ನವದೆಹಲಿ: ಭಾರತ ಸರ್ಕಾರದಲ್ಲಿ ವಿವಿಧ ಪ್ರಮುಖ ಹುದ್ದೆಗಳನ್ನು ನಿಭಾಯಿಸಿರುವ ಜಿ20 ಶೆರ್ಪಾ ಅಮಿತಾಬ್​ ಕಾಂತ್​ ತಮ್ಮ ಹುದ್ದೆಗೆ ರಾಜೀನಾಮೆ ನೀಡಿದ್ದಾರೆ. ಸುಮಾರು 45 ವರ್ಷಗಳ ಕಾಲ ಸುದೀರ್ಘ ಸೇವೆ ಸಲ್ಲಿಸಿರುವ ಕಾಂತ್, ಭಾರತದ ನೀತಿ ಆಯೋಗದ ಮಾಜಿ ಸಿಇಒ ಕೂಡ ಆಗಿದ್ದರು. 1980ರ ಬ್ಯಾಚ್​ನ ಕೇರಳ ಕೇಡರ್​ನ ಐಎಎಸ್​ ಅಧಿಕಾರಿಯಾಗಿರುವ ಇವರನ್ನು 2022ರ ಜುಲೈನಲ್ಲಿ ಭಾರತದ ಜಿ20ಯ ಶೆರ್ಪಾ ಆಗಿ ನೇಮಿಸಲಾಗಿತ್ತು. ತಮ್ಮ ಸಾರ್ವಜನಿಕ ಸೇವಾ ಹುದ್ದೆಗೆ ರಾಜೀನಾಮೆ ನೀಡಿರುವ ಕುರಿತು ಲಿಂಕ್ಡಿನ್​ ಪ್ರೊಫೈಲ್​ನಲ್ಲಿ ಪೋಸ್ಟ್​ ಮಾಡಿರುವ ಕಾಂತ್​, ನನ್ನ ಹೊಸ ಪ್ರಯಾಣ ಆರಂಭ ಎಂಬ ಶೀರ್ಷಿಕೆ ನೀಡಿ, ರಾಜೀನಾಮೆ ಕುರಿತು ಬರೆದುಕೊಂಡಿದ್ದಾರೆ.

"45 ವರ್ಷಗಳ ಕಾಲ ಸರ್ಕಾರಕ್ಕೆ ಸೇವೆ ಸಲ್ಲಿಸಿದ ಬಳಿಕ ನಾನು ಇದೀಗ ಹೊಸ ಅವಕಾಶವನ್ನು ಅಪ್ಪಿಕೊಳ್ಳಲು ಹಾಗೂ ಜೀವನದಲ್ಲಿ ಮುಂದೆ ಸಾಗುವ ನಿರ್ಧಾರ ನಡೆಸಿದ್ದೇನೆ. ಜಿ-20 ಶೆರ್ಪಾ ಹುದ್ದೆಗೆ ನನ್ನ ರಾಜೀನಾಮೆ ಸ್ವೀಕರಿಸಿದ ಭಾರತದ ಪ್ರಧಾನಿಗೆ ಹೃತ್ಪೂರ್ವಕ ಧನ್ಯವಾದ ತಿಳಿಸುತ್ತೇನೆ. ಜಿ-20 ಶೆರ್ಪಾ ನನಗೆ ಹಲವಾರು ಅಭಿವೃದ್ಧಿ ಉಪಕ್ರಮಗಳನ್ನು ಮುನ್ನಡೆಸಲು ಹಾಗೂ ಭಾರತದ ಬೆಳವಣಿಗೆ, ಅಭಿವೃದ್ಧಿ ಮತ್ತು ಪ್ರಗತಿಗೆ ಕೊಡುಗೆ ನೀಡಲು ಅವಕಾಶ ನೀಡಿತು. ಆಫ್ರಿಕನ್ ಒಕ್ಕೂಟವನ್ನು G-20ಯ ವ್ಯಾಪ್ತಿಯಲ್ಲಿ ಯಶಸ್ವಿಯಾಗಿ ವಿಸ್ತರಿಸಿದ್ದೇವೆ. ಜಾಗತಿಕ ಒಳಗೊಳ್ಳುವಿಕೆ ಮತ್ತು ಜಾಗತಿಕ ದಕ್ಷಿಣದೊಂದಿಗೆ ಸಹಯೋಗಕ್ಕೆ ಭಾರತದ ಭರವಸೆ ಮತ್ತು ಬದ್ಧತೆಯನ್ನು ಪೂರೈಸಿದ್ದೇವೆ" ಎಂದು ಕಾಂತ್​ ತಿಳಿಸಿದ್ದಾರೆ.

"2016-2022 ರವರೆಗೆ ನೀತಿ ಆಯೋಗದ ಸಿಇಒ ಆಗಿದ್ದಾಗ ಸಾಮಾಜಿಕ ಆರ್ಥಿಕ ನೀತಿಗಳನ್ನು ಸುಧಾರಿಸುವ ಮೂಲಕ ಲಕ್ಷಾಂತರ ನಾಗರಿಕರಿಗೆ ಅವಕಾಶಗಳನ್ನು ಸೃಷ್ಟಿಸಲಾಗಿದೆ. ದೇಶದ 115 ಅತ್ಯಂತ ಹಿಂದುಳಿದ ಜಿಲ್ಲೆಗಳನ್ನು ಉನ್ನತೀಕರಿಸಲಾಗಿದೆ. ನನ್ನ ಸಂಪೂರ್ಣ ವೃತ್ತಿಜೀವನ ಬಲವಾದ ಸೇವಾಪ್ರಜ್ಞೆಯಿಂದ ಮಾರ್ಗದರ್ಶಿತವಾಗಿದೆ. ಐಎಎಸ್​ ವೃತ್ತಿ ಜೀವನದಲ್ಲಿ ಕೇರಳ ನನ್ನ ಮೊದಲ ಮನೆಯಾಗಿದ್ದು, ಕ್ಯಾಲಿಕಟ್ ವಿಮಾನ ನಿಲ್ದಾಣದ ವಿಸ್ತರಣೆಗೆ ಬೆಂಬಲ, ಕೇರಳದ ಮೀನುಗಾರರು ಮತ್ತು ಮಹಿಳೆಯರ ಅಭಿವೃದ್ಧಿಗೆ ನಿಕಟವಾಗಿ ಕೆಲಸ ಮಾಡುವ ಮೂಲಕ ಸಮುದಾಯಗಳ ಏಳಿಗೆಗೆ ಆಳವಾಗಿ ಕೆಲಸ ಮಾಡಿದ್ದೇನೆ" ಎಂದು ಕಾಂತ್ ಬರೆದುಕೊಂಡಿದ್ದಾರೆ.