ನವದೆಹಲಿ: ಮಾಜಿ ಪ್ರಧಾನಿ ಇಂದಿರಾಗಾಂಧಿ ಅವರು ಹೊರಡಿಸಿದ ಘೋಷಣೆಯಾದ 'ಗರೀಬಿ ಹಠಾವೋ' ದೇಶದ ಇತಿಹಾಸದಲ್ಲಿಯೇ ಅತಿದೊಡ್ಡ ಜುಮ್ಲಾ (ಸುಳ್ಳು) ಎಂದು ಪ್ರಧಾನಿ ನರೇಂದ್ರ ಮೋದಿ ಶನಿವಾರ ಹೇಳಿದರು.

ಸಂವಿಧಾನದ 75ನೇ ವಾರ್ಷಿಕೋತ್ಸವದ ಕುರಿತು ಲೋಕಸಭೆಯಲ್ಲಿ ಎರಡು ದಿನಗಳು ನಡೆದ ಚರ್ಚೆಗೆ ಉತ್ತರಿಸಿದ ಪ್ರಧಾನಿ ಮೋದಿ ಅವರು, ಕೆಲವು ವಿರೋಧ ಪಕ್ಷಗಳಿಗೆ ಅದಾನಿ ಬಿಟ್ಟು ಬೇರೆ ವಿಷಯವೇ ಇಲ್ಲ. ಕಾಂಗ್ರೆಸ್​ಗೆ ಹೊಂದಿಕೊಳ್ಳುವ ಮತ್ತು ಅದಕ್ಕೆ ಅತ್ಯಂತ ನೆಚ್ಚಿನ ಪದ ಒಂದಿದೆ. ಅದು ಜುಮ್ಲಾ. ಇದು ಇಲ್ಲದೆ ಆ ಪಕ್ಷದ ನಾಯಕರು ಬದುಕಲು ಸಾಧ್ಯವಿಲ್ಲ ಎಂದು ಛೇಡಿಸಿದರು.

ಗರೀಬಿ ಹಠಾವೋ ದೇಶ್ ಬಚಾವೋ (ಬಡತನ ತೊಡೆದುಹಾಕಿ, ದೇಶವನ್ನು ಉಳಿಸಿ) ಅನ್ನೋದ ಇಂದಿರಾ ಗಾಂಧಿ ಅವರು 1971 ರ ಚುನಾವಣಾ ಪ್ರಚಾರದಲ್ಲಿ ನೀಡಿದ ಘೋಷಣೆಯಾಗಿತ್ತು. ಆದರೆ ಈ ದೇಶಕ್ಕೆ ತಿಳಿದಿದೆ. ಕಾಂಗ್ರೆಸ್​​ ನಾಲ್ಕು ತಲೆಮಾರುಗಳಿಂದ ಬಳಸುತ್ತಿರುವ ಭಾರತದ ಅತಿದೊಡ್ಡ ಸುಳ್ಳು ಎಂದರೆ ಅದು, ಗರೀಬಿ ಹಠಾವೋ ಎಂದು ಮೋದಿ ಟೀಕಿಸಿದರು.

ಗರೀಬಿ ಹಠಾವೋ ಕಾಂಗ್ರೆಸ್​ಗೆ ರಾಜಕೀಯವಾಗಿ ಸಹಾಯ ಮಾಡಿದೆ. ಆದರೆ, ಬಡವರಿಗೆ ಏನೊಂದೂ ಮಾಡಲಿಲ್ಲ. ಯುಪಿಎ ಸರ್ಕಾರ ಜನರಿಗೆ ಕನಿಷ್ಠ ಶೌಚಾಲಯ ನಿರ್ಮಿಸಿಕೊಟ್ಟಿರಲಿಲ್ಲ. ಆದರೆ, ಎನ್​ಡಿಎ ಸರ್ಕಾರ ಅಧಿಕಾರಕ್ಕೆ ಬಂದ ಬಳಿಕ ಶೌಚಾಲಯಗಳನ್ನು ನಿರ್ಮಿಸುವ ಆಂದೋಲನವನ್ನು ಪ್ರಾರಂಭಿಸಿದೆ" ಎಂದು ಮೋದಿ ತಮ್ಮ ಸರ್ಕಾರವನ್ನು ಸಮರ್ಥಿಸಿಕೊಂಡರು.