ಬೆಂಗಳೂರು: ವರ್ಷಾಂತ್ಯದ ವೇಳೆಗೆ ಬಾಹ್ಯಾಕಾಶಕ್ಕೆ ಮೂವರು ಬಾಹ್ಯಾಕಾಶಯಾನಿಗಳನ್ನು ಒಳಗೊಂಡಂತೆ ಗಗನಯಾನ ಉಡಾವಣೆಗೆ ಸಿದ್ಧವಾಗಿದೆ. ನಾಸಾದ ಸ್ಟಾರ್ ಲೈನರ್ ಬಾಹ್ಯಾಕಾಶದಲ್ಲಿರುವಂತಹ ಸ್ಥಿತಿ ಬಾರದಂತೆ ಎಚ್ಚರಿಕೆಯಿಂದ ಮುಂದುವರಿಯುವ ಅಗತ್ಯವಿದೆ ಎಂದು ಇಸ್ರೋ ಅಧ್ಯಕ್ಷ ಎಸ್.ಸೋಮನಾಥ್ ಹೇಳಿದ್ದಾರೆ.

ನಗರದ ಹೊರವಲಯದಲ್ಲಿ ನಡೆದ ಬೆಂಗಳೂರು ಸ್ಪೇಸ್ ಎಕ್ಸ್ ಪೋಗೆ ಭೇಟಿ ನೀಡಿ ಮಾತನಾಡಿದ ಅವರು, ಕೇಂದ್ರ ಸಚಿವ ಸಂಪುಟವು ಅನುಮೋದಿಸಿದ ಯೋಜನೆ ಅನ್ವಯ ಗಗನಯಾನ ಭಾರತದ ಮೊದಲ ಮಾನವ ಮಿಷನ್ ಆಗಿರಲಿದೆ. ಕೇಂದ್ರ ಸಂಪುಟ ಅನುಮೋದಿಸಿದ ನಾಲ್ಕು ಯೋಜನೆಗಳಲ್ಲಿ ವೀನಸ್ ಆರ್ಬಿಟರ್ ಮಿಷನ್ ಸಹ ಸೇರಿದ್ದು, ಅದಕಾಗ್ಕಿ 1,236 ಕೋಟಿ ಮೀಸಲಿಡಲಾಗಿದೆ ಎಂದರು.

ಈ ವರ್ಷದ ಜೂನ್ 5 ರಂದು ನಾಸಾದಿಂದ ಉಡಾವಣೆಗೊಂಡ ಬೋಯಿಂಗ್ ಸ್ಟಾರ್‌ಲೈನರ್ ಬಾಹ್ಯಾಕಾಶ ನೌಕೆ ಸೆಪ್ಟೆಂಬರ್ 7 ರಂದು ಭೂಮಿಗೆ ಗಗನಯಾತ್ರಿಗಳಿಲ್ಲದೇ ಮರಳಿತು. ಅವರನ್ನು ಮತ್ತೆ ಭೂಮಿಗೆ ಕರೆತರಲು 2025ರ ಫೆಬ್ರವರಿಯಲ್ಲಿ ದಿನಾಂಕವನ್ನು ನಿಗದಿಪಡಿಸಲಾಗಿದೆ. ನಮ್ಮ ಯಾನ ಆ ರೀತಿ ಆಗದಂತೆ ಎಚ್ಚರವಹಿಸುವ ಅಗತ್ಯವಿದೆ ಎಂದು ಹೇಳಿದರು.

ಭವಿಷ್ಯದಲ್ಲಿ ಭೂಮಿ ವಾಸಿಸಲು ಸಾಧ್ಯವಾಗದ ಸ್ಥಿತಿ ನಿರ್ಮಾಣವಾಗಬಹುದು. ಹಾಗಾಗಿ ಮುಂದಿನ ಪೀಳಿಗೆಗಾಗಿ ಮಂಗಳ ಮತ್ತು ಶುಕ್ರದಲ್ಲಿ ಏನು ನಡೆಯುತ್ತಿದೆ ಎಂಬುದನ್ನು ಅಧ್ಯಯನ ಮಾಡಬೇಕಿದೆ. ಭಾರತ ಮಂಗಳ ಮತ್ತು ಚಂದ್ರನತ್ತ ಯಶಸ್ವಿಯಾಗಿ ನೌಕೆಗಳನ್ನು ಕಳುಹಿಸಿದೆ ಎಂದರು.

ಶುಕ್ರ ಮಿಷನ್ ಬಗ್ಗೆಯೂ ಇಸ್ರೋ ಸಂಶೋಧನೆ ಮಾಡಲು ಮುಂದಾಗಿದೆ. ಮಾರ್ಚ್ 2028 ರಲ್ಲಿ ಶುಕ್ರ ಮಿಷನ್ ಅನ್ನು ಪ್ರಾರಂಭಿಸುವ ನಿರೀಕ್ಷೆಯಿದೆ. ರಷ್ಯಾ, ಚೀನಾ ಮತ್ತು ಜಪಾನ್ ಕೂಡ 2030ರ ವೇಳೆಗೆ ಶುಕ್ರಗ್ರಹಕ್ಕೆ ಉಪಗ್ರಹ ಕಳುಹಿಸುತ್ತಿವೆ. ನಾವು ದೂರದಲ್ಲಿರುವ ಮಂಗಳ ಗ್ರಹಕ್ಕೆ ಯಶಸ್ವಿಯಾಗಿ ಹೋಗಿದ್ದರೂ, ಶುಕ್ರನ ಬಳಿ ಹೋಗಲು ಕಷ್ಟಕರವಾಗಲಿದೆ. ಶುಕ್ರಗ್ರಹ ನಮಗೆ ಹತ್ತಿರದಲ್ಲಿದ್ದರೂ, ಶುಕ್ರನ ವಾತಾವರಣವು 100 ಪಟ್ಟು ಹೆಚ್ಚು ಒತ್ತಡ ಹಾಗೂ ಶಾಖವನ್ನು ಹೊಂದಿದೆ ಎಂದು ವಿವರಿಸಿದರು.