ಹೈದರಾಬಾದ್: ಮಹತ್ವದ ತೀರ್ಪಿನಲ್ಲಿ, ತೆಲಂಗಾಣ ಹೈಕೋರ್ಟ್ ಮುಸ್ಲಿಂ ಮಹಿಳೆ ತನ್ನ ಗಂಡನ ಒಪ್ಪಿಗೆಯಿಲ್ಲದೇ 'ಖುಲಾ' ವಿಚ್ಛೇದನ ಪಡೆಯಬಹುದು ಎಂದು ತೀರ್ಪು ನೀಡಿದೆ. ಈ ನಿರ್ಧಾರವು ಪತಿಯ ಅನುಮೋದನೆಯಿಲ್ಲದೆಯೂ ಧಾರ್ಮಿಕ ಸಲಹಾ ಮಂಡಳಿಯು ನೀಡುವ ಖುಲಾನಾಮ (ವಿಚ್ಛೇದನ ಪ್ರಮಾಣಪತ್ರ) ದ ಕಾನೂನು ಸಿಂಧುತ್ವವನ್ನು ಬಲಪಡಿಸುತ್ತದೆ. ನ್ಯಾಯಮೂರ್ತಿಗಳಾದ ಮೌಸಮಿ ಭಟ್ಟಾಚಾರ್ಯ ಮತ್ತು ಬಿ.ಆರ್. ಮಧುಸೂಧನ್ ರಾವ್ ಅವರನ್ನೊಳಗೊಂಡ ವಿಭಾಗೀಯ ಪೀಠವು ಕುಟುಂಬ ನ್ಯಾಯಾಲಯದ ಹಿಂದಿನ ತೀರ್ಪನ್ನು ಪ್ರಶ್ನಿಸಿ ವ್ಯಕ್ತಿಯೊಬ್ಬರು ಸಲ್ಲಿಸಿದ್ದ ಮೇಲ್ಮನವಿ ಅರ್ಜಿಯನ್ನು ವಜಾಗೊಳಿಸಿ ತೀರ್ಪು ನೀಡಿದೆ.

ಈ ಪ್ರಕರಣವು 2012 ರಲ್ಲಿ ವಿವಾಹವಾದ ಮುಸ್ಲಿಂ ದಂಪತಿಗೆ  ಕೆಲವು ವರ್ಷಗಳ ನಂತರ ಅವರ ಸಂಬಂಧದಲ್ಲಿ ಬಿರುಕು ಕಂಡು ಬಂದಿತ್ತು. ಕಿರುಕುಳ ಮತ್ತು ಕ್ರೌರ್ಯ ಎಸಗಲಾಗುತ್ತಿದೆ ಎಂದು ಆರೋಪಿಸಿ, ಪತ್ನಿ ಖುಲಾ ವಿಚ್ಛೇದನವನ್ನು ಕೋರಿದ್ದರು. ಆಕೆಯ ಪತಿ ಒಪ್ಪಿಗೆ ನೀಡಲು ನಿರಾಕರಿಸಿದಾಗ, ಅವರು ಧಾರ್ಮಿಕ ಸಲಹಾ ಮಂಡಳಿಯನ್ನು ಸಂಪರ್ಕಿಸಿದ್ದರು. ಇಸ್ಲಾಮಿಕ್ ಪದ್ಧತಿ ಪ್ರಕಾರ, ಕೌನ್ಸಿಲ್ ಪತಿಯನ್ನು ಸಂಪರ್ಕಿಸಿ ಸಮನ್ವಯ ಸಾಧಿಸಲು ಮೂರು ಬಾರಿ ಪ್ರತ್ಯೇಕ ಪ್ರಯತ್ನಗಳನ್ನು ಮಾಡಿತ್ತು. ಆದರೆ ಅವರು ಅದಕ್ಕೆ ಪ್ರತಿಕ್ರಿಯಿಸಲು ವಿಫಲವಾದಾಗ, ಕೌನ್ಸಿಲ್ ಅಕ್ಟೋಬರ್ 5, 2020 ರಂದು ಖುಲಾನಾಮ ಹೊರಡಿಸಿ ವಿಚ್ಛೇದನವನ್ನು ಔಪಚಾರಿಕಗೊಳಿಸಿತ್ತು. ನಂತರ ಪತಿ ಕುಟುಂಬ ನ್ಯಾಯಾಲಯದಲ್ಲಿ ಖುಲಾನಾಮದ ಸಿಂಧುತ್ವ ಪ್ರಶ್ನಿಸಿದ್ದರು. ಖಾಜಿ ಅಥವಾ ಸಿವಿಲ್ ನ್ಯಾಯಾಲಯವು ಮಾತ್ರ ವಿವಾಹವನ್ನು ವಿಸರ್ಜಿಸುವ ಅಧಿಕಾರ ಹೊಂದಿದೆ, ಧಾರ್ಮಿಕ ಸಲಹಾ ಸಂಸ್ಥೆ ಅಲ್ಲ ಎಂದು ವಾದ ಮಂಡಿಸಿದ್ದರು. ಕೌನ್ಸಿಲ್‌ನ ಕ್ರಮವು ಕಾನೂನುಬದ್ಧ ಮಾನ್ಯತೆಯನ್ನು ಹೊಂದಿಲ್ಲ ಎಂದು ಅವರ ಕಾನೂನು ತಂಡ ವಾದಿಸಿತ್ತು .

ಮುಸ್ಲಿಂ ವೈಯಕ್ತಿಕ ಕಾನೂನು (ಷರಿಯತ್) ಅರ್ಜಿ ಕಾಯ್ದೆ, 1937 ರ ಸೆಕ್ಷನ್ 2 ರ ಅಡಿ, ಮಹಿಳೆಯು ತನ್ನ ಪತಿಯ ಒಪ್ಪಿಗೆಯ ಅಗತ್ಯವಿಲ್ಲದೇ ಮತ್ತು ನ್ಯಾಯಾಲಯದ ಹಸ್ತಕ್ಷೇಪವಿಲ್ಲದೆ ಖುಲಾವನ್ನು ಪಡೆಯಲು ಅರ್ಹಳಾಗಿದ್ದಾಳೆ ಎಂದು ಪತ್ನಿಯ ಪರ ವಕೀಲರು ವಾದಿಸಿದ್ದರು . ಕುಟುಂಬ ನ್ಯಾಯಾಲಯವು ಈ ಹಿಂದೆ ಪತಿಯ ಮನವಿಯನ್ನು ವಜಾಗೊಳಿಸಿತ್ತು, ಖುಲಾನಾಮದ ಕಾನೂನುಬದ್ಧತೆಯನ್ನು ಎತ್ತಿಹಿಡಿದಿತ್ತು. ಧಾರ್ಮಿಕ ಸಲಹಾ ಸಂಸ್ಥೆಯ ಕ್ರಮಗಳು ಮಾನ್ಯವಾಗಿವೆ ಮತ್ತು ವೈಯಕ್ತಿಕ ಕಾನೂನಿಗೆ ಅನುಸಾರವಾಗಿವೆ ಎಂದು ಹೇಳುತ್ತಾ, ಹೈಕೋರ್ಟ್ ಈಗ ಆ ತೀರ್ಪನ್ನು ಪುನರುಚ್ಚರಿಸಿದೆ.