ಬೆಂಗಳೂರು: ರಾಜ್ಯದಲ್ಲಿ ಪ್ರಸಕ್ತ ವರ್ಷದ ನೈಋತ್ಯ ಮುಂಗಾರು ಮಳೆಯು ತೀವ್ರ ವೈಫಲ್ಯವನ್ನು ಎದುರಿಸುತ್ತಿದ್ದು, ಜೂನ್ ಹಾಗೂ ಜುಲೈ ತಿಂಗಳುಗಳಲ್ಲಿ ನಿರೀಕ್ಷಿತ ಮಟ್ಟದಲ್ಲಿ ಮಳೆಯಾಗದೆ ರಾಜ್ಯಾದ್ಯಂತ ಒಟ್ಟು ಶೇ. 35ರಷ್ಟು ಮಳೆಯ ಕೊರತೆ ದಾಖಲಾಗಿದೆ ಎಂದು ಕರ್ನಾಟಕ ರಾಜ್ಯ ಪ್ರಾಕೃತಿಕ ವಿಕೋಪ ಉಸ್ತುವಾರಿ ಕೇಂದ್ರದ (KSNDMC) ಅಧಿಕೃತ ವರದಿ ತಿಳಿಸಿದೆ. ಜೂನ್ 1 ರಿಂದ ಜುಲೈ 22 ರವರೆಗಿನ ಅವಧಿಯಲ್ಲಿ ರಾಜ್ಯದಲ್ಲಿ ಒಟ್ಟಾರೆಯಾಗಿ 392 ಮಿ.ಮೀ ಸಾಮಾನ್ಯ ಮಳೆಯ ಬದಲಿಗೆ ಕೇವಲ 253 ಮಿ.ಮೀ ಮಳೆಯಾಗಿದ್ದು, ಒಟ್ಟಾರೆ ಮಳೆ ಪ್ರಮಾಣವು 'ಕೊರತೆ' (Deficit) ವರ್ಗದಲ್ಲಿದೆ.

ಮಳೆಗಾಲ ಆರಂಭವಾಗಿ ಎರಡು ತಿಂಗಳು ಕಳೆಯುತ್ತಾ ಬಂದಿದ್ದರೂ ಮಳೆಯಿಲ್ಲದೆ ಕೃಷಿ ಚಟುವಟಿಕೆಗಳಿಗೆ ತೀವ್ರ ಹಿನ್ನಡೆಯಾಗಿದೆ. ಜೂನ್ ತಿಂಗಳಲ್ಲಿ ರಾಜ್ಯದಾದ್ಯಂತ ವಾಡಿಕೆಯಂತೆ 199 ಮಿ.ಮೀ ಮಳೆಯಾಗಬೇಕಿತ್ತು. ಆದರೆ ಕೇವಲ 116 ಮಿ.ಮೀ ಮಳೆ ದಾಖಲಾಗುವ ಮೂಲಕ ಶೇ. 42ರಷ್ಟು ಭಾರಿ ಕೊರತೆ ಕಂಡುಬಂದಿತ್ತು. ಮುಂದುವರಿದು, ಜುಲೈ ತಿಂಗಳ ಆರಂಭದಿಂದ ಇಲ್ಲಿಯವರೆಗೆ (ಜುಲೈ 22 ರವರೆಗೆ) 192 ಮಿ.ಮೀ ಸಾಮಾನ್ಯ ಮಳೆಯ ಬದಲಿಗೆ 137 ಮಿ.ಮೀ ಮಳೆಯಾಗಿದ್ದು, ಶೇ. 29ರಷ್ಟು ಕೊರತೆ ಮುಂದುವರಿದಿದೆ.

​ಪ್ರಮುಖ ವಲಯಗಳಾದ ಕರಾವಳಿಯಲ್ಲಿ ಶೇ. 33ರಷ್ಟು, ಮಲೆನಾಡಿನಲ್ಲಿ ಶೇ. 43ರಷ್ಟು, ದಕ್ಷಿಣ ಒಳನಾಡಿನಲ್ಲಿ ಶೇ. 34ರಷ್ಟು ಹಾಗೂ ಉತ್ತರ ಒಳನಾಡಿನಲ್ಲಿ ಶೇ. 24ರಷ್ಟು ಮಳೆ ಕೊರತೆ ಉಂಟಾಗಿದ್ದು, ರಾಜ್ಯದ ಪ್ರಮುಖ ಜೀವಾನಾಡಿಗಳಾದ ಜಲಾಶಯಗಳಿಗೆ ನೀರಿನ ಒಳಹರಿವು ಗಣನೀಯವಾಗಿ ಕುಸಿದಿದೆ.

​ರಾಜ್ಯದ ವಿವಿಧ ವಲಯಗಳ ಮಳೆ ವಿವರ:

• ಕರಾವಳಿ: ಸಾಮಾನ್ಯ ಮಳೆ 1652 ಮಿ.ಮೀ, ವಾಸ್ತವ ಮಳೆ 1099 ಮಿ.ಮೀ (-33% ಕೊರತೆ)

• ಮಲೆನಾಡು: ಸಾಮಾನ್ಯ ಮಳೆ 789 ಮಿ.ಮೀ, ವಾಸ್ತವ ಮಳೆ 450 ಮಿ.ಮೀ (-43% ಕೊರತೆ)

• ದಕ್ಷಿಣ ಒಳನಾಡು: ಸಾಮಾನ್ಯ ಮಳೆ 120 ಮಿ.ಮೀ, ವಾಸ್ತವ ಮಳೆ 80 ಮಿ.ಮೀ (-34% ಕೊರತೆ)

• ಉತ್ತರ ಒಳನಾಡು: ಸಾಮಾನ್ಯ ಮಳೆ 182 ಮಿ.ಮೀ, ವಾಸ್ತವ ಮಳೆ 138 ಮಿ.ಮೀ (-24% ಕೊರತೆ)

​ರಾಜ್ಯದ ವಿವಿಧ ಜಿಲ್ಲೆಗಳ ಪರಿಸ್ಥಿತಿಯನ್ನು ಗಮನಿಸಿದಾಗ, ವಿಜಯನಗರ ಜಿಲ್ಲೆಯಲ್ಲಿ ಅತ್ಯಧಿಕವಾಗಿ ಶೇ. 62ರಷ್ಟು ಮಳೆ ಕೊರತೆ ದಾಖಲಾಗಿದ್ದು 'ಅತಿ ಕೊರತೆ' (Large Deficit) ವರ್ಗದಲ್ಲಿದೆ. ಇದರೊಂದಿಗೆ ದಕ್ಷಿಣ ಕನ್ನಡ, ಉಡುಪಿ, ಶಿವಮೊಗ್ಗ, ಚಿಕ್ಕಮಗಳೂರು ಮತ್ತು ಕೊಡಗು ಸೇರಿದಂತೆ ಬಹುತೇಕ ಜಿಲ್ಲೆಗಳಲ್ಲಿ ಮಳೆಯ ಅಭಾವ ಮುಂದುವರಿದಿದೆ. ಬಾಗಲಕೋಟೆ, ವಿಜಯಪುರ, ಬೆಳಗಾವಿ, ಬೆಂಗಳೂರು ಗ್ರಾಮಾಂತರ, ತುಮಕೂರು ಮತ್ತು ರಾಯಚೂರು ಜಿಲ್ಲೆಗಳಲ್ಲಿ ಮಾತ್ರ ಮಳೆಯು ಸಾಮಾನ್ಯ ಸ್ಥಿತಿಯಲ್ಲಿದೆ.

​ಸಕಾಲಕ್ಕೆ ಮಳೆಯಾಗದ ಕಾರಣ ರೈತರು ಬಿತ್ತನೆ ಕಾರ್ಯಗಳನ್ನು ಮುಂದುವರಿಸಲು ಪರದಾಡುವಂತಾಗಿದೆ. ಮುಂಗಾರು ಹಂಗಾಮಿನ ಪ್ರಮುಖ ಬೆಳೆಗಳಾದ ತೊಗರಿ, ಮೆಕ್ಕೆಜೋಳ, ಭತ್ತ ಹಾಗೂ ವಾಣಿಜ್ಯ ಬೆಳೆಗಳಾದ ಅಡಿಕೆ, ತೆಂಗಿನ ಮರಗಳ ಮೇಲೂ ಈ ಮಳೆ ಕೊರತೆಯ ವ್ಯತಿರಿಕ್ತ ಪರಿಣಾಮ ಬೀರುವ ಆತಂಕ ಎದುರಾಗಿದೆ. ಮುಂಬರುವ ದಿನಗಳಲ್ಲಿ ಮಳೆಯು ಚುರುಕುಗೊಳ್ಳದಿದ್ದರೆ ರಾಜ್ಯದಲ್ಲಿ ತೀವ್ರ ನೀರಿನ ಸಮಸ್ಯೆ ಹಾಗೂ ಕೃಷಿ ಬಿಕ್ಕಟ್ಟು ತಲೆದೂರುವ ಸಾಧ್ಯತೆಯಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.