ಪಂಜಾಬ್​ : ಪಂಜಾಬ್​ ಪೊಲೀಸರು ಮಿಂಚಿನ ಕಾರ್ಯಾಚರಣೆ ನಡೆಸಿದ್ದಾರೆ. ಪಾಕಿಸ್ತಾನದ ಐಎಸ್​ಐ ಪರ ಕೆಲಸ ಮಾಡುತ್ತಿದ್ದ ಇಬ್ಬರು ಬೇಹುಗಾರರನ್ನು ಹೆಡೆಮುರಿ ಕಟ್ಟಿದ್ದಾರೆ. ಈ ಬಂಧಿತರಿಗೆ ಪಾಕ್​ನ ಐಎಸ್​ಐ ಏಜೆಂಟರ ಜೊತೆ ನೇರ ಸಂಪರ್ಕ ಇದ್ದು, ವಾಟ್ಸಪ್​ ಮೂಲಕ ಗುಪ್ತಚರ ಮಾಹಿತಿಯನ್ನು ರವಾನಿಸುತ್ತಿದ್ದರು ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ. ಭಾರತದಲ್ಲಿ ಇದ್ದು ಪಾಕಿಸ್ತಾನ ಪರ ಕೆಲಸ ಮಾಡುತ್ತಿದ್ದ ಇಬ್ಬರು ಆರೋಪಿಗಳನ್ನು ಪೊಲೀಸರು ಬಂಧಿಸಿದ್ದಾರೆ. ಆರೋಪಿಗಳನ್ನು ಗರುಪ್ರೀತ್​ ಸಿಂಗ್​ ಅಲಿಯಾಸ್​ ಗೋಪಿ ಫೌಜಿ ಮತ್ತು ಸಾಹಿಲ್​ ಮಸಿಹ್ ಅಲಿಯಾಸ್​ ಸಾಹಿಲ್​ ಎಂದು ಗುರುತಿಸಲಾಗಿದೆ. ಅಮೃತಸರದ ಗ್ರಾಮೀಣ ಠಾಣೆ ಪೊಲೀಸರು ಇವರನ್ನು ಬಂಧಿಸಿದ್ದಾರೆ. ಈ ಕುರಿತು ಮಾತನಾಡಿರುವ ಪಂಜಾಬ್​ ಡಿಜಿಪಿ ಗೌರವ್​ ಯಾದವ್​, ಪ್ರಾಥಮಿಕ ತನಿಖೆ ಪ್ರಕಾರ ಬಂಧಿತ ಆರೋಪಿಗಳು ಪಾಕಿಸ್ತಾನದ ಐಎಸ್​ಐ ಜೊತೆ ಲಿಂಕ್​ ಹೊಂದಿರುವ ಆರೋಪವಿದೆ. ಇವರು ಭಾರತದ ಗುಪ್ತಚರ ಮಾಹಿತಿಯನ್ನು ಐಎಸ್​ಐಗೆ ಒದಗಿಸುತ್ತಿದ್ದರು. ಗುರುಪ್ರೀತ್​ ಸಿಂಗ್​, ಐಎಸ್​ಐ ಜೊತೆ ನೇರ ಸಂಪರ್ಕ ಹೊಂದಿರುವುದು ಗೊತ್ತಾಗಿದೆ. ಈತ ಭದ್ರತಾ ವ್ಯವಸ್ಥೆಯ ಸೂಕ್ಮ ಮತ್ತು ಗುಪ್ತ ಮಾಹಿತಿಯನ್ನು ಪೆನ್​ ಡ್ರೈವ್​ ಮೂಲಕ ಹಂಚಿಕೊಂಡಿದ್ದಾನೆ. ಇದರಲ್ಲಿ ಐಎಸ್​ಐನ ಪ್ರಮುಖ ಹ್ಯಾಂಡಲರ್​ ರಾಣಾ ಜಾವೇದ್​ ಪಾತ್ರವಿದೆ ಎಂದು ಗುರುತಿಸಲಾಗಿದೆ ಎಂದು ತಿಳಿಸಿದ್ದಾರೆ. ಬೇಹುಗಾರಿಕೆಗೆ ವಾಟ್ಸಪ್​ ವಿಡಿಯೋ ಕಾಲ್​ ಮೂಲಕ ಐಎಸ್​ಐ ಜೊತೆ ಸಂಪರ್ಕ ಸಾಧಿಸಿರುವುದು ಬಯಲಾಗಿದೆ. ಅವರ ಫೋನ್​ಗಳನ್ನು ಫಾರಿನ್​ಸಿಕ್​ ಪರೀಕ್ಷೆ ಮತ್ತು ಸೈಬರ್​ ತನಿಖೆಗೆ ರವಾನಿಸಲಾಗಿದೆ. ಅವರ ಸಹಚರರನ್ನು ಪತ್ತೆಹಚ್ಚಲಾಗುವುದು. ಆರೋಪಿಗಳ ಬಂಧನದಿಂದ ಬೇಹುಗಾರಿಕೆ-ಭಯೋತ್ಪಾದಕ ಜಾಲ ಭೇದಿಸಲು ನೆರವಾಗಲಿದೆ ಎಂದು ಡಿಜಿಪಿ ಮಾಹಿತಿ ನೀಡಿದರು.