ವಾಷಿಂಗ್ಟನ್​: ಪರಮಾಣು ಒಪ್ಪಂದ ಕುರಿತು ಅಮರಿಕ ಇರಾನ್​ ಜೊತೆ ನೇರ ಮಾತುಕತೆ ನಡೆಸಲಿದೆ. ಈ ವೇಳೆ, ಅವರಿಗೆ ಪರಮಾಣು ಶಸ್ತ್ರಾಸ್ತ್ರ ಕಾರ್ಯಕ್ರಮ ತ್ಯಜಿಸುವಂತೆ ಮನವೊಲಿಸಲಾಗುವುದು. ಒಂದು ವೇಳೆ ಅವರು ಒಪ್ಪದೇ ಹೋದಲ್ಲಿ ದೊಡ್ಡ ಅಪಾಯಕ್ಕೆ ಸಿಲುಕಲಿದ್ದಾರೆ ಎಂದು ಡೋನಾಲ್ಡ್​ ಟ್ರಂಪ್​ ಇರಾನ್​ಗೆ ಎಚ್ಚರಿಸಿದ್ದಾರೆ.

ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಭೇಟಿ ಬಳಿಕ ಮಾತನಾಡಿದ ಟ್ರಂಪ್​, ಈ ಕುರಿತು ಶನಿವಾರ ಮಾತುಕತೆ ಆರಂಭವಾಗಲಿದೆ. ಟೆಹ್ರಾನ್ ಪರಮಾಣು ಶಸ್ತ್ರಾಸ್ತ್ರಗಳನ್ನು ಪಡೆಯಲು ಸಾಧ್ಯವಿಲ್ಲ. ಈ ಕುರಿತು ಅವರೊಂದಿಗೆ ನೇರವಾಗಿ ಮಾತುಕತೆ ನಡೆಸಿ, ಒಪ್ಪಂದ ಮಾಡಿಕೊಳ್ಳಲಾಗುವುದು ಎಂದರು. ಇರಾನ್​ ಮೇಲಿನ ಅಮೆರಿಕ ಕಾರ್ಯಾಚರಣೆ ಕುರಿತು ವಿಶ್ವಸಂಸ್ಥೆಯಿಂದ ತಕ್ಷಣಕ್ಕೆ ಯಾವುದೇ ಪ್ರತಿಕ್ರಿಯೆ ಬಂದಿಲ್ಲ.

ಇತ್ತೀಚಿಗೆ ಟ್ರಂಪ್​ ಇರಾನ್​ ಸರ್ವೋಚ್ಛ ನಾಯಕ ಅಯತೊಲ್ಲಾ ಅಲಿ ಖಮೇನಿಗೆ ಪತ್ರವನ್ನು ಬರೆದು, ನೇರ ಮಾತುಕತೆಗೆ ಮುಂದಾಗುವಂತೆ ತಿಳಿಸಿದ್ದರು. ಈಗಾಗಲೇ ಇರಾನ್​ ಟ್ರಂಪ್​ ಅವರ ಮೊದಲ ಮನವಿಯನ್ನು ತಿರಸ್ಕರಿಸಿದ್ದು, ಪರೋಕ್ಷ ಮಾತುಕತೆ ಸಾಧ್ಯತೆ ಕುರಿತ ಮಾತುಗಳು ಕೇಳಿ ಬರುತ್ತಿವೆ. ಆದರೆ, ಟ್ರಂಪ್​ ಮಾತ್ರ ಇರಾನ್​ಗೆ ನಿರಂತವಾಗಿ ಮಾತುಕತೆಗೆ ಒಪ್ಪದಿದ್ದರೆ ದಾಳಿ ಮಾಡುವುದಾಗಿ ಎಚ್ಚರಿಕೆ ನೀಡುತ್ತಿದ್ದು, ಪ್ರತೀಕಾರದ ವಾರ್ನಿಂಗ್​ ಕೊಟ್ಟಿದ್ದಾರೆ. 

ಟ್ರಂಪ್​ ಮೊದಲ ಆಡಳಿತಾವಧಿಯಲ್ಲೇ, ಡೆಮಾಕ್ರಟಿಕ್ ಅಧ್ಯಕ್ಷ ಬರಾಕ್ ಒಬಾಮಾ ಆಡಳಿತ ಅವಧಿಯಲ್ಲಿ ಇರಾನ್ ಜೊತೆ ನಡೆಸಿದ್ದ ಐತಿಹಾಸಿಕ ಪರಮಾಣು ಒಪ್ಪಂದದಿಂದ ಅಮೆರಿಕ ಹಿಂದೆ ಸರಿದಿತ್ತು. ಇರಾನ್​ ಜೊತೆಗಿನ ಒಪ್ಪಂದಕ್ಕೆ ಟ್ರಂಪ್​ ನಡೆಸುತ್ತಿರುವ ಪ್ರಯತ್ನಕ್ಕೆ ಇಸ್ರೇಲ್​ ಪ್ರಧಾನಿ ಬೆಂಬಲಿಸಿದ್ದು, ಇಸ್ರೇಲ್​ ಮತ್ತು ಅಮೆರಿಕ, ಇರಾನ್​ ಯಾವುದೇ ಪರಮಾಣು ಅಭಿವೃದ್ಧಿ ಮಾಡದಂತೆ ನೋಡಿಕೊಳ್ಳುವ ಗುರಿ ಹೊಂದಿರುವುದಾಗಿ ತಿಳಿಸಿದೆ.

ಟ್ರಂಪ್​ ಪತ್ರದಲ್ಲಿ ಉಲ್ಲೇಖಿಸಿರುವ ನೇರ ಸಭೆಯು ಉನ್ನತ ಮಟ್ಟದಲ್ಲಿ ನಡೆಯಲಿದ್ದು, ಈ ಮಾತುಕತೆಗಾಗಿ ಹಾಗೂ ಸೂಕ್ಷ್ಮ ರಾಜತಾಂತ್ರಿಕ ಮಾತುಕತೆಯಲ್ಲಿ ಯಾರೆಲ್ಲ ಭಾಗಿಯಾಗಲಿದ್ದಾರೆ ಎಂಬುದು ಇನ್ನೂ ಬಹಿರಂಗವಾಗಿಲ್ಲ. ಆದರೆ, ಮಧ್ಯಪ್ರಾಚ್ಯದ ಸುಲ್ತಾನ್​ ಒಮಾನ್ ಇದರ ನೇತೃತ್ವ ವಹಿಸುವ ಸಾಧ್ಯತೆಗಳಿವೆ ಎಂದು ತಿಳಿದು ಬಂದಿದೆ.