ಬೆಂಗಳೂರು: ಕರ್ನಾಟಕ ಭೂ ಸುಧಾರಣಾ ಕಾಯ್ದೆಗೆ ತಿದ್ದುಪಡಿ ತಂದ ನಂತರ ರಾಜ್ಯದ ಕೃಷಿ ವಲಯದಲ್ಲಿ ಬಹುದೊಡ್ಡ ಬದಲಾವಣೆಗಳು ಕಂಡುಬಂದಿದ್ದು, ಕೃಷಿಯೇತರ ಹಿನ್ನೆಲೆಯುಳ್ಳವರಿಗೂ ಕೃಷಿ ಭೂಮಿ ಖರೀದಿಸಲು ಅವಕಾಶ ಕಲ್ಪಿಸಿದ ಹೊಸ ನಿಯಮ ಜಾರಿಗೆ ಬಂದ ಬಳಿಕ ರಾಜ್ಯದಲ್ಲಿ ಬರೋಬ್ಬರಿ 20 ಲಕ್ಷ ಎಕರೆಗೂ ಅಧಿಕ ಕೃಷಿ ಭೂಮಿ ಮಾರಾಟವಾಗಿರುವುದು ಬಹಿರಂಗವಾಗಿದೆ.

1961ರ ಕರ್ನಾಟಕ ಭೂ ಸುಧಾರಣಾ ಕಾಯ್ದೆಯಲ್ಲಿದ್ದ ಕೆಲ ಕಠಿಣ ನಿಯಮಗಳನ್ನು ಸಡಿಲಗೊಳಿಸಿ 79 ಎ, 79 ಬಿ ಹಾಗೂ 79 ಸಿ ಸೆಕ್ಷನ್‌ಗಳನ್ನು ಸಂಪೂರ್ಣವಾಗಿ ರದ್ದುಗೊಳಿಸಲಾಗಿತ್ತು. ಇದರಿಂದಾಗಿ ವರ್ಷಕ್ಕೆ 25 ಲಕ್ಷ ರೂಪಾಯಿಗಿಂತ ಹೆಚ್ಚಿನ ಕೃಷಿಯೇತರ ಆದಾಯ ಹೊಂದಿದ್ದ ವ್ಯಕ್ತಿಗಳಿಗೆ ಇದ್ದ ನಿರ್ಬಂಧ ತೆರವುಗೊಂಡಿತು. ಇದರ ಜೊತೆಗೆ ಕೃಷಿ ಹಿನ್ನೆಲೆ ಇಲ್ಲದವರು, ಉದ್ಯಮಿಗಳು, ಸಂಸ್ಥೆಗಳು ಹಾಗೂ ಇತರ ರಂಗದವರು ಭೂಮಿ ಖರೀದಿಸಲು ಅವಕಾಶ ಸಿಕ್ಕಂತಾಯಿತು. ಮತ್ತೊಂದೆಡೆ ಸೆಕ್ಷನ್ 63ರ ಅಡಿಯಲ್ಲಿ ಒಬ್ಬ ವ್ಯಕ್ತಿ ಅಥವಾ ನಾಲ್ಕು ಜನರ ಕುಟುಂಬ ಹೊಂದಬಹುದಾದ ಗರಿಷ್ಠ ಕೃಷಿ ಭೂಮಿಯ ಮಿತಿಯನ್ನು ಹೆಚ್ಚಿಸುವುದರ ಜೊತೆಗೆ, ಈ ಸಂಬಂಧ ಕಂದಾಯ ನ್ಯಾಯಾಲಯಗಳಲ್ಲಿದ್ದ ಸಾವಿರಾರು ಹಳೆಯ ಪ್ರಕರಣಗಳನ್ನು ವಜಾಗೊಳಿಸಲಾಯಿತು.

ಈ ನಿಯಮಗಳು ಜಾರಿಯಾದ ತಕ್ಷಣವೇ ಬೆಂಗಳೂರು ಗ್ರಾಮಾಂತರ, ರಾಮನಗರ, ಚಿಕ್ಕಬಳ್ಳಾಪುರ, ಕೋಲಾರ, ಮೈಸೂರು ಹಾಗೂ ಕರಾವಳಿ ಭಾಗಗಳಲ್ಲಿ ಕೃಷಿ ಭೂಮಿ ಮಾರಾಟ ಭರದಿಂದ ಸಾಗಿತು. ರಿಯಲ್ ಎಸ್ಟೇಟ್ ಉದ್ಯಮಿಗಳು, ಕೃಷಿಯೇತರ ಹೂಡಿಕೆದಾರರು ಮತ್ತು ದೊಡ್ಡ ಕಂಪನಿಗಳು ಭಾರಿ ಪ್ರಮಾಣದಲ್ಲಿ ಜಮೀನುಗಳನ್ನು ಖರೀದಿಸಿದ್ದರಿಂದ ರಾಜ್ಯದಾದ್ಯಂತ ಕೃಷಿ ಭೂಮಿಯ ಬೆಲೆ ಶರವೇಗದಲ್ಲಿ ಏರಿಕೆಯಾಯಿತು.

ಕಾಯ್ದೆ ತಿದ್ದುಪಡಿಯ ಕುರಿತು ಆಡಳಿತ ಮತ್ತು ಸಾರ್ವಜನಿಕ ವಲಯದಲ್ಲಿ ತೀವ್ರ ಪರ-ವಿರೋಧ ಚರ್ಚೆಗಳು ನಡೆಯುತ್ತಿವೆ. ಕೃಷಿ ವಲಯಕ್ಕೆ ಆಧುನಿಕ ತಂತ್ರಜ್ಞಾನ ಮತ್ತು ಹೆಚ್ಚಿನ ಬಂಡವಾಳ ಹೂಡಿಕೆ ಬರಲು ಈ ತಿದ್ದುಪಡಿ ನೆರವಾಗುತ್ತದೆ ಹಾಗೂ ಆಸಕ್ತಿಯಿರುವ ಯಾರು ಬೇಕಾದರೂ ನವೀನ ಮಾದರಿಯ ವ್ಯವಸಾಯ ಮಾಡಬಹುದು ಎಂದು ತಿದ್ದುಪಡಿಯನ್ನು ಬೆಂಬಲಿಸಿದವರು ವಾದಿಸಿದ್ದಾರೆ. ಆದರೆ ರೈತ ಸಂಘಟನೆಗಳು, ಕೃಷಿ ತಜ್ಞರು ಮತ್ತು ವಿರೋಧ ಪಕ್ಷಗಳು ತೀವ್ರ ಕಳವಳ ವ್ಯಕ್ತಪಡಿಸಿದ್ದು, ರಿಯಲ್ ಎಸ್ಟೇಟ್ ಭರಾಟೆಯಿಂದ ಸಣ್ಣ ಮತ್ತು ಅಂಚಿನ ರೈತರು ತಮ್ಮ ಜಮೀನು ಕಳೆದುಕೊಳ್ಳಲಿದ್ದಾರೆ ಹಾಗೂ ಭವಿಷ್ಯದಲ್ಲಿ ಆಹಾರ ಭದ್ರತೆಗೆ ಧಕ್ಕೆಯಾಗಲಿದೆ ಎಂದು ಎಚ್ಚರಿಸಿದ್ದಾರೆ. ಪ್ರಸ್ತುತ ಬರೋಬ್ಬರಿ 20 ಲಕ್ಷ ಎಕರೆ ಭೂಮಿ ಕೃಷಿಯೇತರರ ಪಾಲಾಗಿರುವುದು ರಾಜ್ಯದ ಗ್ರಾಮೀಣ ಆರ್ಥಿಕತೆಯ ಮೇಲೆ ಆಳವಾದ ಪರಿಣಾಮ ಬೀರಿದೆ.