ಟೆಹ್ರಾನ್​: ಇಸ್ರೇಲ್​ ಮತ್ತು ಇರಾನ್​ ನಡುವಿನ ಸಂಘರ್ಷ ತಾರಕಕ್ಕೇರಿದೆ. ಉಭಯ ರಾಷ್ಟ್ರಗಳ ನಡುವೆ ಭಾರೀ ದಾಳಿಗಳು ನಡೆಯುತ್ತಿವೆ. ಇಸ್ರೇಲ್​ ಪಡೆಗಳು ಇರಾನ್​ ತೈಲ ಸಂಸ್ಕರಣಾ ಘಟಕದ ಮೇಲೆ ಬಾಂಬ್ ದಾಳಿ ಮಾಡಿ ತೀವ್ರ ಹಾನಿ ಉಂಟು ಮಾಡಿವೆ. ಜೊತೆಗೆ, ಗುಪ್ತಚರ ದಳದ ಮುಖ್ಯಸ್ಥರನ್ನೂ ಹೊಡೆದು ಹಾಕಿದೆ. ಇದಕ್ಕೆ ಪ್ರತಿಯಾಗಿ ಇರಾನ್​ ಕೂಡ ಇಸ್ರೇಲ್​ ಮೇಲೆ ಹಗಲು-ರಾತ್ರಿ ಕ್ಷಿಪಣಿಗಳ ಸುರಿಮಳೆ ಸುರಿಸುತ್ತಿದೆ. ಇದು ಅಪಾರ ಹಾನಿಯನ್ನುಂಟು ಮಾಡಿದೆ. ಎರಡೂ ರಾಷ್ಟ್ರಗಳ ಮಧ್ಯೆ ಕಳೆದ ನಾಲ್ಕು ದಿನಗಳಿಂದ 'ಏಟಿಗೆ ಎದಿರೇಟು' ಎಂಬಂತೆ ದಾಳಿಗಳು ನಡೆಯುತ್ತಿವೆ.

ಇಸ್ರೇಲ್ ಮೇಲೆ ಇರಾನ್ ಇಂದು ಕ್ಷಿಪಣಿ ದಾಳಿಗಳನ್ನು ನಡೆಸಿತು. ಇಸ್ರೇಲ್​ ರಕ್ಷಣಾ ವ್ಯವಸ್ಥೆಯಾದ ಐರನ್​ಡೋಮ್​ ಅನ್ನು ಭೇದಿಸಿಕೊಂಡು ಬಂದ ಕ್ಷಿಪಣಿಗಳು ಟೆಲ್​ ಅವೀವ್​ನ ಹಲವು ಪ್ರದೇಶಗಳಲ್ಲಿ ಅಪ್ಪಳಿಸಿವೆ. ಇದರಿಂದ ಸಾವು-ನೋವುಗಳೂ ಹೆಚ್ಚಿವೆ. ಇದರಿಂದ ವಿಸ್ತೃತ ಮತ್ತು ಅಪಾಯಕಾರಿ ಯುದ್ಧಕ್ಕೆ ಎಡೆ ಮಾಡಿಕೊಟ್ಟಿದೆ. ಇಸ್ರೇಲ್ ಕೂಡ ತನ್ನ ದಾಳಿಯನ್ನು ಮತ್ತಷ್ಟು ಬಲಪಡಿಸಿದ್ದು,  ಇರಾನ್​ನ ತೈಲ ಸಂಸ್ಕರಣಾ ಘಟಕವನ್ನು ಗುರಿಯಾಗಿಸಿಕೊಂಡು ದಾಳಿ ಮಾಡಿದೆ. ಇದರಿಂದ ತೈಲೋತ್ಪನ್ನ ಮತ್ತು ಸಾಗಣೆ ಮೇಲೆ ಭಾರೀ ಪರಿಣಾಮ ಬೀರಲಿದೆ. ಇರಾನ್​ ವಿಶ್ವದ ಬೇಡಿಕೆಯಲ್ಲಿ ಶೇಕಡಾ 6.5ರಷ್ಟು ತೈಲವನ್ನು ಉತ್ಪಾದಿಸುತ್ತದೆ. ತೈಲಾಗಾರಕ್ಕೆ ಹಾನಿ ಉಂಟಾಗಿದ್ದು, ಮುಂದಿನ ದಿನಗಳಲ್ಲಿ ತೀವ್ರ ಬಿಕ್ಕಟ್ಟು ಸೃಷ್ಟಿಸುವ ಸಾಧ್ಯತೆ ಇದೆ.

ಇಸ್ರೇಲ್ ದಾಳಿಗೆ ಅಮೆರಿಕ ಬೆಂಬಲ ನೀಡುತ್ತಿದೆ ಎಂದು ಆರೋಪಿಸಿರುವ ಇರಾನ್ ತನ್ನ ದಾಳಿಯನ್ನು ಅಮೆರಿಕ ಕಾನ್ಸುಲೇಟ್​ ಮೇಲೆ ಗುರಿ ಮಾಡಿದೆ. ಇದರಿಂದ ಸೋಮವಾರದ ದಾಳಿಯಲ್ಲಿ ಕ್ಷಿಪಣಿಯೊಂದು ಟೆಲ್ ಅವಿವ್​​ನಲ್ಲಿರುವ ಅಮೆರಿಕದ ಕಾನ್ಸುಲೇಟ್ ಕಚೇರಿಗೆ ಬಡಿದಿದೆ. ಇದರಿಂದ ಕಟ್ಟಡಕ್ಕೆ ಸಣ್ಣಪುಟ್ಟ ಹಾನಿಯಾಗಿದೆ ಎಂದು ಅಮೆರಿಕದ ರಾಯಭಾರಿ ಮೈಕ್ ಹಕಬಿ ತಿಳಿಸಿದ್ದಾರೆ.