ಧಾರವಾಡ: ಕೋಟಕ್ ಲೈಫ್ ಇನ್ಶೂರೆನ್ಸ್ (Kotak Life Insurance) ಕಂಪನಿಗೆ ದಂಡ ವಿಧಿಸಿ, ಪರಿಹಾರ‌ ನೀಡುವಂತೆ ಗ್ರಾಹಕರ ಆಯೋಗ ಆದೇಶಿಸಿದೆ. ಧಾರವಾಡದ ನಿವಾಸಿ ದೀಪ್ತಿ ನವಿಲೇ ಅವರ ತಂದೆಯವರು ಜೀವಿತಾವಧಿಯಲ್ಲಿದ್ದಾಗ ಪಾಲಿಸಿಯನ್ನು ಪಡೆದಿದ್ದರು, ಅದಕ್ಕೆ ಅವರು ಪ್ರತಿ ವರ್ಷ 2,15,251 ರೂ ವಿಮಾ ಕಂತನ್ನು ತುಂಬುತ್ತಿದ್ದರು. ಈ ರೀತಿಯಾಗಿ ಐದು ವರ್ಷ ತುಂಬಿದ ನಂತರ ದೂರುದಾರರ ತಂದೆಯವರು ಮರಣ ಹೊಂದಿದ್ದರಿಂದಾಗಿ ದೂರುದಾರರಿಗೆ ಆರ್ಥಿಕ ತೊಂದರೆಯಿಂದ ವಿಮಾ ಕಂತು ಹಣ ತುಂಬಲು ಸಾಧ್ಯವಾಗಿರುವುದಿಲ್ಲ. ಹೀಗಾಗಿ ದೂರುದಾರರು ಎದುರುದಾರರ ಕಂಪನಿಗೆ ಹೋಗಿ ವಿಮಾ ಪಾಲಿಸಿಯನ್ನು ನಿಲ್ಲಿಸಲು ಕೇಳಿ ತಮ್ಮ ತಂದೆಯು ತುಂಬಿದ ಒಟ್ಟು ಹಣ 10,85,742 ರೂ. ಮರಳಿಸುವಂತೆ ಕೋರಿದ್ದರು.

ಎದುರುದಾರರು ಅಷ್ಟು ಹಣವನ್ನು ಕೊಡಲು ಸಾಧ್ಯವಿಲ್ಲ. ಏಕೆಂದರೆ, ಈ ಐದು ವರ್ಷಗಳಲ್ಲಿ Stationary charge, GST and CGST, Agent commission, office maintenance etc, ಸಲುವಾಗಿ ಬಳಕೆ ಮಾಡಿದ್ದರಿಂದ ಪೂರ್ತಿ ಹಣಕೊಡಲು ಸಾಧ್ಯವಿಲ್ಲ ಎಂದು ಹೇಳಿ ನಿರಾಕರಿಸಿತ್ತು. ಎದುರುದಾರರ ಈ ನಡವಳಿಕೆಯಿಂದ ತನಗೆ ಮಾನಸಿಕ ಹಾನಿ ಹಾಗೂ ಅನಾನೂಕೂಲತೆ ಆಗಿದೆ ಎಂದು ದೂರುದಾರರು, ಸೇವಾ ನ್ಯೂನತೆಗೆ ಗ್ರಾಹಕರ ಸಂರಕ್ಷಣಾ ಕಾಯಿದೆಯಡಿಯಲ್ಲಿ ಸೂಕ್ತ ಕ್ರಮ ಕೈಗೊಳ್ಳುವಂತೆ 2023 ರ ಆಗಸ್ಟ್ 8 ರಂದು ಆಯೋಗದ ಮುಂದೆ ದೂರು ಹಾಜರುಪಡಿಸಿದ್ದರು.

ದೂರಿನ ಬಗ್ಗೆ ಕೂಲಂಕಷವಾಗಿ ವಿಚಾರಣೆ ನಡೆಸಿದ ಆಯೋಗದ ಅಧ್ಯಕ್ಷರಾದ ಈಶಪ್ಪ ಭೂತೆ ಹಾಗೂ ಸದಸ್ಯರಾದ ವಿಶಾಲಾಕ್ಷಿ. ಅ. ಬೋಳಶೆಟ್ಟಿ ಅವರು ದೂರುದಾರರ ತಂದೆಯವರು ಎದುರುದಾರರಿಂದ ಪ್ರತಿ ವರ್ಷ 2,15,000 ರೂ. ಪಾವತಿಸಿ ವಿಮಾ ಹಣವನ್ನು ಒಟ್ಟು ಹತ್ತು ವರ್ಷ ತುಂಬುವ ಕರಾರನ್ನು ಮಾಡಿಕೊಂಡಿದ್ದರು. ಆದರೆ ಐದು ಕಂತುಗಳನ್ನು ತುಂಬಿದ ನಂತರ ಅವರ ತಂದೆಯವರು ಮರಣ ಹೊಂದಿದ್ದರು. ಮುಂದಿನ ಕಂತುಗಳನ್ನು ದೂರುದಾರರಿಗೆ ತುಂಬಲು ಸಾಧ್ಯವಾಗದ ಕಾರಣ ತಮ್ಮ ತಂದೆಯವರು ಐದು ವರ್ಷ ತುಂಬಿದ ವಿಮಾ ಕಂತುಗಳನ್ನು ಮರಳಿಸುವಂತೆ ಪ್ರತಿವಾದಿಗೆ ಕೋರಿರುತ್ತಾರೆ. ಆದರೆ ಪ್ರತಿವಾದಿ ಕಂಪನಿಯ ನಿಯಮಾವಳಿಯ ಪ್ರಕಾರ ಕೇವಲ 50 ರಷ್ಟು ಹಣ ಕೊಡಲು ಬಾಧ್ಯಸ್ಥರಿರುವುದು ದಾಖಲೆ ಮುಖಾಂತರ ಕಂಡು ಬಂದಿರುತ್ತದೆ. ಆದರೂ ಆ ಹಣವನ್ನು ದೂರುದಾರರಿಗೆ ನೀಡದೆ ಸೇವಾ ನ್ಯೂನತೆ ಎಸಗಿರುವುದರಿಂದ ಎದುರುದಾರರು ಈ ಆದೇಶವಾದ ಒಂದು ತಿಂಗಳ ಒಳಗಾಗಿ ದೂರುದಾರರಿಗೆ 7,50,000 ರೂ. ಮರಳಿ ಕೊಡಲು ನಿರ್ದೆಶಿಸಿದೆ. ದೂರುದಾರರಿಗೆ ಆಗಿರುವ ಅನಾನುಕೂಲ ಹಾಗೂ ಮಾನಸಿಕ ತೊಂದರೆಗಾಗಿ 50,000 ರೂ. ಪರಿಹಾರ ಮತ್ತು 10,000 ರೂ ಪ್ರಕರಣದ ಖರ್ಚು ವೆಚ್ಚ ಕೊಡುವಂತೆ ಆಯೋಗ ಪ್ರತಿವಾದಿ Kotak Life Insurance ಕಂಪನಿಗೆ ಆದೇಶಿಸಿದೆ.