ಬ್ಯಾಂಕಾಕ್​: ಥಾಯ್ಲೆಂಡ್(Thailand)​​​ ಪ್ರವಾಸದಲ್ಲಿರುವ ಪ್ರಧಾನಿ ನರೇಂದ್ರ ಮೋದಿ(narendra modi) ಶುಕ್ರವಾರ ಬಾಂಗ್ಲಾದೇಶದ(Bangladesh) ಮುಖ್ಯ ಸಲಹೆಗಾರ ಮೊಹಮ್ಮದ್​ ಯೂನಸ್(mohammed younus)​ ಅವರನ್ನು ಭೇಟಿಯಾಗಿದ್ದಾರೆ. ಕಳೆದ ಆಗಸ್ಟ್​ನಲ್ಲಿ ಬಾಂಗ್ಲಾದೇಶ ಪ್ರಧಾನಿ ಶೇಕ್​ ಹಸೀನಾ(sheikh haseena) ಪದಚ್ಯುತಿ ಬಳಿಕ ಈ ಇಬ್ಬರು ನಾಯಕರು ಇದೇ ಮೊದಲ ಬಾರಿಗೆ ಮುಖಾಮುಖಿಯಾಗಿದ್ದಾರೆ.

ಬ್ಯಾಂಕಾಕ್​ನಲ್ಲಿನ ಬಿಮ್​ಸ್ಟೆಕ್(bimstek)​​ ಶೃಂಗಸಭೆಯಲ್ಲಿ ಈ ಇಬ್ಬರು ನಾಯಕರು ಪರಸ್ಪರ ಭೇಟಿಯಾಗಿದ್ದಾರೆ. ಈ ಸಭೆಯಲ್ಲಿ ವಿದೇಶಾಂಗ ಇಲಾಖೆ ಸಚಿವ ಎಸ್​ ಜೈಶಂಕರ್​(jai Shankar) ಮತ್ತು ರಾಷ್ಟ್ರೀಯ ಭದ್ರತಾ ಸಲಹೆಗಾರ ಅಜಿತ್​ ದೊವಲ್​ ಕೂಡ ಉಪಸ್ಥಿತರಿದ್ದರು. ಬಾಂಗ್ಲಾದೇಶ ಮುಂದಿನ ಬಿಮ್​ಸ್ಟೆಕ್​ ಶೃಂಗಸಭೆಯ ಅತಿಥ್ಯ ವಹಿಸಿಕೊಳ್ಳಲಿದೆ. ಬಾಂಗ್ಲಾದೇಶದ ಜೊತೆಗೆ ಭಾರತದ ಸಂಬಂಧ ಸೂಕ್ಷ್ಮವಾಗಿರುವ ಹೊತ್ತಿನಲ್ಲಿ ಈ ಸಭೆ ನಡೆದಿರುವುದು ಗಮನ ಸೆಳೆದಿದೆ. ಈ ಕುರಿತು ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಮಾಡಿರುವ ಯೂನಸ್​ ಕಚೇರಿ, ಮುಖ್ಯ ಸಲಹೆಗಾರರಾದ ಮೊಹಮ್ಮದ್​ ಯೂನಸ್​​​ ಮತ್ತು ಪ್ರಧಾನಿ ನರೇಂದ್ರ ಮೋದಿ ಬ್ಯಾಂಕಾಕ್​ನ 6ನೇ ಬಿಮ್​ಸ್ಟೆಕ್​ ಶೃಂಗಸಭೆಯಲ್ಲಿ ದ್ವಿಪಕ್ಷೀಯ ಮಾತುಕತೆ ನಡೆಸಿದ್ದಾರೆ ಎಂದು ತಿಳಿಸಿದೆ.

ಗುರುವಾರ ಥಾಯ್ಲೆಂಡ್​ ಪ್ರಧಾನಿ ಪ್ರಸೆರ್ಟ್ ಜಂತರರು ಬಿಮ್​ಸ್ಟಕ್​ ಶೃಂಗಸಭೆಗೆ ಆಹ್ವಾನಿತರಾಗಿರುವ ವಿವಿಧ ದೇಶದ ನಾಯಕರು ಮತ್ತು ಅಧಿಕಾರಿಗಳಿಗೆ ಆಯೋಜಿಸಿದ್ದ ಔತಣಕೂಟದಲ್ಲಿ ಇಬ್ಬರು ನಾಯಕರು ಭಾಗಿಯಾಗಿದ್ದರು. ಈ ಕುರಿತು ಹಂಚಿಕೊಂಡ ಫೋಟೋದಲ್ಲಿ ಯೂನಸ್ ಪ್ರಧಾನಿ ನರೇಂದ್ರ ಮೋದಿ ಪಕ್ಕದಲ್ಲಿಯೇ ಆಸೀನರಾಗಿದ್ದರು.

2024ರ ಆಗಸ್ಟ್​ನಲ್ಲಿ ಹಸೀನಾ ಸರ್ಕಾರ ಪದಚ್ಯುತಗೊಳಿಸಿದ ಬಳಿಕ ಬಾಂಗ್ಲಾದೇಶದಲ್ಲಿ ಯೂನಸ್​ ನೇತೃತ್ವದ ಮಧ್ಯಂತರ ಸರ್ಕಾರ ಅಧಿಕಾರಕ್ಕೆ ಬಂದಿದೆ. ಬಾಂಗ್ಲಾದ ಹಿಂದೂಗಳನ್ನು ಗುರಿಯಾಗಿಸಿ ನಡೆಸುತ್ತಿರುವ ಬಗ್ಗೆ ಕೇಂದ್ರ ಕಳವಳ ವ್ಯಕ್ತಪಡಿಸಿದ್ದು, ಭಾರತ ಮತ್ತು ಬಾಂಗ್ಲಾದ ಸಂಬಂಧದಲ್ಲಿ ಕುಸಿತವೂ ಕಂಡಿದೆ. ಈ ನಡುವೆ ಕಳೆದ ವಾರ ಯೂನಸ್​ ಬಿಜೀಂಗ್​ಗೆ ಭೇಟಿ ನೀಡಿದ್ದು, ಆರ್ಥಿಕ ಸಹಾಯದ ವಿಸ್ತರಣೆಗೆ ಕೋರಿದ್ದರು. ಈ ವೇಳೆ ಭಾರತದ ಈಶಾನ್ಯ ಭಾರತದ ರಾಜ್ಯಗಳಿಗೆ ಸಮುದ್ರಕ್ಕೆ ದಾರಿ ಇಲ್ಲ. ನಮ್ಮ ಮಾರ್ಗದ ಮೂಲಕವೇ ಅವರು ಬರಬೇಕು ಎಂಬ ಹೇಳಿಕೆ ಮೂಲಕ ವಿವಾದ ಮೂಡಿಸಿದ್ದಾರೆ.