ದಾವಣಗೆರೆ: ಭದ್ರಾ ಬಲದಂಡೆ ಕಾಲುವೆಯನ್ನು ಸೀಳಿ ಹೊಸದುರ್ಗ, ಕಡೂರು, ಅಜ್ಜಪುರ, ತರೀಕೆರೆ ತಾಲೂಕಿನ 1,200 ಹಳ್ಳಿಗಳಿಗೆ ನೀರು ಹರಿಸಲು ನಡೆದಿರುವ ಕಾಮಗಾರಿ ವಿರೋಧಿಸಿ ಭಾರತೀಯ ರೈತ ಒಕ್ಕೂಟ ಹಾಗೂ ಬಿಜೆಪಿ ಮುಖಂಡರು ಇಂದು ದಾವಣಗೆರೆ ಬಂದ್​​​ ಕರೆ ನೀಡಿದ್ದಾರೆ. ಆದರೆ ಬಂದ್​ಗೆ ನೀರಸ ಪ್ರತಿಕ್ರಿಯೆ ವ್ಯಕ್ತವಾಗಿದೆ.

ಭಾರತೀಯ ರೈತ ಒಕ್ಕೂಟ ಹಾಗೂ ಎಂ.ಪಿ.ರೇಣುಕಾಚಾರ್ಯ, ಮಾಡಾಳ್​ ಮಲ್ಲಿಕಾರ್ಜುನ ಹಾಗೂ ಇತರರು ದಾವಣಗೆರೆ ನಗರದಾದ್ಯಂತ ಸಂಚರಿಸಿ ಅಂಗಡಿಗಳನ್ನು ಬಂದ್​ ಮಾಡಿಸಿದರು. ಎಂದಿನಂತೆ ಸಂಚರಿಸುತ್ತಿರುವ ಬಸ್​, ಆಟೋ ಸ್ಥಗಿತಗೊಳಿಸುವಂತೆ ಅವರು ಮನವಿ ಮಾಡಿದರು. ನಮ್ಮ ನೀರು, ನಮ್ಮ ಹಕ್ಕು ಎಂಬ ಧ್ಯೇಯ ವಾಕ್ಯದೊಂದಿಗೆ ನೀರಿಗಾಗಿ ಹೋರಾಟ ನಡೆಸುತ್ತಿದ್ದೇವೆ, ಬಂದ್​ಗೆ ಬೆಂಬಲ ನೀಡಿ ಎಂದು ಕೋರಿದರು. ಜೊತೆಗೆ, ನಗರದ ವಿದ್ಯಾ ಸರ್ಕಲ್​, ವಿದ್ಯಾರ್ಥಿಭವನ, ಲಕ್ಷ್ಮಿ ಫ್ಲೋರ್​ ಮಿಲ್​ ವೃತ್ತ ಸೇರಿದಂತೆ ವಿವಿಧೆಡೆ ಪ್ರತಿಭಟನಾಕಾರರು ಟೈರ್​ಗೆ ಬೆಂಕಿ ಹಚ್ಚಿ ಆಕ್ರೋಶ ವ್ಯಕ್ತಪಡಿಸಿದರು.

ದಾವಣಗೆರೆ ನಗರದಲ್ಲಿ ಬಂದ್​​ಗೆ ಹೆಚ್ಚಿನ ಬೆಂಬಲ ವ್ಯಕ್ತವಾಗಿಲ್ಲ. ಎಂದಿನಂತೆ ಬಸ್, ಆಟೋ ಹಾಗೂ ಇತರ ವಾಹನಗಳ ಸಂಚಾರ ಸಾಗಿದೆ. ಅಂಗಡಿ, ಹೋಟೆಲ್​ಗಳನ್ನು ತೆರೆಯಲಾಗಿದ್ದು, ಹೂವಿನ ಮಾರುಕಟ್ಟೆ, ‌ಎಪಿಎಂಸಿ ಕೂಡ ಆರಂಭವಾಗಿದೆ. ನಗರದ ಜಯದೇವ ವೃತ್ತ, ಹಳೇ ಪಿಬಿ ರಸ್ತೆ, ಅಂಬೇಡ್ಕರ್ ಸರ್ಕಲ್, ವಿದ್ಯಾರ್ಥಿ ಭವನ ಸರ್ಕಲ್, ಕೆಎಸ್ಆರ್​ಟಿಸಿ ಬಸ್ ನಿಲ್ದಾಣ ಇನ್ನಿತರ ಕಡೆ ಮುಂಜಾಗ್ರತಾ ಕ್ರಮವಾಗಿ ಬಿಗಿ ಪೊಲೀಸ್​ ಬಂದೋಬಸ್ತ್ ಮಾಡಲಾಗಿದೆ. ಸದ್ಯ ದಾವಣಗೆರೆ ಹೃದಯಭಾಗ ಜಯದೇವ ವೃತ್ತಕ್ಕೆ ಮಾತ್ರ ಬಂದ್ ಸೀಮಿತವಾದಂತಿದೆ.