image image
ಬ್ರೇಕಿಂಗ್ ನ್ಯೂಸ್
ಬ್ರೇಕಿಂಗ್ ನ್ಯೂಸ್

ಸೊಳ್ಳೆಗಳೇ ಇಲ್ಲದ ವಿಸ್ಮಯದ ದ್ವೀಪ: ಬೆಂಕಿ ಮತ್ತು ಮಂಜಿನ ನಡುವೆ ಬದುಕಿನ ಹೊಸ ಭಾಷ್ಯ ಬರೆದ ಐಸ್‌ಲ್ಯಾಂಡ್!

ಸೊಳ್ಳೆಗಳೇ ಇಲ್ಲದ ವಿಸ್ಮಯದ ದ್ವೀಪ: ಬೆಂಕಿ ಮತ್ತು ಮಂಜಿನ ನಡುವೆ ಬದುಕಿನ ಹೊಸ ಭಾಷ್ಯ ಬರೆದ ಐಸ್‌ಲ್ಯಾಂಡ್!

ಸಂಜೆ ಕವಿಯುತ್ತಿದ್ದಂತೆ ಕಿವಿಯ ಬಳಿ ಗುಂಯ್‌ಗುಡುವ ಸೊಳ್ಳೆಗಳ ನಾದ ಮತ್ತು ಅವುಗಳಿಂದ ಹರಡುವ ಮಲೇರಿಯಾ, ಡೆಂಗ್ಯೂನಂತಹ ಕಾಯಿಲೆಗಳ ಭಯ ನಮ್ಮಲ್ಲಿ ಸಾಮಾನ್ಯ. ಆದರೆ, ಇಡೀ ಭೂಮಂಡಲದಲ್ಲಿ ಒಂದೇ ಒಂದು ಸೊಳ್ಳೆಯೂ ಇಲ್ಲದ, ಹಾವುಗಳ ಸುಳಿವೂ ಇಲ್ಲದ ಒಂದು ಅಚ್ಚರಿಯ ದೇಶವಿದೆ ಎಂದರೆ ನಂಬಲೇಬೇಕು!

ಉತ್ತರ ಅಟ್ಲಾಂಟಿಕ್ ಸಾಗರದ ಮಧ್ಯೆ ನೆಲೆಸಿರುವ ‘ಐಸ್‌ಲ್ಯಾಂಡ್’ ಎಂಬ ಪುಟ್ಟ ದ್ವೀಪ ರಾಷ್ಟ್ರವೇ ಆ ವಿಸ್ಮಯದ ನಾಡು. ಮೇಲ್ನೋಟಕ್ಕೆ ಸೊಳ್ಳೆಗಳಿಲ್ಲದ ಸ್ವರ್ಗದಂತೆ ಕಾಣುವ ಈ ನೆಲದ ಹಿಂದೆ ಪ್ರಕೃತಿಯ ಅಪರೂಪದ ವೈಜ್ಞಾನಿಕ ವಿಸ್ಮಯವೊಂದು ಅಡಗಿದೆ

ನೆರೆಯ ನಾರ್ವೆ, ಡೆನ್ಮಾರ್ಕ್ ಮತ್ತು ಗ್ರೀನ್‌ಲ್ಯಾಂಡ್‌ಗಳಲ್ಲಿ ಸೊಳ್ಳೆಗಳಿದ್ದರೂ, ಐಸ್‌ಲ್ಯಾಂಡ್‌ನಲ್ಲಿ ಮಾತ್ರ ಅವುಗಳಿಗೆ ಬದುಕಲು ಸಾಧ್ಯವಾಗಿಲ್ಲ. ಇದಕ್ಕೆ ಅಲ್ಲಿನ ಕ್ಷಣಕ್ಷಣಕ್ಕೂ ಬದಲಾಗುವ ವಿಚಿತ್ರ ಹವಾಮಾನವೇ ಕಾರಣ. ಸೊಳ್ಳೆಗಳ ಮೊಟ್ಟೆ ಮತ್ತು ಲಾರ್ವಾಗಳು ಬೆಳೆಯಲು ನೀರಿನಲ್ಲಿ ನಿರ್ದಿಷ್ಟ ತಾಪಮಾನ ಸ್ಥಿರವಾಗಿರಬೇಕು.

ಆದರೆ ಐಸ್‌ಲ್ಯಾಂಡ್‌ನಲ್ಲಿ ನೀರು ಹೆಪ್ಪುಗಟ್ಟುವುದು ಮತ್ತು ತಕ್ಷಣವೇ ಕರಗುವುದು (Freeze-Thaw Cycle) ವರ್ಷಕ್ಕೆ ಹಲವು ಬಾರಿ ನಡೆಯುವುದರಿಂದ ಸೊಳ್ಳೆಗಳ ಸಂತಾನೋತ್ಪತ್ತಿಗೆ ಅವಕಾಶವೇ ಸಿಗುವುದಿಲ್ಲ. ಜೊತೆಗೆ ಭೌಗೋಳಿಕವಾಗಿ ಪ್ರತ್ಯೇಕವಾಗಿರುವ ಈ ದ್ವೀಪಕ್ಕೆ ಹಿಮಯುಗದ ನಂತರ ನೆಲದ ಮೇಲಿನ ಹಾವುಗಳೂ ಬರಲು ಸಾಧ್ಯವಾಗಲಿಲ್ಲ.

ಹಾಗಾದರೆ ಸೊಳ್ಳೆಗಳಿಲ್ಲದ ಈ ನಾಡಿನಲ್ಲಿ ಪರಿಸರ ಸಮತೋಲನಕ್ಕೆ ಧಕ್ಕೆಯಾಗಿಲ್ಲವೇ ಎಂಬ ಪ್ರಶ್ನೆ ಮೂಡುವುದು ಸಹಜ. ಸೊಳ್ಳೆಗಳು ಪರಾಗಸ್ಪರ್ಶಕ್ಕೆ ಮತ್ತು ಮೀನು, ಕಪ್ಪೆ, ಪಕ್ಷಿಗಳ ಆಹಾರ ಸರಪಳಿಗೆ ಪೂರಕವಾಗಿರುತ್ತವೆ. ಆದರೆ ಐಸ್‌ಲ್ಯಾಂಡ್‌ನಲ್ಲಿ ಸೊಳ್ಳೆಗಳ ಜಾಗವನ್ನು ಕಚ್ಚದ ‘ಮಿಡ್ಜಸ್’ (Midges) ಎಂಬ ಸೂಕ್ಷ್ಮ ಕೀಟಗಳು ತುಂಬಿವೆ.

ಅಲ್ಲಿನ ಪ್ರಸಿದ್ಧ ಮೈವಟ್ನ್ ಸರೋವರದ ಸುತ್ತಮುತ್ತ ಕೋಟ್ಯಂತರ ಸಂಖ್ಯೆಯಲ್ಲಿರುವ ಈ ಕೀಟಗಳು ಮನುಷ್ಯರಿಗೆ ಯಾವುದೇ ರೋಗ ಹರಡದೆ, ಅಲ್ಲಿನ ಮೀನು ಮತ್ತು ಪಕ್ಷಿಗಳಿಗೆ ಆಹಾರವಾಗಿ ಪ್ರಕೃತಿಯ ಸಮತೋಲನವನ್ನು ಅಚ್ಚುಕಟ್ಟಾಗಿ ಕಾಯ್ದುಕೊಂಡಿವೆ. ಪ್ರಕೃತಿ ತನ್ನದೇ ಆದ ರೀತಿಯಲ್ಲಿ ಹೊಂದಾಣಿಕೆ ಮಾಡಿಕೊಳ್ಳುತ್ತದೆ ಎಂಬುದಕ್ಕೆ ಇದಕ್ಕಿಂತ ದೊಡ್ಡ ನಿದರ್ಶನ ಬೇಕಿಲ್ಲ.

ಸೊಳ್ಳೆಗಳಿಲ್ಲದ ಈ ಶೀತ ದ್ವೀಪದ ಮತ್ತೊಂದು ಮುಖವೆಂದರೆ ಅಲ್ಲಿನ ಬೆಂಕಿ ಮತ್ತು ಮಂಜಿನ ಸಂಗಮ. ಒಂದೆಡೆ ಯುರೋಪ್‌ನ ಅತಿ ದೊಡ್ಡ ಹಿಮನದಿಗಳು ಮಂಜಿನ ಹೊದಿಕೆ ಹೊದ್ದಿದ್ದರೆ, ಮತ್ತೊಂದೆಡೆ 30ಕ್ಕೂ ಹೆಚ್ಚು ಸಕ್ರಿಯ ಜ್ವಾಲಾಮುಖಿಗಳು ಭೂಮಿಯ ಆಳದ ಶಾಖವನ್ನು ಹೊರಸೂಸುತ್ತಿವೆ.

ನೆಲದೊಳಗಿಂದ ಆಕಾಶಕ್ಕೆ ಚಿಮ್ಮುವ ಬಿಸಿನೀರಿನ ಗೀಸರ್‌ಗಳು, ಕಪ್ಪು ಮರಳಿನ ಕಡಲತೀರಗಳು ಹಾಗೂ ಚಳಿಗಾಲದ ರಾತ್ರಿಗಳಲ್ಲಿ ಆಕಾಶದಲ್ಲಿ ಬಣ್ಣದ ಚಿತ್ತಾರ ಮೂಡಿಸುವ ‘ಉತ್ತರದ ಬೆಳಕು’ (Aurora Borealis) ಈ ನೆಲವನ್ನು ಭೂಲೋಕದ ಅಚ್ಚರಿಯನ್ನಾಗಿಸಿವೆ.

ಇಂತಹ ಕಠಿಣ ಭೌಗೋಳಿಕ ಪರಿಸ್ಥಿತಿಯ ನಡುವೆಯೂ ಐಸ್‌ಲ್ಯಾಂಡ್ ಜನರು ಬದುಕನ್ನು ಕಟ್ಟಿಕೊಂಡಿರುವ ರೀತಿ ನಿಜಕ್ಕೂ ಸ್ಫೂರ್ತಿದಾಯಕ. ತಮಗೆ ಸವಾಲಾಗಿದ್ದ ಜ್ವಾಲಾಮುಖಿಗಳ ಭೂಶಾಖವನ್ನೇ ಅವರು ತಮ್ಮ ಬದುಕಿನ ಶಕ್ತಿಯನ್ನಾಗಿ ಪರಿವರ್ತಿಸಿಕೊಂಡಿದ್ದಾರೆ.

ಭೂಮಿಯ ಆಳದ ಬಿಸಿನೀರಿನಿಂದ ಮನೆಗಳನ್ನು ಮತ್ತು ನಗರದ ಪಾದಚಾರಿ ಮಾರ್ಗಗಳನ್ನು ಬೆಚ್ಚಗಿಟ್ಟುಕೊಳ್ಳುವುದಲ್ಲದೆ, ಭೂಶಾಖದ ಹಸಿರುಮನೆಗಳಲ್ಲಿ ಟೊಮೆಟೊ, ಸ್ಟ್ರಾಬೆರಿ ಮಾತ್ರವಲ್ಲದೆ ಬಾಳೆಹಣ್ಣನ್ನೂ ಬೆಳೆದು ಕೃಷಿಯಲ್ಲೂ ಪವಾಡ ಸಾಧಿಸಿದ್ದಾರೆ.

ಸೊಳ್ಳೆಗಳಿಲ್ಲದ ಸ್ವಚ್ಛ ಪರಿಸರ ಮತ್ತು ಶೇ. 100 ರಷ್ಟು ನವೀಕರಿಸಬಹುದಾದ ಇಂಧನದ ಬಳಕೆಯೊಂದಿಗೆ, ಪ್ರಕೃತಿಯ ಸವಾಲುಗಳನ್ನೇ ವರದಾನವಾಗಿಸಿಕೊಂಡು ಬದುಕುವ ಕಲೆಯನ್ನು ಐಸ್‌ಲ್ಯಾಂಡ್ ಇಡೀ ಜಗತ್ತಿಗೆ ತೋರಿಸಿಕೊಟ್ಟಿದೆ.

✍ ಲಲಿತಶ್ರೀ ಪ್ರೀತಂ ರೈ

Category
ಕರಾವಳಿ ತರಂಗಿಣಿ