ಜೋಹಾನ್ಸ್​ಬರ್ಗ್​: ದಕ್ಷಿಣ ಆಫ್ರಿಕಾದ ಫ್ರೀ ಸ್ಟೇಟ್ ಪ್ರಾಂತ್ಯದಲ್ಲಿ, ವರ್ಣಭೇದ ನೀತಿಯ ಕಾನೂನಿನಿಂದಾಗಿ ಒಂದು ಶತಮಾನಕ್ಕೂ ಹೆಚ್ಚು ಕಾಲ ಭಾರತೀಯರನ್ನು ನಿಷೇಧಿಸಲಾಗಿತ್ತು. ಆದರೆ ಇದೀಗ ಅದೇ ಪ್ರಾಂತ್ಯದ ಬ್ಲೋಮ್‌ಫಾಂಟೈನ್ ಪ್ರಾಂತೀಯ ರಾಜಧಾನಿಯಲ್ಲಿರುವ ಆಂಗ್ಲೋ-ಬೋಯರ್ ಯುದ್ಧ ವಸ್ತುಸಂಗ್ರಹಾಲಯದಲ್ಲಿ ಮಹಾತ್ಮ ಗಾಂಧೀಜಿ ಅವರ ಜೀವಿತಾವಧಿಗಿಂತಲೂ ದೊಡ್ಡದಾದ ಪ್ರತಿಮೆಯೊಂದು ತಲೆ ಎತ್ತಿ ನಿಂತಿದೆ.

ಈ ಪ್ರತಿಮೆಯನ್ನು ಏಪ್ರಿಲ್​ 11 ರಂದು ಭಾರತೀಯ ಹೈಕಮಿಷನರ್​ ಪ್ರಭಾತ್​ ಕುಮಾರ್​ ಅವರು ಅನಾವರಣಗೊಳಿಸಿದರು. ಇದೇ ವೇಳೆ 1899 - 1902ರ ಆಂಗ್ಲೋ- ಬೋಯರ್​ ಯುದ್ಧದಲ್ಲಿ ಭಾರತೀಯರ ಪಾಲ್ಗೊಳ್ಳುವಿಕೆಯ ಕುರಿತು ಇಲ್ಲಿವರೆಗೆ ತಿಳಿಯದ ಕಥೆಗಳ ಕುರಿತ ಸಾಕ್ಷ್ಯಚಿತ್ರ ಜೊತೆಗೆ ಪುಸ್ತಕವನ್ನು ಕೂಡ ಬಿಡುಗಡೆಗೊಳಿಸಿದರು.

ಪದ್ಮಭೂಷಣ ಪ್ರಶಸ್ತಿ ಪುರಸ್ಕೃತ ರಾಮ್​ ವಾಂಗಿ ಸುತಾರ್​ ಅವರು, ಗಾಂಧೀಜಿಯ ಕಂಚಿನ ಪ್ರತಿಮೆಯನ್ನು ಭಾರತೀಯು ಸಾಂಸ್ಕೃತಿಕ ಸಂಬಂಧಗಳ ಮಂಡಳಿಯ ವಸ್ತುಸಂಗ್ರಹಾಲಯದ ಮೂಲಕ ಅಲ್ಲಿರುವ ವಸ್ತು ಸಂಗ್ರಹಾಲಯಕ್ಕೆ ದಾನ ನೀಡಿದ್ದಾರೆ.

1994ರಲ್ಲಿ ನೆಲ್ಸನ್ ಮಂಡೇಲಾ ಅವರು ದಕ್ಷಿಣ ಆಫ್ರಿಕಾದ ಮೊದಲ ಪ್ರಜಾಪ್ರಭುತ್ವ ಅಧ್ಯಕ್ಷರಾಗಿ ಆಯ್ಕೆಯಾಗುವವರೆಗೂ, ಈ ಹಿಂದೆ ಆರೆಂಜ್ ಫ್ರೀ ಸ್ಟೇಟ್ ಎಂದು ಕರೆಯಲ್ಪಡುತ್ತಿದ್ದ ಪ್ರಾಂತ್ಯಕ್ಕೆ ಭಾರತೀಯರನ್ನು ಕಾನೂನಿನ ಮೂಲಕ ನಿಷೇಧಿಸಲಾಗಿತ್ತು. ಕಬ್ಬಿನ ಕೃಷಿ ಒಪ್ಪಂದದ ಕಾರ್ಮಿಕರಾಗಿ ತಮ್ಮ ಪೂರ್ವಜರು ಮೊದಲು ಬಂದಿಳಿದ ಕರಾವಳಿ ನಗರವಾದ ಡರ್ಬನ್​ಗೆ ಹೋಗಲು ಈ ಪ್ರಾಂತ್ಯದ ಮೂಲಕ ಪ್ರಯಾಣಿಸುವವರು ಸಹ ಮುಂಗಡವಾಗಿ ಪರವಾನಗಿ ಪಡೆಯಬೇಕಾಗಿತ್ತು.

"ಬ್ಲೋಮ್‌ಫಾಂಟೈನ್‌ನಲ್ಲಿರುವ ಯುದ್ಧ ವಸ್ತುಸಂಗ್ರಹಾಲಯದಲ್ಲಿ ದಕ್ಷಿಣ ಆಫ್ರಿಕಾದ ಆಂಗ್ಲೋ-ಬೋಯರ್ ಯುದ್ಧವನ್ನು ಕೇಂದ್ರ ವಿಷಯವನ್ನಾಗಿ ಪ್ರಸ್ತುತಪಡಿಸಲಾಗಿದೆ. ಈ ಯುದ್ಧದಲ್ಲಿ ಬಿಳಿಯರು, ಆಫ್ರಿಕನ್‌ಗಳು, ವರ್ಣೀಯರು ಮತ್ತು ಭಾರತೀಯರು ಸೇರಿದಂತೆ ಎಲ್ಲಾ ಜನಾಂಗದ ದಕ್ಷಿಣ ಆಫ್ರಿಕನ್ನರು ಭಾಗವಹಿಸಿದ್ದರು. ಈ ಪಬ್ಲಿಕೇಶನ್​ ಮೂಲಕ ದಕ್ಷಿಣ ಆಫ್ರಿಕಾದ ಭಾರತೀಯರು ಮತ್ತು ಭಾರತದಿಂದ ಬಂದವರು ಸೇರಿ, ಯುದ್ಧದಲ್ಲಿ ಭಾರತೀಯರ ಪಾಲ್ಗೊಳ್ಳುವಿಕೆ ಬಗ್ಗೆ ದೀರ್ಘಕಾಲದಿಂದ ಬಾಕಿ ಉಳಿದಿರುವ ಪ್ರಸ್ತುತಿ ನೀಡುವ ಯೋಜನೆಯನ್ನು ವಸ್ತುಸಂಗ್ರಹಾಲಯ ಪ್ರಾರಂಭಿಸಿದೆ" ಎಂದು ಬ್ಲೋಮ್‌ಫಾಂಟೈನ್‌ನಲ್ಲಿರುವ ಯುದ್ಧ ವಸ್ತುಸಂಗ್ರಹಾಲಯದ ನಿರ್ದೇಶಕಿ ಟೋಕಿ ಪ್ರಿಟೋರಿಯಸ್ ತಿಳಿಸಿದರು.