೋಗಿತ್ತು. ಜಮೀನಿನಲ್ಲಿ ಕೆಲಸ ಮಾಡುವ ಕೂಲಿ ಕಾರ್ಮಿಕರು ಹಾಗೂ ಅಕ್ಕಪಕ್ಕದವರ ಬಳಿ ಕೈಮುಗಿದು ಕೇಳಿಕೊಂಡರೂ ಹಣದ ಸುಳಿವು ಸಿಕ್ಕಿರಲಿಲ್ಲ. ಐದಾರು ತಿಂಗಳು ಜೋಳ ಬೆಳೆದು ಗಳಿಸಿದ ಹಣ ಕೈತಪ್ಪಿ ಹೋದಾಗ, "ಭೂತಾಯಿ ಕೊಟ್ಟರೂ ಲಕ್ಷ್ಮಿ ತನಗೆ ಒಲಿಯಲಿಲ್ಲ" ಎಂದು ಆ ರೈತ ಕಣ್ಣೀರು ಹಾಕುತ್ತಲೇ ವಿಧಿಯಿಲ್ಲದೆ ಆ ಘಟನೆಯನ್ನು ಮರೆತುಬಿಟ್ಟಿದ್ದರು. ಯಾರಿಗೆ ಸಿಕ್ಕಿದರೂ ಅವರಾದರೂ ಸುಖವಾಗಿರಲಿ ಎಂದು ಆಶಿಸಿದ್ದರು.

ಆದರೆ ಇದೀಗ ಮುಂಗಾರು ಮಳೆ ಆರಂಭವಾಗಿದ್ದು, ಜಮೀನನ್ನು ಹದಗೊಳಿಸಲು ರೈತ ಮತ್ತೆ ಭೂಮಿಗೆ ಇಳಿದಾಗ ಒಂದು ಅಚ್ಚರಿ ಕಾದಿತ್ತು. ನಾಲ್ಕು ತಿಂಗಳ ಹಿಂದೆ ಕಳೆದುಹೋಗಿದ್ದ ಅದೇ ನೋಟಿನ ಕಂತೆ ಮಣ್ಣಿನ ಅಡಿಯಿಂದ ಮತ್ತೆ ಅವರ ಕೈಸೇರಿದೆ. ಮಣ್ಣಿನ ತೇವಾಂಶದಿಂದಾಗಿ ನೋಟುಗಳಿಗೆ ಗೆದ್ದಲು ಹಿಡಿದು, ಕೆಲವು ನೋಟುಗಳು ಭಾಗಶಃ ಹರಿದು ತೂತು ಬಿದ್ದಿದ್ದವು. ಆದರೂ ರಬ್ಬರ್ ಬ್ಯಾಂಡ್‌ನಿಂದ ಗಟ್ಟಿಯಾಗಿ ಕಟ್ಟಿದ್ದರಿಂದ 500, 200, 100 ಹಾಗೂ 50 ರೂಪಾಯಿ ಮುಖಬೆಲೆಯ ನೋಟುಗಳು ಸಂಪೂರ್ಣವಾಗಿ ನಾಶವಾಗದೆ ಉಳಿದುಕೊಂಡಿವೆ. ಕಳೆದುಹೋದ ಹಣ ತನಗೇ ವಾಪಸ್ ಸಿಕ್ಕಿದ್ದನ್ನು ಕಂಡು ರೈತನ ಮುಖದಲ್ಲಿ ಅಪಾರ ಸಂತಸ ಮೂಡಿದೆ. ಭೂಮಿ ತಾಯಿಯೇ ತನ್ನ ಮಡಿಲಲ್ಲಿದ್ದ ಹಣವನ್ನು ಮರಳಿ ನೀಡಿದ್ದಾಳೆ ಎಂದು ಅವರು ಭಾವುಕರಾಗಿದ್ದಾರೆ.

ಈ ಹರಿದ ನೋಟುಗಳನ್ನು ಏನು ಮಾಡಬೇಕೆಂದು ತಿಳಿಯದೆ ರೈತರು ಕಂಗಾಲಾಗಿದ್ದಾಗ, ಅವರ ಅಣ್ಣನ ಮಗ ಬ್ಯಾಂಕ್ ನಿಯಮಗಳ ಬಗ್ಗೆ ಮಾಹಿತಿ ನೀಡಿದ್ದಾನೆ. ಬ್ಯಾಂಕುಗಳಿಗೆ ಇಂತಹ ಹರಿದ ಅಥವಾ ಹಾಳಾದ ನೋಟುಗಳನ್ನು ನೀಡಿದರೆ, ಅವುಗಳ ಸೀರಿಯಲ್ ನಂಬರ್ ಹಾಗೂ ಎಷ್ಟು ಶೇಕಡಾ ನೋಟು ಸುರಕ್ಷಿತವಾಗಿದೆ ಎಂಬುದನ್ನು ಪರಿಶೀಲಿಸಿ, ಸ್ವಲ್ಪ ಹಣವನ್ನು ಹಿಡಿದುಕೊಂಡು ಉಳಿದ ಮೊತ್ತಕ್ಕೆ ಹೊಸ ನೋಟುಗಳನ್ನು ಬದಲಾಯಿಸಿಕೊಡುತ್ತಾರೆ ಎಂದು ಸಲಹೆ ನೀಡಿದ್ದಾನೆ. ಇದನ್ನು ಕೇಳಿ ರೈತನ ಕುಟುಂಬ ಮತ್ತಷ್ಟು ನಿರಾಳವಾಗಿದೆ. ರೈತನ ಅಣ್ಣನ ಮಗ ಈ ಇಡೀ ಘಟನೆಯನ್ನು ವಿಡಿಯೋ ಮಾಡಿ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದು, "ಕಷ್ಟಪಟ್ಟು ಸಂಪಾದನೆ ಮಾಡಿದ ಹಣ ಯಾವತ್ತೂ ನಮ್ಮಿಂದ ದೂರ ಆಗಲ್ಲ" ಎಂದು ಬರೆದುಕೊಂಡಿದ್ದಾನೆ. ಈ ವಿಡಿಯೋಗೆ ನೆಟ್ಟಿಗರಿಂದ ಭಾರಿ ಪ್ರಶಂಸೆ ವ್ಯಕ್ತವಾಗುತ್ತಿದ್ದು, "ಭೂಮಿ ತಾಯಿ ಯಾವತ್ತೂ ಅನ್ನದಾತನನ್ನು ಕೈಬಿಡುವುದಿಲ್ಲ" ಎಂದು ಭಾವನಾತ್ಮಕವಾಗಿ ಕಾಮೆಂಟ್ ಮಾಡುತ್ತಿದ್ದಾರೆ.