ಮಹಾರಾಷ್ಟ್ರ : ಭಾರತೀಯ ಸೇನಾಪಡೆಗಳ ಕಾರ್ಯಾಚರಣೆಯನ್ನು ಎದುರಿಸದೆ ವಿಶ್ವದ ಮುಂದೆ ಅವಮಾನಕ್ಕೀಡಾಗಿರುವ ಪಾಕಿಸ್ತಾನ, ತಂತ್ರಜ್ಞಾನದಲ್ಲೂ ಎಷ್ಟು ಟೊಳ್ಳು ಎಂಬುದನ್ನು ತಾನೇ ತೋರಿಸಿಕೊಂಡಿದೆ. ಭಾರತದ ವೆಬ್​ಸೈಟ್​ಗಳ ಮೇಲೆ 15 ಲಕ್ಷ ಬಾರಿ ಸೈಬರ್​ ದಾಳಿ ನಡೆಸಿ ಯಶಸ್ಸು ಕಂಡಿದ್ದು ಬರೀ 150 ಸಲ ಮಾತ್ರ.ಪಹಲ್ಗಾಮ್ ಭಯೋತ್ಪಾದಕ ದಾಳಿಯ ನಂತರ ಪಾಕಿಸ್ತಾನವು ಭಾರತದ ಸೇನೆ, ಆಡಳಿತ, ಸರ್ಕಾರ ಸೇರಿ ಇನ್ನಿತರ ವೆಬ್‌ಸೈಟ್‌ಗಳನ್ನು ಗುರಿಯಾಗಿಸಿಕೊಂಡು 15 ಲಕ್ಷಕ್ಕೂ ಹೆಚ್ಚು ಸೈಬರ್ ದಾಳಿಗಳನ್ನು ನಡೆಸಿದೆ ಎಂದು ಮಹಾರಾಷ್ಟ್ರದ ಸೈಬರ್​ ವಿಭಾಗ ಗುರುತಿಸಿದೆ. ಇಷ್ಟು ಬಾರಿಯ ದಾಳಿಯಲ್ಲಿ ಪಾಕಿಸ್ತಾನದ ಸೈಬರ್​ ಕಳ್ಳರು ಕೇವಲ 150 ಬಾರಿ ಮಾತ್ರ ಯಶಸ್ವಿಯಾಗಿದ್ದಾರೆ ಎಂದು ಅದು ತಿಳಿಸಿದೆ.

ಮಾಧ್ಯಮಗಳೊಂದಿಗೆ ಮಾತನಾಡಿರುವ ಮಹಾರಾಷ್ಟ್ರದ ಹಿರಿಯ ಅಧಿಕಾರಿಯೊಬ್ಬರು, "ಮುಂಬೈನ ಛತ್ರಪತಿ ಶಿವಾಜಿ ಮಹಾರಾಜ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ, ವಾಯುಯಾನ ಸಂಸ್ಥೆಗಳು, ಸ್ಥಳೀಯ ಆಡಳಿತ ಸಂಸ್ಥೆಗಳು, ಚುನಾವಣಾ ಆಯೋಗದ ವೆಬ್‌ಸೈಟ್​​ಗಳ ಮೇಲೆ ಪಾಕಿಸ್ತಾನದ ಹ್ಯಾಕರ್‌ಗಳು ದಾಳಿ ಮಾಡಿ ಡೇಟಾ ಕದಿಯಲು ಯತ್ನಿಸಿದ್ದಾರೆ" ಎಂದರು.

"ಭಾರತ-ಪಾಕಿಸ್ತಾನ ಕದನ ವಿರಾಮ ಘೋಷಿಸಿದ ನಂತರ ಸರ್ಕಾರಿ ವೆಬ್‌ಸೈಟ್‌ಗಳ ಮೇಲಿನ ಸೈಬರ್ ದಾಳಿಗಳು ಕಡಿಮೆಯಾಗಿವೆ. ಆದಾಗ್ಯೂ, ಸಂಪೂರ್ಣವಾಗಿ ನಿಂತಿಲ್ಲ. ಪಾಕಿಸ್ತಾನ, ಬಾಂಗ್ಲಾದೇಶ, ಇಂಡೋನೇಷ್ಯಾ, ಮೊರಾಕ್ಕೊ ಮತ್ತು ಮಧ್ಯಪ್ರಾಚ್ಯ ದೇಶಗಳಿಂದ ಈ ದಾಳಿಗಳು ಮುಂದುವರೆದಿವೆ" ಎಂದು ಮಹಾರಾಷ್ಟ್ರ ಸೈಬರ್​ ವಿಭಾಗದ ಹೆಚ್ಚುವರಿ ಪೊಲೀಸ್​ ಮಹಾನಿರ್ದೇಶಕ ಯಶಸ್ವಿ ಯಾದವ್​ ಹೇಳಿದರು.

"ಪಾಕಿಸ್ತಾನ ಮೂಲದ APT 36, ಪಾಕಿಸ್ತಾನ ಸೈಬರ್​ ಫೋರ್ಸ್​, ಟೀಮ್​ ಇನ್ಸೇನ್​​ ಪಿಕೆ, ಮಿಸ್ಟೀರಿಯಸ್​​ ಬಾಂಗ್ಲಾದೇಶ, ಇಂಡೋ ಹ್ಯಾಕ್ಸ್​ ಸೆಕ್​, ಸೈಬರ್​ ಗ್ರೂಪ್​ HOAX 1337, ನ್ಯಾಷನಲ್​​ ಸೈನರ್​ ಕ್ರೂ ಹ್ಯಾಕಿಂಗ್​ ಗುಂಪುಗಳು ಒಟ್ಟಾಗಿ ಭಾರತದ ವೆಬ್​ಸೈಟ್​ಗಳನ್ನು ಗುರಿಯಾಗಿಸಿ 15 ಲಕ್ಷಕ್ಕೂ ಅಧಿಕ ಸೈಬರ್​ ದಾಳಿಗಳನ್ನು ನಡೆಸಿವೆ" ಎಂದು ಯಾದವ್​ ಅವರು ಮಾಹಿತಿ ಹಂಚಿಕೊಂಡರು.

150 ಸೈಬರ್ ದಾಳಿಗಳಲ್ಲಿ ಯಶ ಕಂಡಿರುವ ಪಾಕ್​ ಕಳ್ಳರು, ಕುಲ್ಗಾಂವ್ ಬದ್ಲಾಪುರ್ ಮುನ್ಸಿಪಲ್ ಕೌನ್ಸಿಲ್ ವೆಬ್‌ಸೈಟ್ ವಿರೂಪಗೊಳಿಸಿದ್ದಾರೆ. ಮುಂಬೈ ವಿಮಾನ ನಿಲ್ದಾಣ ಮತ್ತು ಟೆಲಿಕಾಂ ಕಂಪನಿಗಳಿಂದ ಡೇಟಾ ಕದ್ದಿದ್ದಾರೆ ಎಂದು ಹೇಳಿಕೊಂಡಿದ್ದಾರೆ. ಕೆಲವು ಡೇಟಾ ಡಾರ್ಕ್‌ನೆಟ್‌ನಲ್ಲಿ ಕಾಣಿಸಿಕೊಂಡಿದೆ ಎಂದು ಹೇಳಲಾಗಿದೆ. ಜಲಂಧರ್‌ನಲ್ಲಿರುವ ಡಿಫೆನ್ಸ್ ನರ್ಸಿಂಗ್ ಕಾಲೇಜಿನ ವೆಬ್‌ಸೈಟ್ ಕೂಡ ಹ್ಯಾಕ್​ ಆಗಿದೆ.

"ಭಾರತ ಸೇನಾ ಕಾರ್ಯಾಚರಣೆಗಳಿಗೆ ಸಂಬಂಧಿಸಿದಂತೆ 5 ಸಾವಿರಕ್ಕೂ ಹೆಚ್ಚು ತಪ್ಪು ಮಾಹಿತಿ ಮತ್ತು ನಕಲಿ ಸುದ್ದಿಗಳನ್ನು ಹರಡಲಾಗಿದೆ. ಅದರಲ್ಲಿ 80 ತಪ್ಪು ಮಾಹಿತಿಗಳಲ್ಲಿ 35 ಸುಳ್ಳನ್ನು ಅಳಿಸಲಾಗಿದೆ. ಉಳಿದ 45 ಇನ್ನೂ ಬಾಕಿ ಇವೆ" ಎಂದು ಅಧಿಕಾರಿ ಹೇಳಿದರು.