ನವದೆಹಲಿ : ಇರಾನ್-ಇಸ್ರೇಲ್, ಅಮೆರಿಕ ಯುದ್ಧದ ನಡುವೆ ಭಾರತದ ರಕ್ಷಣಾ ರಫ್ತುಗಳು ಇತಿಹಾಸದಲ್ಲೇ ಅತಿ ಹೆಚ್ಚು ಮಟ್ಟ ತಲುಪಿದ್ದು, ಜಾಗತಿಕ ಶಸ್ತ್ರಾಸ್ತ್ರ ಮಾರುಕಟ್ಟೆಯಲ್ಲಿ ದೇಶೀಯ ರಕ್ಷಣಾ ವಸ್ತುಗಳಿಗೆ ಭಾರಿ ಬೇಡಿಕೆ ಬರುತ್ತಿದೆ ಎಂದು ರಕ್ಷಣಾ ಮೂಲಗಳಿಂದ ತಿಳಿದುಬಂದಿದೆ. ರಕ್ಷಣಾ ಸಚಿವಾಲಯದ ಅಂಕಿ-ಅಂಶಗಳ ಪ್ರಕಾರ, 2025-26ರಲ್ಲಿ ಭಾರತದ ರಕ್ಷಣಾ ರಫ್ತುಗಳು ರೂ 38,424 ಕೋಟಿಗೆ ಏರಿಕೆ ಕಂಡಿದ್ದು, ಇದುವರೆಗೆ ದಾಖಲಾಗಿರುವ ಅತ್ಯುನ್ನತ ಮಟ್ಟವಾಗಿದೆ.

2016-17ರಲ್ಲಿ ಇದ್ದ ರೂ 1,522 ಕೋಟಿಯಿಂದ ಇದು ಸುಮಾರು 25 ಪಟ್ಟು ಹೆಚ್ಚಳವಾಗಿದ್ದು, ಕಳೆದ ದಶಕದಲ್ಲಿ ಸಂಭವಿಸಿದ ತೀವ್ರ ವಿಸ್ತರಣೆಯನ್ನು ತೋರಿಸುತ್ತದೆ. ರಫ್ತುಗಳ ಹಾದಿಯಲ್ಲಿ ಸಣ್ಣ ಮಟ್ಟಿನ ಏರಿಳಿತಗಳಿದ್ದರೂ ಒಟ್ಟಾರೆ ನಿರಂತರ ಏರಿಕೆಯನ್ನು ದಾಖಲಿಸಿದೆ. 2018-19ರಲ್ಲಿ ಮೊದಲ ಬಾರಿಗೆ ರಕ್ಷಣಾ ರಫ್ತುಗಳು ರೂ 10,000 ಕೋಟಿಯನ್ನು ದಾಟಿತ್ತು; ನಂತರ ಕೋವಿಡ್ ಮಹಾಮಾರಿ ಅವಧಿಯಲ್ಲಿ ಸ್ವಲ್ಪ ಕುಸಿತ ಕಂಡರೂ, 2021-22ರಿಂದ ಮತ್ತೆ ವೇಗವಾಗಿ ಏರಿಕೆ ಕಾಣಲಾರಂಭಿಸಿತು. 2023-24ರಿಂದ 2025-26ರವರೆಗೆ ಮಾತ್ರವೇ ರಫ್ತುಗಳು ರೂ 21,083 ಕೋಟಿಯಿಂದ ರೂ 38,424 ಕೋಟಿಗೆ ಜಿಗಿದಿದ್ದು, ಭಾರತೀಯ ನಿರ್ಮಿತ ರಕ್ಷಣಾ ಸಾಧನಗಳು ಮತ್ತು ವ್ಯವಸ್ಥೆಗಳ ಮೇಲಿನ ಜಾಗತಿಕ ಬೇಡಿಕೆ ಹೆಚ್ಚುತ್ತಿರುವುದನ್ನು ಈ ಅಂಕಿ-ಅಂಶಗಳು ಪ್ರತಿಬಿಂಬಿಸುತ್ತದೆ.