ಸೌದಿ ಅರೇಬಿಯಾ : ರಷ್ಯಾ ಜೊತೆಗಿನ 30 ದಿನಗಳ ಕದನ ವಿರಾಮಕ್ಕೆ ಉಕ್ರೇನ್​ ಸಮ್ಮತಿಸಿದ ಬೆನ್ನಲ್ಲೇ ಉಕ್ರೇನ್​ಗೆ ನೀಡುತ್ತಿದ್ದ ಸೇನಾ ನೆರವಿನ ಮೇಲೆ ವಿಧಿಸಿದ್ದ ತಾತ್ಕಾಲಿಕ ಸ್ಥಗಿತ ಕ್ರಮವನ್ನು ಟ್ರಂಪ್​ ಆಡಳಿತ ಹಿಂಪಡೆದಿದೆ. ಸೌದಿ ಅರೇಬಿಯಾದಲ್ಲಿ ಮಂಗಳವಾರ ನಡೆದ ಮಹತ್ವದ ಮಾತುಕತೆಯ ನಂತರ ಈ ಬೆಳವಣಿಗೆ ನಡೆದಿದೆ.

ರಷ್ಯಾದೊಂದಿಗೆ ಯುದ್ಧ ಕೊನೆಗೊಳಿಸುವ ಕುರಿತು ಉಕ್ರೇನ್​ ಅಧ್ಯಕ್ಷ ವೊಲೊಡಿಮಿರ್​ ಝೆಲನ್ಸ್ಕಿ ಮಾತುಕತೆಗೆ ಮುಂದಾಗದೇ ಇದ್ದುದಕ್ಕೆ ಟ್ರಂಪ್​ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದರು. ಈ ವಿಚಾರವಾಗಿ ಇಬ್ಬರ ನಡುವೆ ವಾಗ್ವಾದವೂ ಏರ್ಪಟ್ಟಿತ್ತು. ಉಕ್ರೇನ್​ಗೆ ನೀಡುತ್ತಿದ್ದ ಎಲ್ಲಾ ಸೇನಾ ನೆರವನ್ನು ತಾತ್ಕಾಲಿಕವಾಗಿ ಅಮೆರಿಕ ಅಧ್ಯಕ್ಷ ಟ್ರಂಪ್ ಸ್ಥಗಿತಗೊಳಿಸಿದ್ದರು. ಇದೀಗ ಟ್ರಂಪ್​ ಕ್ರಮಕ್ಕೆ ಮಣಿದಿರುವ ಝೆಲನ್ಸ್ಕಿ ಕದನ ವಿರಾಮಕ್ಕೆ ಒಪ್ಪಿದ್ದಾರೆ.

ಜೆದ್ದಾದಲ್ಲಿ ನಡೆದ ಮಾತುಕತೆಗೆ ಅಮೆರಿಕ ನಿಯೋಗದ ನೇತೃತ್ವ ವಹಿಸಿದ್ದ ವಿದೇಶಾಂಗ ಕಾರ್ಯದರ್ಶಿ ಮಾರ್ಕೊ ರೂಬಿಯೊ, "ವಾಷಿಂಗ್ಟನ್ ಕದನ ವಿರಾಮದ ಪ್ರಸ್ತಾಪವನ್ನು ಕ್ರೆಮ್ಲಿನ್‌ಗೆ (ರಷ್ಯಾ) ಸಲ್ಲಿಸಲಿದೆ. ಯುದ್ದ ನಿಲ್ಲಿಸಲು ಉಕ್ರೇನ್​ ಸಿದ್ದವಾಗಿದೆ. ರಷ್ಯಾದಿಂದಲೂ ಇದೇ ನಿರೀಕ್ಷೆ ಇದೆ. ಇದಕ್ಕೆ ಇಲ್ಲ ಅಥವಾ ಹೌದು ಎಂದು ಹೇಳುವುದು ರಷ್ಯಾ ಮೇಲೆ ನಿಂತಿದೆ. ಅವರು ಒಂದು ವೇಳೆ ಇಲ್ಲ ಎಂದರೆ, ಶಾಂತಿಗೆ ಇರುವ ಅಡ್ಡಿ ಏನು ಎಂಬುದು ತಿಳಿಯಲಿದೆ ಎಂದರು.

ಸುಮಾರು 8 ಗಂಟೆಗಳ ಕಾಲ ಕದನ ವಿರಾಮದ ಕುರಿತು ಚರ್ಚೆ ನಡೆದಿದೆ. ಇದಾದ ಬಳಿಕ ಮಾತನಾಡಿರುವ ಟ್ರಂಪ್​, "ಮುಂದಿನ ಕೆಲವು ದಿನದಲ್ಲಿ ಒಪ್ಪಂದ ಅಂತಿಮಗೊಳ್ಳಲಿದೆ. ಉಕ್ರೇನ್​​ಗಿಂತ ರಷ್ಯಾದ ಜೊತೆ ವ್ಯವಹರಿಸುವುದು ಸುಲಭ ಎಂದು ನಾನು ತಿಳಿದಿದ್ದೇನೆ. ಆದರೆ, ಉಕ್ರೇನ್​ ಪೂರ್ಣ ಕದನ ವಿರಾಮಕ್ಕೆ ಒಪ್ಪಿದರೆ ಒಳ್ಳೆಯದು" ಎಂದು ಹೇಳಿದರು.

ಈ ಬೆನ್ನಲ್ಲೇ ಮಾತನಾಡಿರುವ ಉಕ್ರೇನ್​ ಅಧ್ಯಕ್ಷ ಝೆಲನ್ಸ್ಕಿ, "ಉಕ್ರೇನ್​ ಈ ಯುದ್ಧ ಆರಂಭವಾದಾನಿಗಿಂದಲೂ ಪ್ರತಿಕ್ಷಣ ಶಾಂತಿಗಾಗಿ ಶ್ರಮಿಸುತ್ತಿದೆ. ನಾವು ಸುರಕ್ಷತೆಯನ್ನು ಬಯಸುತ್ತಿದ್ದೇವೆ" ಎಂದಿದ್ದಾರೆ.