​ನವದೆಹಲಿ: ನೈಋತ್ಯ ಮಾನ್ಸೂನ್ ಆರಂಭಕ್ಕೂ ಮುನ್ನವೇ ದೇಶದ ಅನ್ನದಾತರಿಗೆ ಕೇಂದ್ರ ಸರ್ಕಾರ ಸಿಹಿ ಸುದ್ದಿ ನೀಡಿದೆ. ಪ್ರಧಾನಿ ನರೇಂದ್ರ ಮೋದಿ ಅವರ ಅಧ್ಯಕ್ಷತೆಯಲ್ಲಿ ನಡೆದ ಆರ್ಥಿಕ ವ್ಯವಹಾರಗಳ ಸಚಿವ ಸಂಪುಟ ಸಮಿತಿಯು (ಸಿಸಿಇಎ) 2026-27ರ ಸಾಲಿನ ಖಾರಿಫ್ ಹಂಗಾಮಿನ 14 ಪ್ರಮುಖ ಬೆಳೆಗಳ ಕನಿಷ್ಠ ಬೆಂಬಲ ಬೆಲೆಯನ್ನು (ಎಂಎಸ್‌ಪಿ) ಹೆಚ್ಚಿಸಲು ಮಹತ್ವದ ಅನುಮೋದನೆ ನೀಡಿದೆ. ಆಮದು ಅವಲಂಬನೆಯನ್ನು ತಗ್ಗಿಸಿ, ಬೆಳೆ ವೈವಿಧ್ಯೀಕರಣಕ್ಕೆ ಉತ್ತೇಜನ ನೀಡುವ ಉದ್ದೇಶದಿಂದ ದ್ವಿದಳ ಧಾನ್ಯಗಳು, ಎಣ್ಣೆಬೀಜಗಳು ಮತ್ತು ಹತ್ತಿಗೆ ಈ ಬಾರಿ ಹೆಚ್ಚಿನ ಪ್ರಾಶಸ್ತ್ಯ ನೀಡಲಾಗಿದೆ.

​ಈ ನೂತನ ನಿರ್ಧಾರದನ್ವಯ, ಸಾಮಾನ್ಯ ಭತ್ತದ ಬೆಂಬಲ ಬೆಲೆಯನ್ನು ಕ್ವಿಂಟಾಲ್‌ಗೆ 72 ರೂಪಾಯಿ ಹೆಚ್ಚಿಸಲಾಗಿದ್ದು, ಹೊಸ ದರ 2,441 ರೂಪಾಯಿಗೆ ಏರಿಕೆಯಾಗಿದೆ. ಎ ದರ್ಜೆಯ ಭತ್ತಕ್ಕೆ 2,461 ರೂಪಾಯಿ ನಿಗದಿಪಡಿಸಲಾಗಿದೆ. ವಿಶೇಷವಾಗಿ ಒಣ ಭೂಮಿಯ ಪ್ರಮುಖ ಬೆಳೆಯಾದ ಹತ್ತಿಗೆ ಪ್ರತಿ ಕ್ವಿಂಟಾಲ್‌ಗೆ 557 ರೂಪಾಯಿಗಳಷ್ಟು ಭಾರಿ ಏರಿಕೆ ಮಾಡಲಾಗಿದ್ದು, ರೈತರಿಗೆ ಪ್ರತಿ ಕ್ವಿಂಟಾಲ್‌ಗೆ 8,267 ರೂಪಾಯಿ (ಉತ್ತಮ ತಳಿಗೆ 8,667 ರೂ.) ಲಭ್ಯವಾಗಲಿದೆ. ಎಣ್ಣೆಕಾಳುಗಳ ವಿಭಾಗದಲ್ಲಿ ಸೂರ್ಯಕಾಂತಿ ಬೀಜಕ್ಕೆ 622 ರೂಪಾಯಿ ಏರಿಸುವ ಮೂಲಕ 8,343 ರೂಪಾಯಿಗೆ ನಿಗದಿಪಡಿಸಿದರೆ, ಎಳ್ಳು ಮತ್ತು ನೈಜರ್ ಸೀಡ್ ಬೆಲೆಗಳು ಕ್ರಮವಾಗಿ 10,346 ಹಾಗೂ 10,052 ರೂಪಾಯಿಗಳಿಗೆ ತಲುಪಿವೆ. ಸೋಯಾಬೀನ್ ಬೆಲೆಯಲ್ಲಿ 380 ರೂಪಾಯಿ ಹಾಗೂ ನೆಲಗಡಲೆ ಬೆಲೆಯಲ್ಲಿ 254 ರೂಪಾಯಿ ಹೆಚ್ಚಳ ಮಾಡಲಾಗಿದೆ.

​ದ್ವಿದಳ ಧಾನ್ಯಗಳ ಬೆಲೆ ಏರಿಕೆಯೂ ಗಮನಾರ್ಹವಾಗಿದ್ದು, ತೊಗರಿ ಬೇಳೆಗೆ ಕ್ವಿಂಟಾಲ್‌ಗೆ 450 ರೂಪಾಯಿ ಹೆಚ್ಚಳ ಮಾಡಿ 8,450 ರೂಪಾಯಿ ನಿಗದಿಗೊಳಿಸಲಾಗಿದೆ. ಉದ್ದಿನ ಬೇಳೆ 8,200 ರೂಪಾಯಿ ಹಾಗೂ ಹೆಸರು ಬೇಳೆ 8,780 ರೂಪಾಯಿಗಳಿಗೆ ಏರಿಕೆಯಾಗಿದೆ. ಸಿರಿಧಾನ್ಯಗಳ ಪೈಕಿ ರಾಗಿಗೆ 319 ರೂಪಾಯಿ ಹೆಚ್ಚಳದೊಂದಿಗೆ 5,205 ರೂಪಾಯಿ ನಿಗದಿಯಾಗಿದ್ದು, ಜೋಳ, ಸಜ್ಜೆ ಹಾಗೂ ಮೆಕ್ಕೆಜೋಳದ ಬೆಲೆಗಳನ್ನೂ ಗಣನೀಯವಾಗಿ ಪರಿಷ್ಕರಿಸಲಾಗಿದೆ. ರೈತರಿಗೆ ಅವರ ಉತ್ಪಾದನಾ ವೆಚ್ಚಕ್ಕಿಂತ ಕನಿಷ್ಠ 50 ಪ್ರತಿಶತದಷ್ಟು ಲಾಭ ದೊರೆಯುವುದನ್ನು ಖಚಿತಪಡಿಸಿಕೊಳ್ಳಲು ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಕೇಂದ್ರ ಸಚಿವ ಅಶ್ವಿನಿ ವೈಷ್ಣವ್ ತಿಳಿಸಿದ್ದಾರೆ. ಈ ಯೋಜನೆಯಡಿ ಬೆಳೆ ಸಂಗ್ರಹಣೆಗಾಗಿ ಸರ್ಕಾರ ಒಟ್ಟು 2.60 ಲಕ್ಷ ಕೋಟಿ ರೂಪಾಯಿಗಳನ್ನು ಮೀಸಲಿಟ್ಟಿದ್ದು, ಸುಮಾರು 824.41 ಲಕ್ಷ ಟನ್ ಸಂಗ್ರಹಣೆಯ ಗುರಿ ಹೊಂದಿದೆ.