ಅಮೇರಿಕ : ಪಾಕಿಸ್ತಾನದ ಕರಾಳ ಇತಿಹಾಸವೊಂದು ಬರೋಬ್ಬರಿ 5 ದಶಕಗಳ ನಂತರ ಇಸ್ಲಾಮಾಬಾದ್‌ನ ನಿದ್ದೆಗೆಡಿಸಿದೆ! 55 ವರ್ಷಗಳ ಹಿಂದೆ ನಡೆದ ಆ ಭೀಕರ 'ಹಿಂದೂಗಳ ನರಮೇಧ' ಈಗ ಜಾಗತಿಕ ಮಟ್ಟದಲ್ಲಿ ಸದ್ದು ಮಾಡುತ್ತಿದ್ದು, ಪಾಕಿಸ್ತಾನವನ್ನು ಅಂತರರಾಷ್ಟ್ರೀಯ ಕಟಕಟೆಯಲ್ಲಿ ನಿಲ್ಲಿಸಿದೆ. ಅಂದು ಹರಿದ ಹಿಂದೂಗಳ ರಕ್ತಕ್ಕೆ ಇಂದು ನ್ಯಾಯ ಸಿಗುವ ಕಾಲ (Time) ಹತ್ತಿರ ಬಂದಿದೆಯೇ ಎಂಬ ಪ್ರಶ್ನೆ ಮೂಡಿದೆ. ಅಮೆರಿಕದಲ್ಲಿ 1971ರ ಬಾಂಗ್ಲಾದೇಶ ಹತ್ಯಾಕಾಂಡವನ್ನು ಮತ್ತೆ ಚರ್ಚೆಗೆ ತರುವ ಮಹತ್ವದ ಬೆಳವಣಿಗೆ ನಡೆದಿದೆ. ಗ್ರೆಗ್​ ಲ್ಯಾಂಡ್ಸ್​ಮೆನ್​ ಅಮೆರಿಕ ಪ್ರತಿನಿಧಿಗಳ ಸಭೆಯಲ್ಲಿ ಒಂದು ನಿರ್ಣಯವನ್ನು ಮಂಡಿಸಿದ್ದು, ಪಾಕಿಸ್ತಾನಿ ಸೇನೆ ಮತ್ತು ಅದರ ಮಿತ್ರ ಸಂಘಟನೆಗಳು ನಡೆಸಿದ ದೌರ್ಜನ್ಯಗಳನ್ನು "ಯುದ್ಧ ಅಪರಾಧಗಳು" ಮತ್ತು "ನರಮೇಧ" ಎಂದು ಅಧಿಕೃತವಾಗಿ ಗುರುತಿಸಬೇಕು ಎಂದು ಒತ್ತಾಯಿಸಿದ್ದಾರೆ. ಈ ನಿರ್ಣಯವು ವಿಶೇಷವಾಗಿ 1971ರ ಮಾರ್ಚ್ 25ರಂದು ನಡೆದ ಘಟನೆಗಳನ್ನು ಉಲ್ಲೇಖಿಸುತ್ತದೆ. ಆಗ ಪಾಕಿಸ್ತಾನ ಸರ್ಕಾರ ಶೇಖ್​ ಮುಜಿಬರ್​ ರೆಹಮಾನ್​ ಅವರನ್ನು ಬಂಧಿಸಿ, ಬಳಿಕ "ಆಪರೇಷನ್ ಸರ್ಚ್‌ಲೈಟ್" ಎಂಬ ಭಾರಿ ಸೈನಿಕ ಕಾರ್ಯಾಚರಣೆಯನ್ನು ಆರಂಭಿಸಿತು. ಈ ಕಾರ್ಯಾಚರಣೆಯಲ್ಲಿ ನಾಗರಿಕರ ಮೇಲೆ ವ್ಯಾಪಕ ಹತ್ಯಾಕಾಂಡ ನಡೆಯಿತು ಎಂದು ನಿರ್ಣಯ ಹೇಳುತ್ತದೆ.

ಜಮಾತ್​-ಇ-ಇಸ್ಲಾಂ ಸೇರಿದಂತೆ ಕೆಲವು ಮಿತ್ರ ಗುಂಪುಗಳ ಸಹಾಯದಿಂದ, ಪಾಕಿಸ್ತಾನಿ ಪಡೆಗಳು ಬಂಗಾಳಿ ಜನರು, ವಿಶೇಷವಾಗಿ ಹಿಂದೂ ಸಮುದಾಯದ ಮೇಲೆ ದಾಳಿ ನಡೆಸಿದವು ಎಂದು ಆರೋಪಿಸಲಾಗಿದೆ. ಸಾವಿರಾರು ಜನರು ಕೊಲ್ಲಲ್ಪಟ್ಟರು, ಮಹಿಳೆಯರ ಮೇಲೆ ದೌರ್ಜನ್ಯಗಳು ನಡೆದವು, ಮತ್ತು ಲಕ್ಷಾಂತರ ಜನರು ತಮ್ಮ ಮನೆಗಳನ್ನು ಬಿಟ್ಟು ಹೋಗಬೇಕಾಯಿತು. ಈ ನಿರ್ಣಯದಲ್ಲಿ "ಬ್ಲಡ್ ಟೆಲಿಗ್ರಾಮ್" ಎಂಬ ಮಹತ್ವದ ದಾಖಲೆಗೂ ಉಲ್ಲೇಖ ಮಾಡಲಾಗಿದೆ. ಆಗ ಢಾಕಾದಲ್ಲಿ ಅಮೆರಿಕದ ಕಾನ್ಸುಲ್ ಜನರಲ್ ಆಗಿದ್ದ ಆರ್ಚರ್​ ಬ್ಲಡ್​ ಕಳುಹಿಸಿದ ಈ ಸಂದೇಶದಲ್ಲಿ, ಪಾಕಿಸ್ತಾನಿ ಸೇನೆ ಮತ್ತು ಅದರ ಬೆಂಬಲಿಗರು ಬಂಗಾಳಿಗಳು ಮತ್ತು ಹಿಂದೂಗಳ ವಿರುದ್ಧ ವ್ಯವಸ್ಥಿತ ಹತ್ಯೆಗಳನ್ನು ನಡೆಸುತ್ತಿದ್ದಾರೆ ಎಂದು ಎಚ್ಚರಿಸಲಾಗಿತ್ತು. ಆದರೆ, ಆ ಕಾಲದಲ್ಲಿ ಇದನ್ನು "ಆಂತರಿಕ ವಿಷಯ" ಎಂದು ಪರಿಗಣಿಸಿ ತಕ್ಷಣದ ಕ್ರಮ ಕೈಗೊಳ್ಳಲಾಗಲಿಲ್ಲ ಎಂಬುದೂ ಗಮನಾರ್ಹವಾಗಿದೆ. ಈಗ ಈ ನಿರ್ಣಯವನ್ನು ವಿದೇಶಾಂಗ ವ್ಯವಹಾರಗಳ ಸಮಿತಿಗೆ ಕಳುಹಿಸಲಾಗಿದೆ. ಅದು ಅಂಗೀಕಾರವಾದರೆ, ಪಾಕಿಸ್ತಾನದ ಮೇಲೆ ಅಂತರರಾಷ್ಟ್ರೀಯ ಒತ್ತಡ ಹೆಚ್ಚಾಗಬಹುದು. ಅಮೆರಿಕವು ಕೆಲವು ವ್ಯಕ್ತಿಗಳು ಅಥವಾ ಸಂಸ್ಥೆಗಳ ಮೇಲೆ ನಿರ್ಬಂಧಗಳನ್ನು ವಿಧಿಸುವ ಸಾಧ್ಯತೆಯೂ ಇದೆ. ಯಾವುದೇ ಜನಾಂಗ ಅಥವಾ ಧಾರ್ಮಿಕ ಸಮುದಾಯವನ್ನು ಒಟ್ಟಾಗಿ ಆರೋಪಿಸಬಾರದು, ಆದರೆ ಮಾನವೀಯತೆಯ ವಿರುದ್ಧ ನಡೆದ ಅಪರಾಧಗಳನ್ನು ಗುರುತಿಸಿ ನ್ಯಾಯ ಒದಗಿಸುವುದು ಅಗತ್ಯವಾಗಿದೆ.