ಹುಬ್ಬಳ್ಳಿ: ಇತ್ತ ಹುಬ್ಬಳ್ಳಿ-ಧಾರವಾಡ ಅವಳಿ ನಗರಗಳು ಬೆಳೆಯುತ್ತಿದ್ದಂತೆ ಅತ್ತ ಜಿಲ್ಲೆಯಲ್ಲಿ ನಿತ್ಯವೂ ಕಸದ ರಾಶಿ ಬೆಳೆಯುತ್ತಾ ಬೆಟ್ಟದಂತಾಗುತ್ತಿದೆ. ಕಳೆದ 50 ವರ್ಷಗಳಿಗೂ ಹೆಚ್ಚು ಕಾಲದಿಂದ ಸಂಗ್ರಹವಾಗುತ್ತಿದ್ದ ಕಸದ ರಾಶಿ ಅಕ್ಷರಶಃ ಬೆಟ್ಟದಂತಾಗಿದೆ. ಹುಬ್ಬಳ್ಳಿಯ ಕಾರವಾರ ರಸ್ತೆಯಲ್ಲಿನ 19 ಎಕರೆ ಪ್ರದೇಶದಲ್ಲಿ ಹಾಗೂ ಧಾರವಾಡದ ಹೊಸ ಯಲ್ಲಾಪುರದಲ್ಲಿನ 16 ಎಕರೆ ಪ್ರದೇಶದಲ್ಲಿ ಕಸದ ಬೆಟ್ಟಗಳೇ ತಲೆ ಎತ್ತಿದೆ. ಇದೀಗ ಪಾಲಿಕೆ ವತಿಯಿಂದ ಈ ಬೆಟ್ಟಗಳನ್ನು ಕರಗಿಸುವ ಕಾರ್ಯ ಪ್ರಾರಂಭವಾಗಿದೆ.

ಪ್ರತಿದಿನ ಕಸದ ಬೆಟ್ಟದೊಳಗೆ ಬೆಂಕಿ ಹತ್ತುತ್ತಿದೆ. ದಟ್ಟ ಹೊಗೆ, ಸತ್ತ ನಾಯಿ, ಹಂದಿ, ದನಗಳ ಕಳೇಬರದ ದುರ್ನಾತ ಜನರನ್ನು ಹೈರಾಣಾಗಿಸಿದೆ. ಪರಿಸರ ಸಂಪೂರ್ಣ ಹದಗೆಟ್ಟು ಸುತ್ತಮುತ್ತಲ 2ರಿಂದ 3 ಕಿಲೋ ಮೀಟರ್ ವ್ಯಾಪ್ತಿಯವರೆಗೂ ದುರ್ನಾತ ಬೀರುತ್ತಿದೆ. ಕಸದ ರಾಶಿ ಸಾಂಕ್ರಾಮಿಕ ರೋಗಗಳ ತಾಣವೂ ಆಗಿದೆ. ಕಸದ ಬೆಟ್ಟ ಕರಗಿಸುವಂತೆ ಕೇಂದ್ರ ಮಾಲಿನ್ಯ ನಿಯಂತ್ರಣ ಮಂಡಳಿ 2017ರಲ್ಲೇ ಸೂಚನೆ ನೀಡಿತ್ತು.‌

ಕಸದ ಬೆಟ್ಟ ಕರಗಿಸುವ ಕುರಿತು 2021ರಲ್ಲಿ ಡಿಪಿಆರ್ ಸಿದ್ಧಪಡಿಸಿ ರಾಜ್ಯ ಸರ್ಕಾರಕ್ಕೆ ಪಾಲಿಕೆ ಕಳುಹಿಸಿತ್ತು. ಸರ್ಕಾರದಿಂದ ಅನುಮೋದನೆ ಸಿಕ್ಕಿದ್ದು 2023ರಲ್ಲಿ. ಟೆಂಡರ್ ಪ್ರಕ್ರಿಯೆ ಮುಗಿದಿದ್ದು 2024ರ ಏಪ್ರಿಲ್​ನಲ್ಲಿ. ಮಳೆಗಾಲ ಇದ್ದುದರಿಂದ ಕೆಲಸ ಶುರುವಾಗಿರಲಿಲ್ಲ. ಹಾಗಾಗಿ ಅ.15ರಿಂದ ಕೆಲಸ ಶುರುವಾಗಿದೆ.

ಬಯೋ ಮೈನಿಂಗ್ ಮೂಲಕ ಕಸದ ರಾಶಿಯನ್ನು ಸ್ಟ್ರಾ ಬೇಜ್ ಮಾಡಲಾಗುತ್ತಿದೆ. ಬಳಿಕ ಅದರಲ್ಲಿನ ಬಯೋ ಅರ್ಥ್ ಅಥವಾ ಬಯೋ ಸ್ವಾಯಿಲ್ (ಮಣ್ಣು) ಅನ್ನು ಗಾರ್ಡನ್ ಸೇರಿದಂತೆ ವಿವಿಧೆಡೆ ಉಪಯೋಗಿಸಬಹುದು. ಬಳಿಕ ಆರ್‌ಡಿಎಫ್ (ರಿವ್ಯೂಸ್ ಡಿರೈವ್ಡ್​ ಫ್ಯುಯಲ್) ರಟ್ಟು, ಕಾಗದ, ಚಪ್ಪಲಿ, ಟೈರ್ ಸೇರಿದಂತೆ ಮತ್ತಿತರರ ವಸ್ತುಗಳು ಬೇರ್ಪಟ್ಟು ಬಂದಿರುವ ರಾಶಿಯನ್ನು ಸಿಮೆಂಟ್ ಫ್ಯಾಕ್ಟರಿ ಸೇರಿದಂತೆ ಮತ್ತಿತರೆಡೆ ಉರುವಲುಗಳಂತೆ ಬಳಸಬಹುದು. ಇದರಲ್ಲಿ ಬರುವ ಇನರ್ಟ್ ಯಾವುದಕ್ಕೂ ಉಪಯೋಗಕ್ಕೆ ಬಾರದ ವಸ್ತು. ಇದನ್ನು ಬರೀ ಕ್ವಾರಿ ಸೇರಿದಂತೆ ತಗ್ಗುಗಳನ್ನು ತುಂಬಲು ಮಾತ್ರ ಉಪಯೋಗಿಸಬಹುದು.