ಅಮೆರಿಕ : ಇತ್ತೀಚೆಗೆ ಅಂತರಾಷ್ಟ್ರೀಯ ಮಾಧ್ಯಮಗಳು ವಿಶ್ವದ ಶ್ರೀಮಂತ ಮತ್ತು ಉದ್ಯಮಿ ಎಲೋನ್ ಮಸ್ಕ್ ಮತ್ತು ಅಮೆರಿಕ ಅಧ್ಯಕ್ಷ ಡೋನಾಲ್ಡ್​ ಟ್ರಂಪ್​ ಬಗ್ಗೆ ಸಂಚಲನಕಾರಿ ಸುದ್ದಿಗಳನ್ನು ಬಿತ್ತರಿಸಿದ್ದವು. ಟ್ರಂಪ್​ ಆಡಳಿತದಿಂದ ಮಸ್ಕ್​ ದೂರ ಸರಿಯಲಿದ್ದಾರೆ ಎಂಬ ವರದಿಗಳು ಎಲ್ಲೆಡೆ ಕುತೂಹಲ ಮೂಡಿಸಿತ್ತು. ಈ ಸುದ್ದಿಯನ್ನು ಮಸ್ಕ್​ ಖಂಡಿಸಿದ್ದಾರೆ.

ಅಮೆರಿಕ ಸರ್ಕಾರಿ ಸಲಹೆಗಾರರಾಗಿರುವ ಎಲಾನ್ ಮಸ್ಕ್ ಶೀಘ್ರದಲ್ಲೇ DOGE ಜವಾಬ್ದಾರಿಗಳಿಂದ ಕೆಳಗಿಳಿಯಲಿದ್ದಾರೆ ಎಂದು ವರದಿಯಾಗಿತ್ತು. ಮೇ ಅಂತ್ಯ ಅಥವಾ ಜೂನ್ ಮೊದಲ ವಾರದಲ್ಲಿ ಮಸ್ಕ್ ಆ ಜವಾಬ್ದಾರಿಗಳಿಗೆ ಗುಡ್​ ಬೈ ಹೇಳುವ ಸಾಧ್ಯತೆ ಇದೆ. ಈ ವಿಷಯವನ್ನು ಡೊನಾಲ್ಡ್ ಟ್ರಂಪ್ ತಮ್ಮ ಮೂವರು ಆಪ್ತ ಸಹಾಯಕರೊಂದಿಗೆ ಸಂಪುಟಕ್ಕೆ ತಿಳಿಸಿದ್ದಾರೆ ಎಂದು ಅಂತರಾಷ್ಟ್ರೀಯ ಮಾಧ್ಯಮಗಳು ವರದಿ ಮಾಡಿದ್ದವು. ಆದರೆ, ಎಲ್ಲ ಊಹಾಪೋಹಕ್ಕೆ ತೆರೆ ಎಳೆದಿರುವ ಮಸ್ಕ್​, ''ಇದೆಲ್ಲ ಫೇಕ್​ ನ್ಯೂಸ್''​ ಎಂದು​ ತಮ್ಮ ಎಕ್ಸ್​ ಪೋಸ್ಟ್​ನಲ್ಲಿ ಸ್ಪಷ್ಟನೆ ನೀಡಿದ್ದಾರೆ.

ಪೊಲಿಟಿಕೊ ವರದಿಯ ಪ್ರಕಾರ, ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ತಮ್ಮ ಕ್ಯಾಬಿನೆಟ್​​ನ ಸರ್ಕಾರಿ ದಕ್ಷತೆಯ ಇಲಾಖೆಯ (DOGE) ಮುಖ್ಯಸ್ಥ ಸ್ಥಾನದಿಂದ ಮಸ್ಕ್ ಕೆಲವೇ ವಾರಗಳಲ್ಲಿ ಹೊರಹೋಗಲಿದ್ದಾರೆ ಎಂದು ತಿಳಿಸಿದ್ದಾರೆ ಅಂತಾ ಮಾಧ್ಯಮಗಳು ಬಿತ್ತರಿಸಿದ್ದವು. ಆದರೆ ಮಸ್ಕ್ ಮತ್ತು ಶ್ವೇತಭವನ ಈ ಹೇಳಿಕೆಯನ್ನು ನಿರಾಕರಿಸಿದ್ದು, ಅವರ ಕೆಲಸ ಪೂರ್ಣಗೊಳ್ಳುವವರೆಗೆ ತಮ್ಮ ಸ್ಥಾನವನ್ನು ತೊರೆಯುವುದಿಲ್ಲ ಎಂದು ಖಚಿತಪಡಿಸಿದ್ದಾರೆ.